૧૦. ગિરિમાનન્દસુત્તવણ્ણના
૬૦. દસમે અનુકમ્પં ઉપાદાયાતિ ગિરિમાનન્દત્થેરે અનુકમ્પં પટિચ્ચ. ચક્ખુરોગોતિઆદયો વત્થુવસેન વેદિતબ્બા. નિબ્બત્તિતપ્પસાદાનઞ્હિ રોગો નામ નત્થિ. કણ્ણરોગોતિ બહિકણ્ણે રોગો. પિનાસોતિ બહિનાસિકાય રોગો. નખસાતિ નખેહિ વિલેખિતટ્ઠાને રોગો. પિત્તસમુટ્ઠાનાતિ પિત્તસમુટ્ઠિતા. તે કિર દ્વત્તિંસ હોન્તિ. સેમ્હસમુટ્ઠાનાદીસુપિ એસેવ નયો. ઉતુપરિણામજાતિ ઉતુપરિણામેન અચ્ચુણ્હાતિસીતેન ઉપ્પજ્જનકરોગા. વિસમપરિહારજાતિ અતિચિરટ્ઠાનનિસજ્જાદિના વિસમપરિહારેન જાતા. ઓપક્કમિકાતિ વધબન્ધનાદિના ઉપક્કમેન જાતા. કમ્મવિપાકજાતિ બલવકમ્મવિપાકસમ્ભૂતા. સન્તન્તિ રાગાદિસન્તતાય સન્તં. અતપ્પકટ્ઠેન પણીતં. સેસં સબ્બત્થ ઉત્તાનત્થમેવાતિ.
સચિત્તવગ્ગો પઠમો.