૧. સમ્બાધસુત્તવણ્ણના

૪૨. પઞ્ચમસ્સ પઠમે ઉદાયીતિ કાળુદાયિત્થેરો. અવિદ્વાતિ અઞ્ઞાસિ. ભૂરિમેધસોતિ મહાપઞ્ઞો. યો ઝાનમબુજ્ઝીતિ યો ઝાનં અબુજ્ઝિ. પટિલીનનિસભોતિ એકીભાવવસેન પટિલીનો ચેવ ઉત્તમટ્ઠેન ચ નિસભો. મુનીતિ બુદ્ધમુનિ. પરિયાયેનાતિ એકેન કારણેન. કામસમ્બાધસ્સ હિ અભાવમત્તેનેવ પઠમજ્ઝાનં ઓકાસાધિગમો નામ, ન સબ્બથા સબ્બં. તત્રાપત્થિ સમ્બાધોતિ તસ્મિમ્પિ પઠમજ્ઝાને સમ્બાધો પટિપીળનં અત્થિયેવ. તત્રાપિત્થીતિપિ પાઠો. કિઞ્ચ તત્થ સમ્બાધોતિ તસ્મિં પન ઝાને કિં સમ્બાધો નામ. અયમેત્થ સમ્બાધોતિ અયં વિતક્કવિચારાનં અનિરુદ્ધભાવો સમ્બાધો સંપીળા નામ. ઇમિના ઉપાયેન સબ્બવારેસુ અત્થો વેદિતબ્બો. નિપ્પરિયાયેનાતિ ન એકેન કારણેન, અથ ખો આસવક્ખયો નામ સબ્બસમ્બાધાનં પહીનત્તા સબ્બેન સબ્બં ઓકાસાધિગમો નામાતિ.