(૪) પચ્ચુપ્પન્નાતીતવારો

(ક) અનુલોમપુગ્ગલો

૧૨૨. (ક) યસ્સ રૂપક્ખન્ધો નિરુજ્ઝતિ તસ્સ વેદનાક્ખન્ધો નિરુજ્ઝિત્થાતિ? આમન્તા.

(ખ) યસ્સ વા પન વેદનાક્ખન્ધો નિરુજ્ઝિત્થ તસ્સ રૂપક્ખન્ધો નિરુજ્ઝતીતિ?

સબ્બેસં ઉપપજ્જન્તાનં અરૂપા ચવન્તાનં તેસં વેદનાક્ખન્ધો નિરુજ્ઝિત્થ, નો ચ તેસં રૂપક્ખન્ધો નિરુજ્ઝતિ. પઞ્ચવોકારા ચવન્તાનં અસઞ્ઞસત્તા ચવન્તાનં તેસં વેદનાક્ખન્ધો ચ નિરુજ્ઝિત્થ રૂપક્ખન્ધો ચ નિરુજ્ઝતિ.

૧૨૩. (ક) યસ્સ વેદનાક્ખન્ધો નિરુજ્ઝતિ તસ્સ સઞ્ઞાક્ખન્ધો નિરુજ્ઝિત્થાતિ? આમન્તા.

(ખ) યસ્સ વા પન સઞ્ઞાક્ખન્ધો નિરુજ્ઝિત્થ તસ્સ વેદનાક્ખન્ધો નિરુજ્ઝતીતિ?

સબ્બેસં ઉપપજ્જન્તાનં અસઞ્ઞસત્તા ચવન્તાનં તેસં સઞ્ઞાક્ખન્ધો નિરુજ્ઝિત્થ, નો ચ તેસં વેદનાક્ખન્ધો નિરુજ્ઝતિ. ચતુવોકારા પઞ્ચવોકારા ચવન્તાનં તેસં સઞ્ઞાક્ખન્ધો ચ નિરુજ્ઝિત્થ વેદનાક્ખન્ધો ચ નિરુજ્ઝતિ.

(ખ) અનુલોમઓકાસો

૧૨૪. (ક) યત્થ રૂપક્ખન્ધો નિરુજ્ઝતિ તત્થ વેદનાક્ખન્ધો નિરુજ્ઝિત્થાતિ?

અસઞ્ઞસત્તે તત્થ રૂપક્ખન્ધો નિરુજ્ઝતિ, નો ચ તત્થ વેદનાક્ખન્ધો નિરુજ્ઝિત્થ. પઞ્ચવોકારે તત્થ રૂપક્ખન્ધો ચ નિરુજ્ઝતિ વેદનાક્ખન્ધો ચ નિરુજ્ઝિત્થ.

(ખ) યત્થ વા પન વેદનાક્ખન્ધો નિરુજ્ઝિત્થ તત્થ રૂપક્ખન્ધો નિરુજ્ઝતીતિ?

અરૂપે તત્થ વેદનાક્ખન્ધો નિરુજ્ઝિત્થ, નો ચ તત્થ રૂપક્ખન્ધો નિરુજ્ઝતિ. પઞ્ચવોકારે તત્થ વેદનાક્ખન્ધો ચ નિરુજ્ઝિત્થ રૂપક્ખન્ધો ચ નિરુજ્ઝતિ.

૧૨૫. (ક) યત્થ વેદનાક્ખન્ધો નિરુજ્ઝતિ તત્થ સઞ્ઞાક્ખન્ધો નિરુજ્ઝિત્થાતિ? આમન્તા.

(ખ) યત્થ વા પન સઞ્ઞાક્ખન્ધો નિરુજ્ઝિત્થ તત્થ વેદનાક્ખન્ધો નિરુજ્ઝતીતિ? આમન્તા.

(ગ) અનુલોમપુગ્ગલોકાસા

૧૨૬. (ક) યસ્સ યત્થ રૂપક્ખન્ધો નિરુજ્ઝતિ તસ્સ તત્થ વેદનાક્ખન્ધો નિરુજ્ઝિત્થાતિ?

