(૭.) સત્તકનિદ્દેસવણ્ણના

૯૪૯. સત્તકનિદ્દેસે થામગતટ્ઠેન અપ્પહીનટ્ઠેન ચ અનુસેન્તીતિ અનુસયા. વટ્ટસ્મિં સત્તે સંયોજેન્તિ ઘટેન્તીતિ સંયોજનાનિ. સમુદાચારવસેન પરિયુટ્ઠહન્તીતિ પરિયુટ્ઠાનાનિ. કામરાગોવ પરિયુટ્ઠાનં કામરાગપરિયુટ્ઠાનં. સેસેસુપિ એસેવ નયો.

૯૫૦. અસતં ધમ્મા, લામકટ્ઠેન વા અસન્તા ધમ્માતિ અસદ્ધમ્મા. રાગાદીહિ દોસેહિ દુટ્ઠાનિ ચરિતાનીતિ દુચ્ચરિતાનિ. તેન તેનાકારેન મઞ્ઞન્તીતિ માના.

૯૫૧. દિટ્ઠિનિદ્દેસે રૂપીતિ રૂપવા. ચાતુમહાભૂતિકોતિ ચતુમહાભૂતમયો. માતાપિતૂનં એતન્તિ માતાપેત્તિકં. કિન્તં? સુક્કસોણિતં. માતાપેત્તિકે સમ્ભૂતો જાતોતિ માતાપેત્તિકસમ્ભવો. ઇધ રૂપકાયસીસેન મનુસ્સત્તભાવં અત્તાતિ વદતિ. દુતિયો તં પટિક્ખિપિત્વા દિબ્બત્તભાવં વદતિ. દિબ્બોતિ દેવલોકે સમ્ભૂતો. કામાવચરોતિ છકામાવચરદેવપરિયાપન્નો. કબળીકારં ભક્ખયતીતિ કબળીકારભક્ખો. મનોમયોતિ ઝાનમનેન નિબ્બત્તો. સબ્બઙ્ગપચ્ચઙ્ગીતિ સબ્બઙ્ગપચ્ચઙ્ગયુત્તો. અહીનિન્દ્રિયોતિ પરિપુણ્ણિન્દ્રિયો; યાનિ બ્રહ્મલોકે અત્થિ તેસં વસેન, ઇતરેસઞ્ચ સણ્ઠાનવસેનેતં વુત્તં. આકાસાનઞ્ચાયતનૂપગોતિ આકાસાનઞ્ચાયતનભાવં ઉપગતો. ઇતરેસુપિ એસેવ નયો. સેસં સબ્બત્થ ઉત્તાનત્થમેવાતિ.

સત્તકનિદ્દેસવણ્ણના.