૧-૧૦. ભદ્દાલિત્થેરઅપદાનાદિવણ્ણના

બાચત્તાલીસમવગ્ગે પઠમાપદાનઞ્ચ દુતિયાપદાનઞ્ચ તતિયાપદાનઞ્ચ નયાનુસારેન સુવિઞ્ઞેય્યમેવ.

૧૦૬. ચતુત્થાપદાને નગરે બન્ધુમતિયાતિઆદિકં આયસ્મતો મધુમંસદાયકત્થેરસ્સ અપદાનં. તત્થ સૂકરિકોતિ સૂકરમંસં વિક્કિણિત્વા જીવિકં કપ્પેન્તો. ઉક્કોટકં રન્ધયિત્વાતિ પિહકપપ્ફાસમંસં પચિત્વા મધુમંસમ્હિ ઓકિરિં પક્ખિપિં. તેન મંસેન પત્તં પૂરેત્વા ભિક્ખુસઙ્ઘસ્સ દત્વા તેન પુઞ્ઞકમ્મેન ઇમસ્મિં બુદ્ધુપ્પાદે અરહત્તં પાપુણિન્તિ અત્થો.

નાગપલ્લવત્થેરસ્સ પઞ્ચમાપદાનમ્પિ એકદીપિયત્થેરસ્સ છટ્ઠાપદાનમ્પિ ઉચ્છઙ્ગપુપ્ફિયત્થેરસ્સ સત્તમાપદાનમ્પિ યાગુદાયકત્થેરસ્સ અટ્ઠમાપદાનમ્પિ પત્થોદનદાયકત્થેરસ્સ નવમાપદાનમ્પિ મઞ્ચદાયકત્થેરસ્સ દસમાપદાનમ્પિ સબ્બં સુવિઞ્ઞેય્યમેવાતિ.

બાચત્તાલીસમવગ્ગવણ્ણના સમત્તા.