સુદ્ધાવાસે પરિનિબ્બન્તાનં અસઞ્ઞસત્તા ચવન્તાનં તેસં તત્થ રૂપક્ખન્ધો નિરુજ્ઝતિ, નો ચ તેસં તત્થ વેદનાક્ખન્ધો નિરુજ્ઝિત્થ. ઇતરેસં પઞ્ચવોકારા ચવન્તાનં તેસં તત્થ રૂપક્ખન્ધો ચ નિરુજ્ઝતિ વેદનાક્ખન્ધો ચ નિરુજ્ઝિત્થ.

(ખ) યસ્સ વા પન યત્થ વેદનાક્ખન્ધો નિરુજ્ઝિત્થ તસ્સ તત્થ રૂપક્ખન્ધો નિરુજ્ઝતીતિ?

પઞ્ચવોકારં ઉપપજ્જન્તાનં અરૂપાનં તેસં તત્થ વેદનાક્ખન્ધો નિરુજ્ઝિત્થ, નો ચ તેસં તત્થ રૂપક્ખન્ધો નિરુજ્ઝતિ. પઞ્ચવોકારા ચવન્તાનં તેસં તત્થ વેદનાક્ખન્ધો ચ નિરુજ્ઝિત્થ રૂપક્ખન્ધો ચ નિરુજ્ઝતિ.

૧૨૭. (ક) યસ્સ યત્થ વેદનાક્ખન્ધો નિરુજ્ઝતિ તસ્સ તત્થ સઞ્ઞાક્ખન્ધો નિરુજ્ઝિત્થાતિ?

સુદ્ધાવાસે પરિનિબ્બન્તાનં તેસં તત્થ વેદનાક્ખન્ધો નિરુજ્ઝતિ, નો ચ તેસં તત્થ સઞ્ઞાક્ખન્ધો નિરુજ્ઝિત્થ. ઇતરેસં ચતુવોકારા પઞ્ચવોકારા ચવન્તાનં તેસં તત્થ વેદનાક્ખન્ધો ચ નિરુજ્ઝતિ સઞ્ઞાક્ખન્ધો ચ નિરુજ્ઝિત્થ.

(ખ) યસ્સ વા પન યત્થ સઞ્ઞાક્ખન્ધો નિરુજ્ઝિત્થ તસ્સ તત્થ વેદનાક્ખન્ધો નિરુજ્ઝતીતિ?

ચતુવોકારં પઞ્ચવોકારં ઉપપજ્જન્તાનં તેસં તત્થ સઞ્ઞાક્ખન્ધો નિરુજ્ઝિત્થ, નો ચ તેસં તત્થ વેદનાક્ખન્ધો નિરુજ્ઝતિ. ચતુવોકારા પઞ્ચવોકારા ચવન્તાનં તેસં તત્થ સઞ્ઞાક્ખન્ધો ચ નિરુજ્ઝિત્થ વેદનાક્ખન્ધો ચ નિરુજ્ઝતિ.

(ઘ) પચ્ચનીકપુગ્ગલો

૧૨૮. (ક) યસ્સ રૂપક્ખન્ધો ન નિરુજ્ઝતિ તસ્સ વેદનાક્ખન્ધો ન નિરુજ્ઝિત્થાતિ? નિરુજ્ઝિત્થ.

(ખ) યસ્સ વા પન વેદનાક્ખન્ધો ન નિરુજ્ઝિત્થ તસ્સ રૂપક્ખન્ધો ન નિરુજ્ઝતીતિ? નત્થિ.

૧૨૯. (ક) યસ્સ વેદનાક્ખન્ધો ન નિરુજ્ઝતિ તસ્સ સઞ્ઞાક્ખન્ધો ન નિરુજ્ઝિત્થાતિ? નિરુજ્ઝિત્થ.

