૯. અનિમિત્તપઞ્હાસુત્તવણ્ણના

૩૪૦. અનિમિત્તં ચેતોસમાધિન્તિ નિચ્ચનિમિત્તાદીનિ પહાય પવત્તં વિપસ્સનાસમાધિંયેવ સન્ધાયેતં વુત્તન્તિ. નિમિત્તાનુસારિ વિઞ્ઞાણં હોતીતિ એવં ઇમિના વિપસ્સનાસમાધિવિહારેન વિહરતો વિપસ્સનાઞાણે તિક્ખે સૂરે વહમાને. યથા નામ પુરિસસ્સ તિખિણેન ફરસુના રુક્ખં છિન્દન્તસ્સ ‘‘સુટ્ઠુ વત મે ફરસુ વહતી’’તિ ખણે ખણે ફરસુધારં ઓલોકેન્તસ્સ છેજ્જકિચ્ચં ન નિપ્ફજ્જતિ, એવં થેરસ્સાપિ ‘‘સૂરં વત મે હુત્વા ઞાણં વહતી’’તિ વિપસ્સનં આરબ્ભ નિકન્તિ ઉપ્પજ્જતિ. અથ વિપસ્સનાકિચ્ચં સાધેતું નાસક્ખિ. તં સન્ધાય વુત્તં ‘‘નિમિત્તાનુસારિ વિઞ્ઞાણં હોતી’’તિ. સબ્બનિમિત્તાનં અમનસિકારા અનિમિત્તં ચેતોસમાધિં ઉપસમ્પજ્જ વિહાસિન્તિ સબ્બેસં નિચ્ચસુખઅત્તનિમિત્તાનં અમનસિકારેન અનિમિત્તં વુટ્ઠાનગામિનિવિપસ્સનાસમ્પયુત્તં ચેતોસમાધિં નિબ્બાનારમ્મણં ઉપરિમગ્ગફલસમાધિં ઉપસમ્પજ્જ વિહાસિં.