૧-૧૦. પંસુકૂલસઞ્ઞકત્થેરઅપદાનાદિવણ્ણના

એકૂનપઞ્ઞાસમવગ્ગે પઠમાપદાનં સુવિઞ્ઞેય્યમેવ.

૧૪. દુતિયાપદાને અધિચ્ચુપ્પત્તિકા બુદ્ધાતિ અધિચ્ચેન અકારણેન ઉપ્પત્તિકા સયમ્ભૂતા, અઞ્ઞેહિ દેવબ્રહ્મમારાદીહિ ઉપદેસદાયકેહિ રહિતા સયમ્ભૂઞાણેન ઉપ્પન્ના જાતા પાતુભૂતાતિ અત્થો.

૧૬. ઓદુમ્બરિકપુપ્ફં વાતિ ઉદુમ્બરરુક્ખે પુપ્ફં દુલ્લભં દુલ્લભુપ્પત્તિકં ઇવ. ચન્દમ્હિ સસકં યથાતિ ચન્દમણ્ડલે સસલેખાય રૂપં દુલ્લભં યથા. વાયસાનં યથા ખીરન્તિ કાકાનં નિચ્ચં રત્તિન્દિવં ખુદ્દાપીળિતભાવેન ખીરં દુલ્લભં યથા, એવં દુલ્લભં લોકનાયકં ચતુરાસઙ્ખ્યેય્યં વા અટ્ઠાસઙ્ખ્યેય્યં વા સોળસાસઙ્ખ્યેય્યં વા કપ્પસતસહસ્સં પારમિયો પૂરેત્વા બુદ્ધભાવતો દુલ્લભો લોકનાયકોતિ અત્થો.

૩૦. તતિયાપદાને મધું ભિસેહિ સવતીતિ પોક્ખરમધુપદુમકેસરેહિ સવતિ પગ્ઘરતિ. ખીરં સપ્પિં મુળાલિભીતિ ખીરઞ્ચ સપ્પિરસઞ્ચ પદુમમુળાલેહિ સવતિ પગ્ઘરતિ. તસ્મા તદુભયં મમ સન્તકં બુદ્ધો પટિગ્ગણ્હતૂતિ અત્થો.

ચતુત્થપઞ્ચમછટ્ઠાપદાનાનિ ઉત્તાનાનેવ.

૧૧૯. સત્તમાપદાને ચત્તાલીસદિજાપિ ચાતિ દ્વિક્ખત્તું જાતાતિ દિજા. કુમારવયે ઉટ્ઠિતદન્તાનં પતિતત્તા પુન ઉટ્ઠિતદન્તા દિજા, તે ચ દન્તા. બ્યાકરણઞ્ચ હેટ્ઠા નિદાનકથાયં વુત્તમેવ.

અટ્ઠમાપદાનં ઉત્તાનમેવાતિ.

૧૭૧. નવમાપદાને તદાહં માણવો આસિન્તિ યદા સુમેધપણ્ડિતો દીપઙ્કરભગવતો સન્તિકા બ્યાકરણં લભિ, તદા અહં મેઘો નામ બ્રાહ્મણમાણવો હુત્વા સુમેધતાપસેન સહ ઇસિપબ્બજ્જં પબ્બજિત્વા સિક્ખાપદેસુ સિક્ખિતો કેનચિ પાપસહાયેન સંસટ્ઠો સંસગ્ગદોસેન પાપવિતક્કાદિવસં ગતો માતુઘાતકમ્મવસેન નરકે અગ્ગિજાલાદિદુક્ખમનુભવિત્વા તતો ચુતો સમુદ્દે તિમિઙ્ગલમહામચ્છો હુત્વા નિબ્બત્તો, સમુદ્દમજ્ઝે ગચ્છન્તં મહાનાવં ગિલિતુકામો ગતો. દિસ્વા મં વાણિજા ભીતા ‘‘અહો ગોતમો ભગવા’’તિ સદ્દમકંસુ. અથ મહામચ્છો પુબ્બવાસનાવસેન બુદ્ધગારવં ઉપ્પાદેત્વા તતો ચુતો સાવત્થિયં વિભવસમ્પન્ને બ્રાહ્મણકુલે નિબ્બત્તો સદ્ધો પસન્નો સત્થુ ધમ્મદેસનં સુત્વા પબ્બજિત્વા સહ પટિસમ્ભિદાહિ અરહત્તં પાપુણિત્વા દિવસસ્સ તિક્ખત્તું ઉપટ્ઠાનં ગન્ત્વા સરમાનો વન્દતિ. તદા ભગવા ‘‘ચિરં ધમ્મરુચી’’તિ મં આહ.

