૬. નિજ્જરસુત્તવણ્ણના

૧૦૬. છટ્ઠે નિજ્જરવત્થૂનીતિ નિજ્જરકારણાનિ. મિચ્છાદિટ્ઠિ નિજ્જિણ્ણા હોતીતિ અયં હેટ્ઠા વિપસ્સનાયપિ નિજ્જિણ્ણા એવ પહીના. કસ્મા પુન ગહિતાતિ? અસમુચ્છિન્નત્તા. વિપસ્સનાય હિ કિઞ્ચાપિ નિજ્જિણ્ણા, ન પન સમુચ્છિન્ના. મગ્ગો પન ઉપ્પજ્જિત્વા તં સમુચ્છિન્દતિ, ન પુન વુટ્ઠાતું દેતિ. તસ્મા પુન ગહિતા. એવં સબ્બપદેસુ યોજેતબ્બો. એત્થ ચ સમ્માવિમુત્તિપચ્ચયા ચતુસટ્ઠિ ધમ્મા ભાવનાપારિપૂરિં ગચ્છન્તિ. કતમે ચતુસટ્ઠિ? સોતાપત્તિમગ્ગક્ખણે અધિમોક્ખટ્ઠેન સદ્ધિન્દ્રિયં પરિપૂરતિ, પગ્ગહટ્ઠેન વીરિયિન્દ્રિયં, ઉપટ્ઠાનટ્ઠેન સતિન્દ્રિયં, અવિક્ખેપટ્ઠેન સમાધિન્દ્રિયં, દસ્સનટ્ઠેન પઞ્ઞિન્દ્રિયં પરિપૂરેતિ, વિજાનનટ્ઠેન મનિન્દ્રિયં, અભિનન્દનટ્ઠેન સોમનસ્સિન્દ્રિયં, પવત્તસન્તતિઆધિપતેય્યટ્ઠેન જીવિતિન્દ્રિયં પરિપૂરતિ…પે… અરહત્તફલક્ખણે અધિમોક્ખટ્ઠેન સદ્ધિન્દ્રિયં…પે… પવત્તસન્તતિઆધિપતેય્યટ્ઠેન જીવિતિન્દ્રિયં પરિપૂરતીતિ એવં ચતૂસુ ચ મગ્ગેસુ ચતૂસુ ચ ફલેસુ અટ્ઠટ્ઠ હુત્વા ચતુસટ્ઠિ ધમ્મા પારિપૂરિં ગચ્છન્તિ.