૬. સિલાયૂપસુત્તવણ્ણના

૨૬. છટ્ઠે ચન્દિકાપુત્તોતિ માતુ નામવસેન પઞ્ઞાતો ચન્દિકાપુત્તત્થેરો. ચેતસા ચિત્તં હોતીતિ ચિત્તવારપરિયાયેન ચિત્તવારપરિયાયો ચિતો વડ્ઢિતો હોતિ. ચેતસા ચિત્તં સુપરિચિતન્તિ ચિત્તવારપરિયાયેન ચિત્તવારપરિયાયો ઉપરૂપરિ સુચિતો સુવડ્ઢિતો હોતિ. નેવસ્સ ચિત્તં પરિયાદિયન્તીતિ તાનિ આરમ્મણાનિ તસ્સ ખીણાસવસ્સ ચિત્તુપ્પાદં ગહેત્વા ખેપેત્વા ઠાતું ન સક્કોન્તિ. અમિસ્સીકતન્તિ તાનિ આરમ્મણાનિ અનલ્લીનત્તા તેહિ અમિસ્સીકતં. આનેઞ્જપ્પત્તન્તિ અનિઞ્જનભાવં નિપ્ફન્દનભાવં પત્તં.

સિલાયૂપોતિ સિલાથમ્ભો. સોળસકુક્કુકોતિ દીઘતો સોળસહત્થો. હેટ્ઠાનેમઙ્ગમાતિ આવાટસ્સ હેટ્ઠાગતા. ઉપરિ નેમસ્સાતિ ઉપરિ આવાટસ્સ. સુનિખાતત્તાતિ અયમુસલેહિ કોટ્ટેત્વા કોટ્ટેત્વા સુટ્ઠુ નિખાતત્તા. એવમેવ ખોતિ એત્થ સિલાયૂપો વિય ખીણાસવો દટ્ઠબ્બો, મહાવાતા વિય છસુ દ્વારેસુ ઉપ્પજ્જનકા કિલેસા, ચતૂહિ દિસાહિ આગન્ત્વા વાતાનં સિલાયૂપં ચાલેતું અસમત્થભાવો વિય છસુ દ્વારેસુ ઉપ્પજ્જનકકિલેસાનં ખીણાસવસ્સ ચિત્તં ચાલેતું અસમત્થભાવો વેદિતબ્બો. ઇમસ્મિમ્પિ સુત્તે ખીણાસવોવ કથિતો.