૧. પણ્ણત્તિનિદ્દેસવારવણ્ણના

૨૬. ઇદાનિ રૂપં રૂપક્ખન્ધોતિઆદિના નયેન નિદ્દેસવારો આરદ્ધો. તત્થ રૂપં રૂપક્ખન્ધોતિ યંકિઞ્ચિ રૂપન્તિ વુચ્ચતિ. સબ્બં તં રૂપં રૂપક્ખન્ધોતિ વચનસોધનત્થં પુચ્છતિ. પિયરૂપં સાતરૂપં, રૂપં, ન રૂપક્ખન્ધોતિ યં ‘પિયરૂપં સાતરૂપ’ન્તિ એત્થ રૂપન્તિ વુત્તં, તં રૂપમેવ, ન રૂપક્ખન્ધોતિ અત્થો. રૂપક્ખન્ધો રૂપઞ્ચેવ રૂપક્ખન્ધો ચાતિ યો પન રૂપક્ખન્ધો, સો રૂપન્તિપિ રૂપક્ખન્ધોતિપિ વત્તું વટ્ટતીતિ અત્થો. રૂપક્ખન્ધો રૂપન્તિ એત્થ પન યસ્મા રૂપક્ખન્ધો નિયમેનેવ રૂપન્તિ વત્તબ્બો. તસ્મા આમન્તાતિ આહ. ઇમિના ઉપાયેન સબ્બવિસ્સજ્જનેસુ અત્થો વેદિતબ્બો. યો પન યત્થ વિસેસો ભવિસ્સતિ, તથેવ તં વણ્ણયિસ્સામ. સઞ્ઞાયમકે તાવ દિટ્ઠિસઞ્ઞાતિ ‘પપઞ્ચસઞ્ઞા’તિઆદીસુ આગતા દિટ્ઠિસઞ્ઞા. સઙ્ખારયમકે અવસેસા સઙ્ખારાતિ ‘અનિચ્ચા વત સઙ્ખારા’તિઆદીસુ આગતા સઙ્ખારક્ખન્ધતો અવસેસા સઙ્ખતધમ્મા. પટિલોમવારેપિ એસેવ નયોતિ.

પદસોધનવારો નિટ્ઠિતો.

૨૮. પદસોધનમૂલચક્કવારે ખન્ધા વેદનાક્ખન્ધોતિ યેકેચિ ખન્ધા, સબ્બે તે વેદનાક્ખન્ધોતિ પુચ્છતિ. સેસપુચ્છાસુપિ એસેવ નયો. પટિલોમે ન ખન્ધા ન વેદનાક્ખન્ધોતિ એત્થ યે પઞ્ઞત્તિનિબ્બાનસઙ્ખાતા ધમ્મા ખન્ધા ન હોન્તિ, તે યસ્મા વેદનાક્ખન્ધોપિ ન હોન્તિ, તસ્મા આમન્તાતિ આહ. સેસવિસ્સજ્જનેસુપિ એસેવ નયોતિ.

પદસોધનમૂલચક્કવારો નિટ્ઠિતો.

૩૮. સુદ્ધખન્ધવારે રૂપં ખન્ધોતિ યંકિઞ્ચિ રૂપન્તિ વુત્તં, સબ્બં તં ખન્ધોતિ પુચ્છતિ. તત્થ યસ્મા પિયરૂપસાતરૂપસઙ્ખાતં વા રૂપં હોતુ, ભૂતુપાદારૂપં વા, સબ્બં પઞ્ચસુ ખન્ધેસુ સઙ્ગહં ગચ્છતેવ. તસ્મા આમન્તાતિ પટિજાનાતિ. દુતિયપદે ‘ખન્ધા રૂપ’ન્તિ પુચ્છિતબ્બે યસ્મા રૂપન્તિવચનેન રૂપક્ખન્ધોવ અધિપ્પેતો, તસ્મા વચનં અનાદિયિત્વા અત્થવસેન પુચ્છન્તો ખન્ધા રૂપક્ખન્ધોતિ આહ. ઇમિના નયેન સબ્બપદેસુ અત્થો વેદિતબ્બો. પરતો આયતનયમકાદીનં નિદ્દેસવારેપિ એસેવ નયો. સઞ્ઞા ખન્ધોતિ એત્થાપિ દિટ્ઠિસઞ્ઞા વા હોતુ, સઞ્ઞા એવ વા, સબ્બાયપિ ખન્ધભાવતો આમન્તાતિ વુત્તં. સઙ્ખારા ખન્ધોતિ પદેપિ એસેવ નયો. ખન્ધવિનિમુત્તકો હિ સઙ્ખારો નામ નત્થિ.

૩૯. પટિલોમે ન રૂપં ન ખન્ધોતિ યં ધમ્મજાતં રૂપં ન હોતિ, તં ખન્ધોપિ ન હોતીતિ પુચ્છતિ. વિસ્સજ્જને પનસ્સ રૂપં ઠપેત્વા અવસેસા ખન્ધા ન રૂપં, ખન્ધાતિ રૂપતો અઞ્ઞે વેદનાદયો ખન્ધા રૂપમેવ ન હોન્તિ, ખન્ધા પન હોન્તીતિ અત્થો. રૂપઞ્ચ ખન્ધે ચ ઠપેત્વા અવસેસાતિ પઞ્ચક્ખન્ધવિનિમુત્તં નિબ્બાનઞ્ચેવ પઞ્ઞત્તિ ચ. ઇતો પરેસુપિ ‘અવસેસા’તિ પદેસુ એસેવ નયોતિ.

સુદ્ધખન્ધવારો નિટ્ઠિતો.

૪૦-૪૪. સુદ્ધખન્ધમૂલચક્કવારે રૂપં ખન્ધોતિઆદીનં હેટ્ઠા વુત્તનયેનેવ અત્થો વેદિતબ્બોતિ.

સુદ્ધખન્ધમૂલચક્કવારો નિટ્ઠિતો.

પણ્ણત્તિનિદ્દેસવારવણ્ણના.