૧૮૪. અથ સો થેરો ‘‘સુચિરં સતપુઞ્ઞલક્ખણ’’ન્તિઆદીહિ ગાથાહિ થોમેસિ. ભન્તે, સતપુઞ્ઞલક્ખણધર ગોતમ. પતિપુબ્બેન વિસુદ્ધપચ્ચયન્તિ પુબ્બે દીપઙ્કરપાદમૂલે પરિપુણ્ણપારમીપચ્ચયસમ્ભારો સુટ્ઠુ ચિરં કાલં મયા ન દિટ્ઠો અસીતિ અત્થો. અહમજ્જસુપેક્ખનન્તિ અજ્જ ઇમસ્મિં દિવસે અહં સુપેક્ખનં સુન્દરદસ્સનં, સુન્દરદિટ્ઠં વા નિરુપમં વિગ્ગહં ઉપમારહિતસરીરં ગોતમં વત એકન્તેન પસ્સામિ દક્ખામીતિ અત્થો.

૧૮૫-૧૮૬. સુચિરં વિહતતમો મયાતિ વિસેસેન હતતમો વિદ્ધંસિતમોહો ત્વં મયાપિ સુટ્ઠુ ચિરં થોમિતોતિ અત્થો. સુચિરક્ખેન નદી વિસોસિતાતિ એસા તણ્હાનદી સુન્દરરક્ખેન ગોપનેન વિસેસેન સોસિતા, અભબ્બુપ્પત્તિકતા તયાતિ અત્થો. સુચિરં અમલં વિસોધિતન્તિ સુટ્ઠુ ચિરં દીઘેન અદ્ધુના અમલં નિબ્બાનં વિસેસેન સોધિતં, સુટ્ઠુ કતં અધિગતં તયાતિ અત્થો. નયનં ઞાણમયં મહામુને. ચિરકાલસમઙ્ગિતોતિ મહામુને મહાસમણ ઞાણમયં નયનં દિબ્બચક્ખું ચિરકાલં સમધિગતો સમ્પત્તો ત્વન્તિ અત્થો. અવિનટ્ઠો પુનરન્તરન્તિ અહં પુન અન્તરં અન્તરાભવે મજ્ઝે પરિનટ્ઠો પરિહીનો અહોસિન્તિ અત્થો. પુનરજ્જસમાગતો તયાતિ અજ્જ ઇમસ્મિં કાલે તયા સદ્ધિં પુનપિ સમાગતો એકીભૂતો સહ વસામીતિ અત્થો. ન હિ નસ્સન્તિ કતાનિ ગોતમાતિ ગોતમ સબ્બઞ્ઞુબુદ્ધ, તયા સદ્ધિં કતાનિ સમાગમાદીનિ ન હિ નસ્સન્તિ યાવ ખન્ધપરિનિબ્બાના ન વિના ભવિસ્સન્તીતિ અત્થો. સેસં ઉત્તાનમેવાતિ.

ધમ્મરુચિયત્થેરઅપદાનવણ્ણના સમત્તા.

દસમાપદાનં સુવિઞ્ઞેય્યમેવાતિ.

એકૂનપઞ્ઞાસમવગ્ગવણ્ણના સમત્તા.