(ખ) યસ્સ વા પન સઞ્ઞાક્ખન્ધો ન નિરુજ્ઝિત્થ તસ્સ વેદનાક્ખન્ધો ન નિરુજ્ઝતીતિ? નત્થિ.

(ઙ) પચ્ચનીકઓકાસો

૧૩૦. યત્થ રૂપક્ખન્ધો ન નિરુજ્ઝતિ (યત્થકં પરિપુણ્ણં કાતબ્બં).

(ચ) પચ્ચનીકપુગ્ગલોકાસા

૧૩૧. (ક) યસ્સ યત્થ રૂપક્ખન્ધો ન નિરુજ્ઝતિ તસ્સ તત્થ વેદનાક્ખન્ધો ન નિરુજ્ઝિત્થાતિ?

પઞ્ચવોકારં ઉપપજ્જન્તાનં અરૂપાનં તેસં તત્થ રૂપક્ખન્ધો ન નિરુજ્ઝતિ, નો ચ તેસં તત્થ વેદનાક્ખન્ધો ન નિરુજ્ઝિત્થ. સુદ્ધાવાસં ઉપપજ્જન્તાનં અસઞ્ઞસત્તં ઉપપજ્જન્તાનં તેસં તત્થ રૂપક્ખન્ધો ચ ન નિરુજ્ઝતિ વેદનાક્ખન્ધો ચ ન નિરુજ્ઝિત્થ.

(ખ) યસ્સ વા પન યત્થ વેદનાક્ખન્ધો ન નિરુજ્ઝિત્થ તસ્સ તત્થ રૂપક્ખન્ધો ન નિરુજ્ઝતીતિ?

સુદ્ધાવાસે પરિનિબ્બન્તાનં અસઞ્ઞસત્તા ચવન્તાનં તેસં તત્થ વેદનાક્ખન્ધો ન નિરુજ્ઝિત્થ, નો ચ તેસં તત્થ રૂપક્ખન્ધો ન નિરુજ્ઝતિ. સુદ્ધાવાસં ઉપપજ્જન્તાનં અસઞ્ઞસત્તં ઉપપજ્જન્તાનં તેસં તત્થ વેદનાક્ખન્ધો ચ ન નિરુજ્ઝિત્થ રૂપક્ખન્ધો ચ ન નિરુજ્ઝતિ.

૧૩૨. (ક) યસ્સ યત્થ વેદનાક્ખન્ધો ન નિરુજ્ઝતિ તસ્સ તત્થ સઞ્ઞાક્ખન્ધો ન નિરુજ્ઝિત્થાતિ?

ચતુવોકારં પઞ્ચવોકારં ઉપપજ્જન્તાનં તેસં તત્થ વેદનાક્ખન્ધો ન નિરુજ્ઝતિ, નો ચ તેસં તત્થ સઞ્ઞાક્ખન્ધો ન નિરુજ્ઝિત્થ. સુદ્ધાવાસં ઉપપજ્જન્તાનં અસઞ્ઞસત્તાનં તેસં તત્થ વેદનાક્ખન્ધો ચ ન નિરુજ્ઝતિ સઞ્ઞાક્ખન્ધો ચ ન નિરુજ્ઝિત્થ.

(ખ) યસ્સ વા પન યત્થ સઞ્ઞાક્ખન્ધો ન નિરુજ્ઝિત્થ તસ્સ તત્થ વેદનાક્ખન્ધો ન નિરુજ્ઝતીતિ?

સુદ્ધાવાસે પરિનિબ્બન્તાનં તેસં તત્થ સઞ્ઞાક્ખન્ધો ન નિરુજ્ઝિત્થ, નો ચ તેસં તત્થ વેદનાક્ખન્ધો ન નિરુજ્ઝતિ. સુદ્ધાવાસં ઉપપજ્જન્તાનં અસઞ્ઞસત્તાનં તેસં તત્થ સઞ્ઞાક્ખન્ધો ચ ન નિરુજ્ઝિત્થ વેદનાક્ખન્ધો ચ ન નિરુજ્ઝતિ.