૩. પતોદસુત્તવણ્ણના

૧૧૩. તતિયે પતોદચ્છાયન્તિ વિજ્ઝનત્થં ઉક્ખિત્તસ્સ પતોદસ્સ છાયં. સંવિજ્જતીતિ ‘‘જવો મે ગહેતબ્બો’’તિ સલ્લક્ખણવસેન સંવિજ્જતિ. સંવેગં આપજ્જતીતિ સંવેગં પટિપજ્જતિ લોમવેધવિદ્ધોતિ લોમકૂપે પતોદવેધેન વિદ્ધમત્તો. ચમ્મવેધવિદ્ધોતિ છવિચમ્મં છિન્દન્તેન પતોદવેધેન વિદ્ધો. અટ્ઠિવેધવિદ્ધોતિ અટ્ઠિં ભિન્દન્તેન વેધેન વિદ્ધો. કાયેનાતિ નામકાયેન. પરમસચ્ચન્તિ નિબ્બાનં. સચ્છિકરોતીતિ પસ્સતિ. પઞ્ઞાયાતિ સહવિપસ્સનાય મગ્ગપઞ્ઞાય.