૬. એસુકારીસુત્તવણ્ણના

૪૩૭. એવં મે સુતન્તિ એસુકારીસુત્તં. તત્થ બિલં ઓલગ્ગેય્યુન્તિ કોટ્ઠાસં લગ્ગાપેય્યું, ઇમિના સત્થધમ્મં નામ દસ્સેતિ. સત્થવાહો કિર મહાકન્તારપટિપન્નો અન્તરામગ્ગે ગોણે મતે મંસં ગહેત્વા સબ્બેસં સત્થિકાનં ‘‘ઇદં ખાદિત્વા એત્તકં મૂલં દાતબ્બ’’ન્તિ કોટ્ઠાસં ઓલગ્ગેતિ, ગોણમંસં નામ ખાદન્તાપિ અત્થિ અખાદન્તાપિ, મૂલં દાતું સક્કોન્તાપિ અસક્કોન્તાપિ. સત્થવાહો યેન મૂલેન ગોણો ગહિતો, તસ્સ નિક્ખમનત્થં સબ્બેસં બલક્કારેન કોટ્ઠાસં દત્વા મૂલં ગણ્હાતિ, અયં સત્થધમ્મો. એવમેવં બ્રાહ્મણાપિ લોકસ્સ પટિઞ્ઞં અગ્ગહેત્વા અત્તનોવ ધમ્મતાય ચતસ્સો પારિચરિયા પઞ્ઞપેન્તીતિ દસ્સેતું એવમેવ ખોતિઆદિમાહ. પાપિયો અસ્સાતિ પાપં અસ્સ. સેય્યો અસ્સાતિ હિતં અસ્સ. અથ વા પાપિયોતિ પાપકો લામકો અત્તભાવો અસ્સ. સેય્યોતિ સેટ્ઠો ઉત્તમો. સેય્યંસોતિ સેય્યો. ઉચ્ચાકુલીનતાતિ ઉચ્ચાકુલીનત્તેન સેય્યો. પાપિયંસોતિ પાપિયો. ઉચ્ચાકુલીનતા ચ દ્વીસુ કુલેસુ વડ્ઢેતિ ખત્તિયકુલે બ્રાહ્મણકુલે ચ, ઉળારવણ્ણતા તીસુ. વેસ્સોપિ હિ ઉળારવણ્ણો હોતિ. ઉળારભોગતા ચતૂસુપિ. સુદ્દોપિ હિ અન્તમસો ચણ્ડાલોપિ ઉળારભોગો હોતિયેવ.

૪૪૦. ભિક્ખાચરિયન્તિ કોટિધનેનપિ હિ બ્રાહ્મણેન ભિક્ખા ચરિતબ્બાવ, પોરાણકબ્રાહ્મણા અસીતિકોટિધનાપિ એકવેલં ભિક્ખં ચરન્તિ. કસ્મા? દુગ્ગતકાલે ચરન્તાનં ઇદાનિ ભિક્ખં ચરિતું આરદ્ધાતિ ગરહા ન ભવિસ્સતીતિ. અતિમઞ્ઞમાનોતિ યો ભિક્ખાચરિયવંસં હરિત્વા સત્તજીવકસિકમ્મવણિજ્જાદીહિ જીવિકં કપ્પેતિ, અયં અતિમઞ્ઞતિ નામ. ગોપો વાતિ યથા ગોપકો અત્તના રક્ખિતબ્બં ભણ્ડં થેનેન્તો અકિચ્ચકારી હોતિ, એવન્તિ અત્થો. ઇમિના નયેન સબ્બવારેસુ અત્થો વેદિતબ્બો. અસિતબ્યાભઙ્ગિન્તિ તિણલાયનઅસિતઞ્ચેવ કાજઞ્ચ. અનુસ્સરતોતિ યત્થ જાતો, તસ્મિં પોરાણે માતાપેત્તિકે કુલવંસે અનુસ્સરિયમાનેતિ અત્થો. સેસં સબ્બત્થ ઉત્તાનમેવાતિ.

પપઞ્ચસૂદનિયા મજ્ઝિમનિકાયટ્ઠકથાય

એસુકારીસુત્તવણ્ણના નિટ્ઠિતા.