૨૭. પદુમુક્ખિપવગ્ગો

૧-૧૦. આકાસુક્ખિપિયત્થેરઅપદાનાદિવણ્ણના

૧-૨. સત્તવીસતિમે વગ્ગે પઠમાપદાને જલજગ્ગે દુવે ગય્હાતિ જલે ઉદકે જાતે અગ્ગે ઉપ્પલાદયો દ્વે પુપ્ફે ગહેત્વા બુદ્ધસ્સ સમીપં ગન્ત્વા એકં પુપ્ફં પાદેસુ નિક્ખિપિં પૂજેસિં, એકં પુપ્ફં આકાસે ખિપિન્તિ અત્થો.

દુતિયાપદાનં પાકટમેવ.

૧૦. તતિયાપદાને બોધિયા પાદપુત્તમેતિ ઉત્તમે બોધિપાદપે. અડ્ઢચન્દં મયા દિન્નન્તિ તસ્મિં બોધિમૂલે અડ્ઢચન્દાકારેન મયા અનેકપુપ્ફાનિ પૂજિતાનીતિ અત્થો. ધરણીરુહપાદપેતિ રુક્ખપબ્બતરતનાદયો ધારેતીતિ ધરણી, પથવી, ધરણિયા રુહતિ પતિટ્ઠહતીતિ ધરણીરુહો, પાદસઙ્ખાતેન મૂલેન ઉદકં પિવતિ ખન્ધવિટપાદીસુ પત્થરિયતીતિ પાદપો, ધરણીરુહો ચ સો પાદપો ચેતિ ધરણીરુહપાદપો, તસ્મિં ધરણીરુહપાદપે પુપ્ફં મયા પૂજિતન્તિ અત્થો.

ચતુત્થાપદાનં ઉત્તાનત્થમેવ.

૧૮-૧૯. પઞ્ચમાપદાને હિમવન્તસ્સાવિદૂરેતિ હિમવન્તસ્સ આસન્ને. રોમસો નામ પબ્બતોતિ રુક્ખલતાગુમ્બાભાવા કેવલં દબ્બતિણાદિસઞ્છન્નત્તા રોમસો નામ પબ્બતો અહોસિ. તમ્હિ પબ્બતપાદમ્હીતિ તસ્મિં પબ્બતપરિયન્તે. સમણો ભાવિતિન્દ્રિયોતિ સમિતપાપો વૂપસન્તકિલેસો સમણો વડ્ઢિતઇન્દ્રિયો, રક્ખિતચક્ખુન્દ્રિયાદિઇન્દ્રિયોતિ અત્થો. અથ વા વડ્ઢિતઇન્દ્રિયો વડ્ઢિતસદ્ધિન્દ્રિયાદિઇન્દ્રિયોતિ અત્થો. તસ્સ સમણસ્સ અહં બિળાલિઆલુવે ગહેત્વા અદાસિન્તિ અત્થો.

છટ્ઠસત્તમટ્ઠમનવમદસમાપદાનાનિ ઉત્તાનત્થાનેવાતિ.

સત્તવીસતિમવગ્ગવણ્ણના સમત્તા.