૭. અભિઞ્ઞેય્યાદિવારવણ્ણના

૧૦૩૦. સત્તમવારે સલક્ખણપરિગ્ગાહિકાય અભિઞ્ઞાય વસેન અભિઞ્ઞેય્યતા વેદિતબ્બા. ઞાતતીરણપહાનપરિઞ્ઞાનં વસેન પરિઞ્ઞેય્યતા. સા ચ રૂપક્ખન્ધો અભિઞ્ઞેય્યો પરિઞ્ઞેય્યો ન પહાતબ્બોતિઆદીસુ ઞાતતીરણપરિઞ્ઞાવસેનેવ વેદિતબ્બા. સમુદયસચ્ચં અભિઞ્ઞેય્યં પરિઞ્ઞેય્યં પહાતબ્બન્તિઆદીસુ પહાનપરિઞ્ઞાવસેન.

અટ્ઠમવારે રૂપાદિઆરમ્મણાનં ચક્ખુવિઞ્ઞાણાદીનં વસેન સારમ્મણાનારમ્મણતા વેદિતબ્બા. નવમવારો ઉત્તાનત્થોયેવ. દસમવારેપિ યં વત્તબ્બં સિયા તં સબ્બં તત્થ તત્થ પઞ્હાપુચ્છકવારે વુત્તમેવાતિ.

સમ્મોહવિનોદનિયા વિભઙ્ગટ્ઠકથાય

ધમ્મહદયવિભઙ્ગવણ્ણના નિટ્ઠિતા.

નિગમનકથા

એત્તાવતા ચ –

અભિધમ્મં દેસેન્તો, ધમ્મગરુ ધમ્મગારવયુત્તાનં;

દેવાનં દેવપુરે, દેવગણસહસ્સપરિવારો.

દુતિયં અદુતિયપુરિસો, યં આહ વિભઙ્ગપકરણં નાથો;

અટ્ઠારસહિ વિભઙ્ગેહિ, મણ્ડિતમણ્ડપેય્યગુણો.

અત્થપ્પકાસનત્થં, તસ્સાહં યાચિતો ઠિતગુણેન;

યતિના અદન્ધગતિના, સુબુદ્ધિના બુદ્ધઘોસેન.

યં આરભિં રચયિતું, અટ્ઠકથં સુનિપુણેસુ અત્થેસુ;

સમ્મોહવિનોદનતો, સમ્મોહવિનોદનિં નામ.

પોરાણટ્ઠકથાનં, સારં આદાય સા અયં નિટ્ઠં;

પત્તા અનન્તરાયેન, પાળિયા ભાણવારેહિ.

ચત્તાલીસાય યથા, એકેન ચ એવમેવ સબ્બેપિ;

નિટ્ઠં વજન્તુ વિમલા, મનોરથા સબ્બસત્તાનં.

સદ્ધમ્મસ્સ ઠિતત્થં, યઞ્ચ ઇમં રચયતા મયા પુઞ્ઞં;

પત્તં તેન સમત્તં, પાપુણતુ સદેવકો લોકો.

સુચિરં તિટ્ઠતુ ધમ્મો, ધમ્માભિરતો સદા ભવતુ લોકો;

નિચ્ચં ખેમસુભિક્ખાદિ-સમ્પદા જનપદા હોન્તૂતિ.

પરમવિસુદ્ધસદ્ધાબુદ્ધિવીરિયપટિમણ્ડિતેન સીલાચારજ્જવમદ્દવાદિગુણસમુદયસમુદિતેન સકસમયસમયન્તરગહનજ્ઝોગાહણસમત્થેન પઞ્ઞાવેય્યત્તિયસમન્નાગતેન તિપિટકપરિયત્તિપ્પભેદે સાટ્ઠકથે સત્થુસાસને અપ્પટિહતઞાણપ્પભાવેન મહાવેય્યાકરણેન કરણસમ્પત્તિજનિતસુખવિનિગ્ગતમધુરોદારવચનલાવણ્ણયુત્તેન યુત્તમુત્તવાદિના વાદીવરેન મહાકવિના પભિન્નપટિસમ્ભિદાપરિવારે છળભિઞ્ઞાપટિસમ્ભિદાદિપ્પભેદગુણપટિમણ્ડિતે ઉત્તરિમનુસ્સધમ્મે સુપ્પતિટ્ઠિતબુદ્ધીનં થેરવંસપ્પદીપાનં થેરાનં મહાવિહારવાસીનં વંસાલઙ્કારભૂતેન વિપુલવિસુદ્ધબુદ્ધિના બુદ્ધઘોસોતિ ગરૂહિ ગહિતનામધેય્યેન થેરેન કતા અયં સમ્મોહવિનોદની નામ વિભઙ્ગટ્ઠકથા.

તાવ તિટ્ઠતુ લોકસ્મિં, લોકનિત્થરણેસિનં;

દસ્સેન્તી કુલપુત્તાનં, નયં પઞ્ઞાવિસુદ્ધિયા.

યાવ બુદ્ધોતિ નામમ્પિ, સુદ્ધચિત્તસ્સ તાદિનો;

લોકમ્હિ લોકજેટ્ઠસ્સ, પવત્તતિ મહેસિનોતિ.

સમ્મોહવિનોદની નામ વિભઙ્ગ-અટ્ઠકથા નિટ્ઠિતા.