૨. પુણ્ણકત્થેરઅપદાનવણ્ણના

૨૯. દુતિયાપદાને પબ્ભારકૂટં નિસ્સાયાતિઆદિકં આયસ્મતો પુણ્ણકત્થેરસ્સ અપદાનં. તત્થ હિમવન્તે યક્ખસેનાપતિ હુત્વા પરિનિબ્બુતસ્સ પચ્ચેકબુદ્ધસ્સ આળહનકરણમેવ નાનત્તં. સેસં પાઠાનુસારેન સુવિઞ્ઞેય્યમેવ.

૪૫. તતિયાપદાને હિમવન્તસ્સાવિદૂરેતિઆદિકં આયસ્મતો મેત્તગુત્થેરસ્સ અપદાનં. તત્થ હિમવન્તસમીપે અસોકપબ્બતે સો તાપસો હુત્વા પણ્ણસાલાયં વસન્તો સુમેધસમ્બુદ્ધં દિસ્વા પત્તં ગહેત્વા સપ્પિપૂરણં વિસેસો. સેસં પુઞ્ઞફલાનિ ચ સુવિઞ્ઞેય્યાનેવ. અપદાનગાથાનં અત્થો ચ પાકટોયેવ.

૭૨. ચતુત્થાપદાને ગઙ્ગા ભાગીરથી નામાતિઆદિકં આયસ્મતો ધોતકત્થેરસ્સ અપદાનં. તત્રાપિ બ્રાહ્મણો હુત્વા ભાગીરથીગઙ્ગાય તરમાને ભિક્ખૂ દિસ્વા પસન્નમાનસો સેતું કારાપેત્વા બુદ્ધપ્પમુખસ્સ ભિક્ખુસઙ્ઘસ્સ નિય્યાદિતભાવોયેવ વિસેસો. પુઞ્ઞફલપરિદીપનગાથાનં અત્થો નયાનુસારેન સુવિઞ્ઞેય્યોવ.

૧૦૦. પઞ્ચમાપદાને હિમવન્તસ્સાવિદૂરેતિઆદિકં આયસ્મતો ઉપસિવત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરાવાસં પહાય ઇસિપબ્બજ્જં પબ્બજિત્વા હિમવન્તે પદુમુત્તરં ભગવન્તં દિસ્વા તિણસન્થરં સન્થરિત્વા તત્થ નિસિન્નસ્સ ભગવતો સાલપુપ્ફપૂજં અકાસીતિ અયં વિસેસો, સેસમુત્તાનમેવ.

૧૬૧. છટ્ઠાપદાને મિગલુદ્દો પુરે આસિન્તિઆદિકં આયસ્મતો નન્દકત્થેરસ્સ અપદાનં. અયં કિર પદુમુત્તરસ્સ ભગવતો કાલે કરવિકસકુણો હુત્વા મધુરકૂજિતં કરોન્તો સત્થારં પદક્ખિણં અકાસિ. અપરભાગે મયૂરો હુત્વા અઞ્ઞતરસ્સ પચ્ચેકબુદ્ધસ્સ વસનગુહાદ્વારે પસન્નમાનસો દિવસસ્સ તિક્ખત્તું મધુરેન વસ્સિતં વસ્સિ. એવં તત્થ તત્થ ભવે પુઞ્ઞાનિ કત્વા અમ્હાકં ભગવતો કાલે સાવત્થિયં કુલગેહે નિબ્બત્તો નન્દકોતિ લદ્ધનામો સત્થુ સન્તિકે ધમ્મં સુત્વા પબ્બજિત્વા વિપસ્સનં વડ્ઢેત્વા અરહત્તં પાપુણિ. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો મિગલુદ્દો પુરે આસિન્તિઆદિમાહ. તત્થ પચ્ચેકબુદ્ધસ્સ મણ્ડપં કત્વા પદુમપુપ્ફેહિ છદનમેવ વિસેસો.

