૧-૧૦. તમાલપુપ્ફિયત્થેરઅપદાનાદિવણ્ણના

વીસતિમે વગ્ગે પઠમત્થેરાપદાનં ઉત્તાનમેવ.

૬. દુતિયત્થેરાપદાને યં દાયવાસિકો ઇસીતિ ઇસિપબ્બજ્જં પબ્બજિત્વા વને વસનભાવેન દાયવાસિકો ઇસીતિ સઙ્ખં ગતો, અત્તનો અનુકમ્પાય તં વનં ઉપગતસ્સ સિદ્ધત્થસ્સ સત્થુનો વસનમણ્ડપચ્છાદનત્થાય યં તિણં, તં લાયતિ છિન્દતીતિ અત્થો. દબ્બછદનં કત્વા અનેકેહિ ખુદ્દકદણ્ડકેહિ મણ્ડપં કત્વા તં તિણેન છાદેત્વા સિદ્ધત્થસ્સ ભગવતો અહં અદાસિં પૂજેસિન્તિ અત્થો.

૮. સત્તાહં ધારયું તત્થાતિ તં મણ્ડપં તત્થ ઠિતા દેવમનુસ્સા સત્તાહં નિરોધસમાપત્તિં સમાપજ્જિત્વા નિસિન્નસ્સ સત્થુનો ધારયું ધારેસુન્તિ અત્થો. સેસં ઉત્તાનત્થમેવાતિ.

તતિયત્થેરસ્સ અપદાને ખણ્ડફુલ્લિયત્થેરોતિ એત્થ ખણ્ડન્તિ કટ્ઠાનં જિણ્ણત્તા છિન્નભિન્નટ્ઠાનં, ફુલ્લન્તિ કટ્ઠાનં જિણ્ણટ્ઠાને કણ્ણકિતમહિચ્છત્તકાદિપુપ્ફનં, ખણ્ડઞ્ચ ફુલ્લઞ્ચ ખણ્ડફુલ્લાનિ, ખણ્ડફુલ્લાનં પટિસઙ્ખરણં પુનપ્પુનં થિરકરણન્તિ ખણ્ડફુલ્લપટિસઙ્ખરણં. ઇમસ્સ પન થેરસ્સ સમ્ભારપૂરણકાલે ફુસ્સસ્સ ભગવતો ચેતિયે છિન્નભિન્નટ્ઠાને સુધાપિણ્ડં મક્ખેત્વા થિરકરણં ખણ્ડફુલ્લપટિસઙ્ખરણં નામ. તસ્મા સો ખણ્ડફુલ્લિયો થેરોતિ પાકટો અહોસિ. તતિયં.

૧૭. ચતુત્થત્થેરસ્સાપદાને રઞ્ઞો બદ્ધચરો અહન્તિ રઞ્ઞો પરિચારકો કમ્મકારકો અહોસિન્તિ અત્થો.

૧૯. જલજુત્તમનામિનોતિ જલે ઉદકે જાતં જલજં, કિં તં પદુમં, પદુમેન સમાનનામત્તા પદુમુત્તરસ્સ ભગવતોતિ અત્થો. ઉત્તમપદુમનામસ્સ ભગવતોતિ વા અત્થો. ચતુત્થં.

પઞ્ચમં ઉત્તાનત્થમેવ.

૨૮. છટ્ઠે નગરે દ્વારવતિયાતિ મહાદ્વારવાતપાનકવાટફલકાહિ વતિપાકારટ્ટાલગોપુરકદ્દમોદકપરિખાહિ ચ સમ્પન્નં નગરન્તિ દ્વારવતીનગરં, દ્વારં વતિઞ્ચ પધાનં કત્વા નગરસ્સ ઉપલક્ખિતત્તા ‘‘દ્વારવતી નગર’’ન્તિ વોહરન્તીતિ નગરે દ્વારવતિયાતિ વુત્તં. માલાવચ્છો પુપ્ફારામો મમ અહોસીતિ અત્થો.

૩૧. તે કિસલયાતિ તે અસોકપલ્લવા. છટ્ઠં.

સત્તમટ્ઠમનવમાનિ ઉત્તાનત્થાનેવ. દસમેપિ અપુબ્બં નત્થીતિ.

વીસતિમવણ્ણના સમત્તા.