૩. પઞ્હાપુચ્છકવણ્ણના

૪૬૨. પઞ્હાપુચ્છકે પાળિઅનુસારેનેવ ઇદ્ધિપાદાનં કુસલાદિભાવો વેદિતબ્બો. આરમ્મણત્તિકેસુ પન સબ્બેપેતે અપ્પમાણં નિબ્બાનં આરબ્ભ પવત્તિતો અપ્પમાણારમ્મણા એવ, ન મગ્ગારમ્મણા; સહજાતહેતુવસેન પન મગ્ગહેતુકા, ન મગ્ગાધિપતિનો. ચત્તારો હિ અધિપતયો અઞ્ઞમઞ્ઞં ગરું ન કરોન્તિ. કસ્મા? સયં જેટ્ઠકત્તા. યથા હિ સમજાતિકા સમવયા સમથામા સમસિપ્પા ચત્તારો રાજપુત્તા અત્તનો અત્તનો જેટ્ઠકતાય અઞ્ઞમઞ્ઞસ્સ અપચિતિં ન કરોન્તિ, એવમિમેપિ ચત્તારો અધિપતયો પાટિયેક્કં પાટિયેક્કં જેટ્ઠકધમ્મતાય અઞ્ઞમઞ્ઞં ગરું ન કરોન્તીતિ એકન્તેનેવ ન મગ્ગાધિપતિનો. અતીતાદીસુ એકારમ્મણભાવેપિ ન વત્તબ્બા. નિબ્બાનસ્સ પન બહિદ્ધાધમ્મત્તા બહિદ્ધારમ્મણા નામ હોન્તીતિ. એવમેતસ્મિં પઞ્હાપુચ્છકે નિબ્બત્તિતલોકુત્તરાવ ઇદ્ધિપાદા કથિતા. સમ્માસમ્બુદ્ધેન હિ સુત્તન્તભાજનીયસ્મિંયેવ લોકિયલોકુત્તરમિસ્સકા ઇદ્ધિપાદા કથિતા, અભિધમ્મભાજનીયપઞ્હાપુચ્છકેસુ પન લોકુત્તરાયેવાતિ. એવમયં ઇદ્ધિપાદવિભઙ્ગોપિ તેપરિવટ્ટં નીહરિત્વાવ દસ્સિતોતિ.

સમ્મોહવિનોદનિયા વિભઙ્ગટ્ઠકથાય

ઇદ્ધિપાદવિભઙ્ગવણ્ણના નિટ્ઠિતા.