૪. અનાદરિયસિક્ખાપદવણ્ણના

૩૪૨. ચતુત્થે – કથાયં નસ્સેય્યાતિ કથં અયં ધમ્મો તન્તિ પવેણી નસ્સેય્ય. તં વા ન સિક્ખિતુકામોતિ યેન પઞ્ઞત્તેન વુચ્ચતિ, તં પઞ્ઞત્તં ન સિક્ખિતુકામો. અપઞ્ઞત્તેનાતિ સુત્તે વા અભિધમ્મે વા આગતેન.

૩૪૪. એવં અમ્હાકં આચરિયાનં ઉગ્ગહોતિ એત્થ ગારય્હો આચરિયુગ્ગહો ન ગહેતબ્બો; પવેણિયા આગતો આચરિયુગ્ગહોવ ગહેતબ્બો. કુરુન્દિયં પન ‘‘લોકવજ્જે આચરિયુગ્ગહો ન વટ્ટતિ, પણ્ણત્તિવજ્જે પન વટ્ટતી’’તિ વુત્તં. મહાપચ્ચરિયં ‘‘સુત્તં સુત્તાનુલોમઞ્ચ ઉગ્ગહિતકાનંયેવ આચરિયાનં ઉગ્ગહો પમાણં, અજાનન્તાનં કથા અપ્પમાણન્તિ વુત્તં. તં સબ્બં પવેણિયા આગતેસમોધાનં ગચ્છતિ. સેસં ઉત્તાનમેવાતિ.

તિસમુટ્ઠાનં – કાયચિત્તતો વાચાચિત્તતો કાયવાચાચિત્તતો ચ સમુટ્ઠાતિ, કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.

અનાદરિયસિક્ખાપદં ચતુત્થં.