૧૮૩. સત્તમાપદાને પબ્ભારકૂટં નિસ્સાયાતિઆદિકં આયસ્મતો હેમકત્થેરસ્સ અપદાનં. તત્થાપિ ઇસિપબ્બજ્જં પબ્બજિત્વા હિમવન્તે વસન્તો પિયદસ્સિં ભગવન્તં ઉપગતં દિસ્વા રતનમયં પીઠં અત્થરિત્વા અટ્ઠાસિ. તત્થ નિસિન્નસ્સ કુમ્ભમત્તં જમ્બુફલં આહરિત્વા અદાસિ. ભગવા તસ્સ ચિત્તપ્પસાદત્થાય તં ફલં પરિભુઞ્જિ. એત્તકમેવ વિસેસો.

૨૨૪. અટ્ઠમાપદાને રાજાસિ વિજયો નામાતિઆદિકં આયસ્મતો તોદેય્યત્થેરસ્સ અપદાનં. તત્થ રાજાસિ વિજયો નામાતિ દહરકાલતો પટ્ઠાય સબ્બસઙ્ગામેસુ જિનતો, ચતૂહિ સઙ્ગહવત્થૂહિ જનં રઞ્જનતો અલ્લીયનતો વિજયો નામ રાજા અહોસીતિ અત્થો. કેતુમતીપુરુત્તમેતિ કેતુ વુચ્ચન્તિ ધજપટાકા. અથ વા નગરસોભનત્થાય નગરમજ્ઝે ઉસ્સાપિતરતનતોરણાનિ, તે કેતૂ નિચ્ચં ઉસ્સાપિતા સોભયમાના અસ્સા અત્થીતિ કેતુમતી. પૂરેતિ ધનધઞ્ઞેહિ સબ્બજનાનં મનન્તિ પુરં. કેતુમતી ચ સા પુરઞ્ચ સેટ્ઠટ્ઠેન ઉત્તમઞ્ચેતિ કેતુમતીપુરુત્તમં, તસ્મિં કેતુમતીપુરુત્તમે. સૂરો વિક્કમસમ્પન્નોતિ અભીતો વીરિયસમ્પન્નો વિજયો નામ રાજા અજ્ઝાવસીતિ સમ્બન્ધો. ઇત્થં ભૂતં પુરઞ્ચ સબ્બવત્થુવાહનઞ્ચ છડ્ડેત્વા હિમવન્તં પવિસિત્વા ઇસિપબ્બજ્જં પબ્બજિત્વા વસન્તો સુમેધભગવન્તં દિસ્વા સોમનસ્સં ઉપ્પાદેત્વા ચન્દનેન પૂજાકરણમેવ વિસેસો.

૨૭૬. નવમાપદાને નગરે હંસવતિયાતિઆદિકં આયસ્મતો જતુકણ્ણિત્થેરસ્સ અપદાનં. તત્થ સેટ્ઠિપુત્તો હુત્વા સુવણ્ણપાસાદે વસનભાવો ચ પઞ્ચહિ કામગુણેહિ સમઙ્ગી હુત્વા વસનભાવો ચ સબ્બદેસવાસીનં સબ્બસિપ્પવિઞ્ઞૂનઞ્ચ આગન્ત્વા સેવનભાવો ચ વિસેસો.

૩૩૦. દસમાપદાને હિમવન્તસ્સાવિદૂરેતિઆદિકં આયસ્મતો ઉદેનત્થેરસ્સ અપદાનં. તત્થ હિમવન્તસમીપે પદુમપબ્બતં નિસ્સાય તાપસપબ્બજ્જં પબ્બજિત્વા વસન્તેન પદુમુત્તરસ્સ ભગવતો પદુમપુપ્ફં ગહેત્વા પૂજિતભાવોવ વિસેસો. સેસં સબ્બત્થ ઉત્તાનમેવાતિ.

એકચત્તાલીસમવગ્ગવણ્ણના સમત્તા.