૪. ગાવીઉપમાસુત્તવણ્ણના

૩૫. ચતુત્થે પબ્બતેય્યાતિ પબ્બતચારિની. ન સુપ્પતિટ્ઠિતં પતિટ્ઠાપેત્વાતિ યથા સુપ્પતિટ્ઠિતા હોતિ, એવં ન પતિટ્ઠાપેત્વા. તં નિમિત્તન્તિ તં પઠમજ્ઝાનસઙ્ખાતં નિમિત્તં. ન સ્વાધિટ્ઠિતં અધિટ્ઠાતીતિ યથા સુટ્ઠુ અધિટ્ઠિતં હોતિ, ન એવં અધિટ્ઠાતિ. અનભિહિંસમાનોતિ અપોથેન્તો અવિહેઠેન્તો. મુદુ ચિત્તં હોતિ કમ્મઞ્ઞન્તિ યથા વિપસ્સનાચિત્તં લોકુત્તરમગ્ગક્ખણે મુદુ કમ્મક્ખમં કમ્મયોગ્ગં હોતિ, એવમસ્સ અભિઞ્ઞાપાદકં ચતુત્થજ્ઝાનચિત્તં મુદુ હોતિ કમ્મઞ્ઞં. અપ્પમાણો સમાધીતિ ચતુબ્રહ્મવિહારસમાધિપિ મગ્ગફલસમાધિપિ અપ્પમાણો સમાધિ નામ, ઇધ પન ‘‘અપ્પમાણં અપ્પમાણારમ્મણ’’ન્તિ ઇમિના પરિયાયેન સુપ્પગુણસમાધિ અપ્પમાણસમાધીતિ દટ્ઠબ્બો. સો અપ્પમાણેન સમાધિના સુભાવિતેનાતિ ઇમસ્મિં ઠાને અયં ભિક્ખુ વિપસ્સનં વડ્ઢેત્વા અરહત્તં પત્તો. ઇદાનિ ખીણાસવસ્સ અભિઞ્ઞાપટિપાટિં દસ્સેન્તો યસ્સ યસ્સ ચાતિઆદિમાહ.