(૯) ૪. ધમ્મવગ્ગવણ્ણના

૮૮. ચતુત્થસ્સ પઠમે ચેતોવિમુત્તીતિ ફલસમાધિ. પઞ્ઞાવિમુત્તીતિ ફલપઞ્ઞા.

૮૯. દુતિયે પગ્ગાહોતિ વીરિયં. અવિક્ખેપોતિ ચિત્તેકગ્ગતા.

૯૦. તતિયે નામન્તિ ચત્તારો અરૂપક્ખન્ધા. રૂપન્તિ રૂપક્ખન્ધો. ઇતિ ઇમસ્મિં સુત્તે ધમ્મકોટ્ઠાસપરિચ્છેદઞાણં નામ કથિતં.

૯૧. ચતુત્થે વિજ્જાતિ ફલઞાણં. વિમુત્તીતિ તંસમ્પયુત્તા સેસધમ્મા.

૯૨. પઞ્ચમે ભવદિટ્ઠીતિ સસ્સતદિટ્ઠિ. વિભવદિટ્ઠીતિ ઉચ્છેદદિટ્ઠિ. છટ્ઠસત્તમાનિ ઉત્તાનત્થાનેવ.

૯૫. અટ્ઠમે દોવચસ્સતાતિ દુબ્બચભાવો. પાપમિત્તતાતિ પાપમિત્તસેવનભાવો. નવમં વુત્તવિપરિયાયેન વેદિતબ્બં.

૯૭. દસમે ધાતુકુસલતાતિ અટ્ઠારસ ધાતુયો ધાતૂતિ જાનનં. મનસિકારકુસલતાતિ તાસંયેવ ધાતૂનં અનિચ્ચાદિવસેન લક્ખણત્તયં આરોપેત્વા જાનનં.

૯૮. એકાદસમે આપત્તિકુસલતાતિ પઞ્ચન્નઞ્ચ સત્તન્નઞ્ચ આપત્તિક્ખન્ધાનં જાનનં. આપત્તિવુટ્ઠાનકુસલતાતિ દેસનાય વા કમ્મવાચાય વા આપત્તીહિ વુટ્ઠાનજાનનન્તિ.

ધમ્મવગ્ગો ચતુત્થો.