૪. ચતુત્થપીઠવિમાનવણ્ણના

પીઠં તે વેળુરિયમયન્તિ ચતુત્થપીઠવિમાનં. ઇમસ્સાપિ વત્થુ રાજગહે સમુટ્ઠિતં, તં દુતિયવિમાને વુત્તનયેનેવ વેદિતબ્બં. નીલવત્થેન હિ અત્થરિત્વા પીઠસ્સ દિન્નત્તા ઇમિસ્સાપિ વિમાનં વેળુરિયમયં નિબ્બત્તં. સેસં પઠમવિમાને વુત્તસદિસં. તેન વુત્તં –

૨૩. ‘‘પીઠં તે વેળુરિયમયં ઉળારં, મનોજવં ગચ્છતિ યેનકામં;

અલઙ્કતે મલ્યધરે સુવત્થે, ઓભાસસિ વિજ્જુરિવબ્ભકૂટં.

૨૪. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૨૫. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૨૬. ‘‘સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં’’.

૨૭. ‘‘અપ્પસ્સ કમ્મસ્સ ફલં મમેદં, યેનમ્હિ એવં જલિતાનુભાવા;

અહં મનુસ્સેસુ મનુસ્સભૂતા, પુરિમાય જાતિયા મનુસ્સલોકે.

૨૮. ‘‘અદ્દસં વિરજં ભિક્ખું, વિપ્પસન્નમનાવિલં;

તસ્સ અદાસહં પીઠં, પસન્ના સેહિ પાણિભિ.

૨૯. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૩૦. ‘‘અક્ખામિ તે ભિક્ખુ મહાનુભાવ, મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતી’’તિ.

એત્થાપિ હિ નીલવત્થેન અત્થરિત્વા પીઠસ્સ દિન્નત્તા ઇમિસ્સાપિ વિમાનં વેળુરિયમયં નિબ્બત્તં. તેનેવેત્થ ‘‘પીઠં તે વેળુરિયમય’’ન્તિ આદિતો આગતં. સેસં તતિયસદિસમેવાતિ તત્થ વુત્તનયેનેવ અત્થો વેદિતબ્બો.

ચતુત્થપીઠવિમાનવણ્ણના નિટ્ઠિતા.