૧-૧૦. પણ્ણદાયકત્થેરઅપદાનાદિવણ્ણના

૧-૨. એકૂનતિંસતિમે વગ્ગે પઠમાપદાને પણ્ણભોજનભોજનોતિ ખીરપણ્ણાદિભોજનસ્સ ભુઞ્જનત્થાય પણ્ણસાલાય નિસિન્નો અમ્હિ ભવામીતિ અત્થો. ઉપવિટ્ઠઞ્ચ મં સન્તન્તિ પણ્ણસાલાયં ઉપવિટ્ઠં સન્તં વિજ્જમાનં મં. ઉપાગચ્છિ મહાઇસીતિ મહન્તે સીલાદિખન્ધે એસનતો મહાઇસિ. લોકપજ્જોતો લોકપદીપો સિદ્ધત્થો ભગવા ઉપગચ્છિ, મમ સમીપં અગમાસીતિ અત્થો. નિસિન્નસ્સ પણ્ણસન્થરેતિ ઉપગન્ત્વા પણ્ણસન્થરે નિસિન્નસ્સ ખાદનત્થાય સેદિતં પણ્ણં મયા દિન્નન્તિ સમ્બન્ધો.

૫-૭. દુતિયાપદાને સિનેરુસમસન્તોસો ધરણીસમસાદિસો સિદ્ધત્થો ભગવાતિ સમ્બન્ધો. વુટ્ઠહિત્વા સમાધિમ્હાતિ નિરોધસમાપત્તિતો વુટ્ઠહિત્વા વિસું હુત્વાતિ અત્થો. ભિક્ખાય મમુપટ્ઠિતોતિ ભિક્ખાચારવેલાય ‘‘અજ્જ મમ યો કોચિ કિઞ્ચિ દાનં દદાતિ, તસ્સ મહપ્ફલ’’ન્તિ ચિન્તેત્વા નિસિન્નસ્સ મમ સન્તિકં સમીપં ઉપટ્ઠિતો સમીપમાગતોતિ અત્થો. હરીતકં…પે… ફારુસકફલાનિ ચાતિ એવં સબ્બં તં ફલં સબ્બલોકાનુકમ્પિનો તસ્સ સિદ્ધત્થસ્સ મહેસિસ્સ મયા વિપ્પસન્નેન ચેતસા દિન્નન્તિ અત્થો.

૧૧-૧૨. તતિયાપદાને સીહં યથા વનચરન્તિ વને ચરમાનં સીહરાજં ઇવ ચરમાનં સિદ્ધત્થં ભગવન્તન્તિ સમ્બન્ધો. નિસભાજાનિયં યથાતિ વસભો, નિસભો, વિસભો, આસભોતિ ચત્તારો ગવજેટ્ઠકા. તેસુ ગવસતસ્સ જેટ્ઠકો વસભો, ગવસહસ્સસ્સ જેટ્ઠકો નિસભો, ગવસતસહસ્સસ્સ જેટ્ઠકો વિસભો, ગવકોટિસતસહસ્સસ્સ જેટ્ઠકો આસભો. ઇધ પન આસભો ‘‘નિસભો’’તિ વુત્તો, આજાનીયં અભીતં નિચ્ચલં ઉસભરાજં ઇવાતિ અત્થો. કકુધં વિલસન્તંવાતિ પુપ્ફપલ્લવેહિ સોભમાનં કકુધરુક્ખં ઇવ નરાસભં નરાનં આસભં ઉત્તમં આગચ્છન્તં સિદ્ધત્થં ભગવન્તં દિસ્વા સદ્ધાય સમ્પયુત્તત્તા વિપ્પસન્નેન ચેતસા પચ્ચુગ્ગમનં અકાસિન્તિ અત્થો.

ચતુત્થાપદાનાદીનિ દસમાવસાનાનિ સુવિઞ્ઞેય્યાનેવાતિ.

એકૂનતિંસતિમવગ્ગવણ્ણના સમત્તા.