૬. કુમારપેતવત્થુવણ્ણના

સાવત્થિ નામ નગરન્તિ ઇદં સત્થા જેતવને વિહરન્તો દ્વે પેતે આરબ્ભ કથેસિ. સાવત્થિયં કિર કોસલરઞ્ઞો દ્વે પુત્તા પાસાદિકા પઠમવયે ઠિતા યોબ્બનમદમત્તા પરદારકમ્મં કત્વા કાલં કત્વા પરિખાપિટ્ઠે પેતા હુત્વા નિબ્બત્તિંસુ. તે રત્તિયં ભેરવેન સદ્દેન પરિદેવિંસુ. મનુસ્સા તં સુત્વા ભીતતસિતા ‘‘એવં કતે ઇદં અવમઙ્ગલં વૂપસમ્મતી’’તિ બુદ્ધપ્પમુખસ્સ ભિક્ખુસઙ્ઘસ્સ મહાદાનં દત્વા તં પવત્તિં ભગવતો આરોચેસું. ભગવા ‘‘ઉપાસકા તસ્સ સદ્દસ્સ સવનેન તુમ્હાકં ન કોચિ અન્તરાયો’’તિ વત્વા તસ્સ કારણં આચિક્ખિત્વા તેસં ધમ્મં દેસેતું –

૭૪૬. ‘‘સાવત્થિ નામ નગરં, હિમવન્તસ્સ પસ્સતો;

તત્થ આસું દ્વે કુમારા, રાજપુત્તાતિ મે સુતં.

૭૪૭. ‘‘સમ્મત્તા રજનીયેસુ, કામસ્સાદાભિનન્દિનો;

પચ્ચુપ્પન્નસુખે ગિદ્ધા, ન તે પસ્સિંસુનાગતં.

૭૪૮. ‘‘તે ચુતા ચ મનુસ્સત્તા, પરલોકં ઇતો ગતા;

તેધ ઘોસેન્ત્યદિસ્સન્તા, પુબ્બે દુક્કટમત્તનો.

૭૪૯. ‘‘બહૂસુ વત સન્તેસુ, દેય્યધમ્મે ઉપટ્ઠિતે;

નાસક્ખિમ્હા ચ અત્તાનં, પરિત્તં કાતું સુખાવહં.

૭૫૦. ‘‘કિં તતો પાપકં અસ્સ, યં નો રાજકુલા ચુતા;

ઉપપન્ના પેત્તિવિસયં, ખુપ્પિપાસસમપ્પિતા.

૭૫૧. ‘‘સામિનો ઇધ હુત્વાન, હોન્તિ અસામિનો તહિં;

ભમન્તિ ખુપ્પિપાસાય, મનુસ્સા ઉન્નતોનતા.

૭૫૨. ‘‘એતમાદીનવં ઞત્વા, ઇસ્સરમદસમ્ભવં;

પહાય ઇસ્સરમદં, ભવે સગ્ગગતો નરો;

કાયસ્સ ભેદા સપ્પઞ્ઞો, સગ્ગં સો ઉપપજ્જતી’’તિ – ગાથા અભાસિ;

૭૪૬. તત્થ ઇતિ મે સુતન્તિ ન કેવલં અત્તનો ઞાણેન દિટ્ઠમેવ, અથ ખો લોકે પાકટભાવેન એવં મયા સુતન્તિ અત્થો.

૭૪૭. કામસ્સાદાભિનન્દિનોતિ કામગુણેસુ અસ્સાદવસેન અભિનન્દનસીલા. પચ્ચુપ્પન્નસુખે ગિદ્ધાતિ વત્તમાનસુખમત્તે ગિદ્ધા ગથિતા હુત્વા. ન તે પસ્સિંસુનાગતન્તિ દુચ્ચરિતં પહાય સુચરિતં ચરિત્વા અનાગતં આયતિં દેવમનુસ્સેસુ લદ્ધબ્બં સુખં તે ન ચિન્તેસું.

૭૪૮. તેધ ઘોસેન્ત્યદિસ્સન્તાતિ તે પુબ્બે રાજપુત્તભૂતા પેતા ઇધ સાવત્થિયા સમીપે અદિસ્સમાનરૂપા ઘોસેન્તિ કન્દન્તિ. કિં કન્દન્તીતિ આહ ‘‘પુબ્બે દુક્કટમત્તનો’’તિ.

૭૪૯. ઇદાનિ તેસં કન્દનસ્સ કારણં હેતુતો ચ ફલતો ચ વિભજિત્વા દસ્સેતું ‘‘બહૂસુ વત સન્તેસૂ’’તિઆદિ વુત્તં.

તત્થ બહૂસુ વત સન્તેસૂતિ અનેકેસુ દક્ખિણેય્યેસુ વિજ્જમાનેસુ. દેય્યધમ્મે ઉપટ્ઠિતેતિ અત્તનો સન્તકે દાતબ્બદેય્યધમ્મેપિ સમીપે ઠિતે, લબ્ભમાનેતિ અત્થો. પરિત્તં સુખાવહન્તિ અપ્પમત્તકમ્પિ આયતિં સુખાવહં પુઞ્ઞં કત્વા અત્તાનં સોત્થિં નિરુપદ્દવં કાતું નાસક્ખિમ્હા વતાતિ યોજના.

૭૫૦. કિં તતો પાપકં અસ્સાતિ તતો પાપકં લામકં નામ કિં અઞ્ઞં અસ્સ સિયા. યં નો રાજકુલા ચુતાતિ યેન પાપકમ્મેન મયં રાજકુલતો ચુતા ઇધ પેત્તિવિસયં ઉપપન્ના પેતેસુ નિબ્બત્તા ખુપ્પિપાસસમપ્પિતા વિચરામાતિ અત્થો.

૭૫૧. સામિનો ઇધ હુત્વાનાતિ ઇધ ઇમસ્મિં લોકે યસ્મિંયેવ ઠાને પુબ્બે સામિનો હુત્વા વિચરન્તિ, તહિં તસ્મિંયેવ ઠાને હોન્તિ અસ્સામિનો. મનુસ્સા ઉન્નતોનતાતિ મનુસ્સકાલે સામિનો હુત્વા કાલકતા કમ્મવસેન ઓનતા ભમન્તિ ખુપ્પિપાસાય, પસ્સ સંસારપકતિન્તિ દસ્સેતિ.

૭૫૨. એતમાદીનવં ઞત્વા, ઇસ્સરમદસમ્ભવન્તિ એતં ઇસ્સરિયમદવસેન સમ્ભૂતં અપાયૂપપત્તિસઙ્ખાતં આદીનવં દોસં ઞત્વા પહાય ઇસ્સરિયમદં પુઞ્ઞપ્પસુતો હુત્વા. ભવે સગ્ગગતો નરોતિ સગ્ગં દેવલોકં ગતોયેવ ભવેય્ય.

ઇતિ સત્થા તેસં પેતાનં પવત્તિં કથેત્વા તેહિ મનુસ્સેહિ કતં દાનં તેસં પેતાનં ઉદ્દિસાપેત્વા સમ્પત્તપરિસાય અજ્ઝાસયાનુરૂપં ધમ્મં દેસેસિ. સા દેસના મહાજનસ્સ સાત્થિકા અહોસીતિ.

કુમારપેતવત્થુવણ્ણના નિટ્ઠિતા.