૧-૪. પઠમપુબ્બેસમ્બોધસુત્તાદિવણ્ણના

૧૩-૧૬. યમકવગ્ગસ્સ પઠમદુતિયેસુ અજ્ઝત્તિકાનન્તિ અજ્ઝત્તજ્ઝત્તવસેન અજ્ઝત્તિકાનં. સો પન નેસં અજ્ઝત્તિકભાવો છન્દરાગસ્સ અધિમત્તબલવતાય વેદિતબ્બો. મનુસ્સાનઞ્હિ અન્તોઘરં વિય છ અજ્ઝત્તિકાયતનાનિ, ઘરૂપચારં વિય છ બાહિરાયતનાનિ. યથા નેસં પુત્તદારધનધઞ્ઞપુણ્ણે અન્તોઘરે છન્દરાગો અધિમત્તબલવા હોતિ, તત્થ કસ્સચિ પવિસિતું ન દેન્તિ, અપ્પમત્તેન ભાજનસદ્દમત્તેનાપિ ‘‘કિં એત’’ન્તિ? વત્તારો ભવન્તિ. એવમેવં છસુ અજ્ઝત્તિકેસુ આયતનેસુ અધિમત્તબલવછન્દરાગોતિ. ઇતિ ઇમાય છન્દરાગબલવતાય તાનિ ‘‘અજ્ઝત્તિકાની’’તિ વુત્તાનિ. ઘરૂપચારે પન નો તથા બલવા હોતિ, તત્થ ચરન્તે મનુસ્સેપિ ચતુપ્પદાનિપિ ન સહસા નિવારેન્તિ. કિઞ્ચાપિ ન નિવારેન્તિ, અનિચ્છન્તા પન પસુપચ્છિમત્તમ્પિ ગહિતું ન દેન્તિ. ઇતિ નેસં તત્થ ન અધિમત્તબલવછન્દરાગો હોતિ. રૂપાદીસુપિ તથેવ ન અધિમત્તબલવછન્દરાગો, તસ્મા તાનિ ‘‘બાહિરાની’’તિ વુત્તાનિ. વિત્થારતો પન અજ્ઝત્તિકબાહિરકથા વિસુદ્ધિમગ્ગે વુત્તાવ. સેસં દ્વીસુપિ સુત્તેસુ હેટ્ઠા વુત્તનયમેવ. તથા તતિયચતુત્થેસુ.