(૩) અનાગતવારો

(ક) અનુલોમપુગ્ગલો

૧૧૬. (ક) યસ્સ રૂપક્ખન્ધો નિરુજ્ઝિસ્સતિ તસ્સ વેદનાક્ખન્ધો નિરુજ્ઝિસ્સતીતિ? આમન્તા.

(ખ) યસ્સ વા પન વેદનાક્ખન્ધો નિરુજ્ઝિસ્સતિ તસ્સ રૂપક્ખન્ધો નિરુજ્ઝિસ્સતીતિ?

પચ્છિમભવિકાનં અરૂપં ઉપપજ્જન્તાનં યે ચ અરૂપં ઉપપજ્જિત્વા પરિનિબ્બાયિસ્સન્તિ તેસં ચવન્તાનં તેસં વેદનાક્ખન્ધો નિરુજ્ઝિસ્સતિ, નો ચ તેસં રૂપક્ખન્ધો નિરુજ્ઝિસ્સતિ. ઇતરેસં તેસં વેદનાક્ખન્ધો ચ નિરુજ્ઝિસ્સતિ રૂપક્ખન્ધો ચ નિરુજ્ઝિસ્સતિ.

(ખ) અનુલોમઓકાસો

૧૧૭. (ક) યત્થ રૂપક્ખન્ધો નિરુજ્ઝિસ્સતિ તત્થ વેદનાક્ખન્ધો નિરુજ્ઝિસ્સતીતિ?

અસઞ્ઞસત્તે તત્થ રૂપક્ખન્ધો નિરુજ્ઝિસ્સતિ, નો ચ તત્થ વેદનાક્ખન્ધો નિરુજ્ઝિસ્સતિ. પઞ્ચવોકારે તત્થ રૂપક્ખન્ધો ચ નિરુજ્ઝિસ્સતિ વેદનાક્ખન્ધો ચ નિરુજ્ઝિસ્સતિ.

(ખ) યત્થ વા પન વેદનાક્ખન્ધો નિરુજ્ઝિસ્સતિ તત્થ રૂપક્ખન્ધો નિરુજ્ઝિસ્સતીતિ?

અરૂપે તત્થ વેદનાક્ખન્ધો નિરુજ્ઝિસ્સતિ, નો ચ તત્થ રૂપક્ખન્ધો નિરુજ્ઝિસ્સતિ. પઞ્ચવોકારે તત્થ વેદનાક્ખન્ધો ચ નિરુજ્ઝિસ્સતિ રૂપક્ખન્ધો ચ નિરુજ્ઝિસ્સતિ.

(ગ) અનુલોમપુગ્ગલોકાસા

૧૧૮. (ક) યસ્સ યત્થ રૂપક્ખન્ધો નિરુજ્ઝિસ્સતિ તસ્સ તત્થ વેદનાક્ખન્ધો નિરુજ્ઝિસ્સતીતિ?

અસઞ્ઞસત્તાનં તેસં તત્થ રૂપક્ખન્ધો નિરુજ્ઝિસ્સતિ, નો ચ તેસં તત્થ વેદનાક્ખન્ધો નિરુજ્ઝિસ્સતિ. પઞ્ચવોકારાનં તેસં તત્થ રૂપક્ખન્ધો ચ નિરુજ્ઝિસ્સતિ વેદનાક્ખન્ધો ચ નિરુજ્ઝિસ્સતિ.

(ખ) યસ્સ વા પન યત્થ વેદનાક્ખન્ધો નિરુજ્ઝિસ્સતિ તસ્સ તત્થ રૂપક્ખન્ધો નિરુજ્ઝિસ્સતીતિ?

અરૂપાનં તેસં તત્થ વેદનાક્ખન્ધો નિરુજ્ઝિસ્સતિ, નો ચ તેસં તત્થ રૂપક્ખન્ધો નિરુજ્ઝિસ્સતિ. પઞ્ચવોકારાનં તેસં તત્થ વેદનાક્ખન્ધો ચ નિરુજ્ઝિસ્સતિ રૂપક્ખન્ધો ચ નિરુજ્ઝિસ્સતિ.

(ઘ) પચ્ચનીકપુગ્ગલો

૧૧૯. (ક) યસ્સ રૂપક્ખન્ધો ન નિરુજ્ઝિસ્સતિ તસ્સ વેદનાક્ખન્ધો ન નિરુજ્ઝિસ્સતીતિ?

પચ્છિમભવિકાનં અરૂપં ઉપપજ્જન્તાનં યે ચ અરૂપં ઉપપજ્જિત્વા પરિનિબ્બાયિસ્સન્તિ તેસં ચવન્તાનં તેસં રૂપક્ખન્ધો ન નિરુજ્ઝિસ્સતિ, નો ચ તેસં વેદનાક્ખન્ધો ન નિરુજ્ઝિસ્સતિ. પરિનિબ્બન્તાનં તેસં રૂપક્ખન્ધો ચ ન નિરુજ્ઝિસ્સતિ વેદનાક્ખન્ધો ચ ન નિરુજ્ઝિસ્સતિ.

(ખ) યસ્સ વા પન વેદનાક્ખન્ધો ન નિરુજ્ઝિસ્સતિ તસ્સ રૂપક્ખન્ધો ન નિરુજ્ઝિસ્સતીતિ? આમન્તા.

(ઙ) પચ્ચનીકઓકાસો

૧૨૦. (ક) યત્થ રૂપક્ખન્ધો ન નિરુજ્ઝિસ્સતિ તત્થ વેદનાક્ખન્ધો ન નિરુજ્ઝિસ્સતીતિ? નિરુજ્ઝિસ્સતિ.

(ખ) યત્થ વા પન વેદનાક્ખન્ધો ન નિરુજ્ઝિસ્સતિ તત્થ રૂપક્ખન્ધો ન નિરુજ્ઝિસ્સતીતિ? નિરુજ્ઝિસ્સતિ.

(ચ) પચ્ચનીકપુગ્ગલોકાસા

૧૨૧. (ક) યસ્સ યત્થ રૂપક્ખન્ધો ન નિરુજ્ઝિસ્સતિ તસ્સ તત્થ વેદનાક્ખન્ધો ન નિરુજ્ઝિસ્સતીતિ?

અરૂપાનં તેસં તત્થ રૂપક્ખન્ધો ન નિરુજ્ઝિસ્સતિ, નો ચ તેસં તત્થ વેદનાક્ખન્ધો ન નિરુજ્ઝિસ્સતિ. પરિનિબ્બન્તાનં તેસં તત્થ રૂપક્ખન્ધો ચ ન નિરુજ્ઝિસ્સતિ વેદનાક્ખન્ધો ચ ન નિરુજ્ઝિસ્સતિ.

(ખ) યસ્સ વા પન યત્થ વેદનાક્ખન્ધો ન નિરુજ્ઝિસ્સતિ તસ્સ તત્થ રૂપક્ખન્ધો ન નિરુજ્ઝિસ્સતીતિ?

અસઞ્ઞસત્તાનં તેસં તત્થ વેદનાક્ખન્ધો ન નિરુજ્ઝિસ્સતિ, નો ચ તેસં તત્થ રૂપક્ખન્ધો ન નિરુજ્ઝિસ્સતિ. પરિનિબ્બન્તાનં તેસં તત્થ વેદનાક્ખન્ધો ચ ન નિરુજ્ઝિસ્સતિ રૂપક્ખન્ધો ચ ન નિરુજ્ઝિસ્સતિ.