(૫) પચ્ચુપ્પન્નાનાગતવારો

(ક) અનુલોમપુગ્ગલો

૮૦. (ક) યસ્સ રૂપક્ખન્ધો ઉપ્પજ્જતિ તસ્સ વેદનાક્ખન્ધો ઉપ્પજ્જિસ્સતીતિ?

પચ્છિમભવિકાનં પઞ્ચવોકારં ઉપપજ્જન્તાનં તેસં રૂપક્ખન્ધો ઉપ્પજ્જતિ, નો ચ તેસં વેદનાક્ખન્ધો ઉપ્પજ્જિસ્સતિ. ઇતરેસં પઞ્ચવોકારં ઉપપજ્જન્તાનં અસઞ્ઞસત્તં ઉપપજ્જન્તાનં તેસં રૂપક્ખન્ધો ચ ઉપ્પજ્જતિ વેદનાક્ખન્ધો ચ ઉપ્પજ્જિસ્સતિ.

(ખ) યસ્સ વા પન વેદનાક્ખન્ધો ઉપ્પજ્જિસ્સતિ તસ્સ રૂપક્ખન્ધો ઉપ્પજ્જતીતિ?

સબ્બેસં ચવન્તાનં અરૂપં ઉપપજ્જન્તાનં તેસં વેદનાક્ખન્ધો ઉપ્પજ્જિસ્સતિ, નો ચ તેસં રૂપક્ખન્ધો ઉપ્પજ્જતિ. પઞ્ચવોકારં ઉપપજ્જન્તાનં અસઞ્ઞસત્તં ઉપપજ્જન્તાનં તેસં વેદનાક્ખન્ધો ચ ઉપ્પજ્જિસ્સતિ રૂપક્ખન્ધો ચ ઉપ્પજ્જતિ.

૮૧. (ક) યસ્સ વેદનાક્ખન્ધો ઉપ્પજ્જતિ તસ્સ સઞ્ઞાક્ખન્ધો ઉપ્પજ્જિસ્સતીતિ?

પચ્છિમભવિકાનં ઉપપજ્જન્તાનં તેસં વેદનાક્ખન્ધો ઉપ્પજ્જતિ, નો ચ તેસં સઞ્ઞાક્ખન્ધો ઉપ્પજ્જિસ્સતિ. ઇતરેસં ચતુવોકારં પઞ્ચવોકારં ઉપપજ્જન્તાનં તેસં વેદનાક્ખન્ધો ચ ઉપ્પજ્જતિ સઞ્ઞાક્ખન્ધો ચ ઉપ્પજ્જિસ્સતિ.

(ખ) યસ્સ વા પન સઞ્ઞાક્ખન્ધો ઉપ્પજ્જિસ્સતિ તસ્સ વેદનાક્ખન્ધો ઉપ્પજ્જતીતિ?

સબ્બેસં ચવન્તાનં અસઞ્ઞસત્તં ઉપપજ્જન્તાનં તેસં સઞ્ઞાક્ખન્ધો ઉપ્પજ્જિસ્સતિ, નો ચ તેસં વેદનાક્ખન્ધો ઉપ્પજ્જતિ. ચતુવોકારં પઞ્ચવોકારં ઉપપજ્જન્તાનં તેસં સઞ્ઞાક્ખન્ધો ચ ઉપ્પજ્જિસ્સતિ વેદનાક્ખન્ધો ચ ઉપ્પજ્જતિ.

(ખ) અનુલોમઓકાસો

૮૨. (ક) યત્થ રૂપક્ખન્ધો ઉપ્પજ્જતિ તત્થ વેદનાક્ખન્ધો ઉપ્પજ્જિસ્સતીતિ?

અસઞ્ઞસત્તે તત્થ રૂપક્ખન્ધો ઉપ્પજ્જતિ, નો ચ તત્થ વેદનાક્ખન્ધો ઉપ્પજ્જિસ્સતિ. પઞ્ચવોકારે તત્થ રૂપક્ખન્ધો ચ ઉપ્પજ્જતિ વેદનાક્ખન્ધો ચ ઉપ્પજ્જિસ્સતિ.

(ખ) યત્થ વા પન વેદનાક્ખન્ધો ઉપ્પજ્જિસ્સતિ તત્થ રૂપક્ખન્ધો ઉપ્પજ્જતીતિ?

અરૂપે તત્થ વેદનાક્ખન્ધો ઉપ્પજ્જિસ્સતિ, નો ચ તત્થ રૂપક્ખન્ધો ઉપ્પજ્જતિ. પઞ્ચવોકારે તત્થ વેદનાક્ખન્ધો ચ ઉપ્પજ્જિસ્સતિ રૂપક્ખન્ધો ચ ઉપ્પજ્જતિ.

૮૩. (ક) યત્થ વેદનાક્ખન્ધો ઉપ્પજ્જતિ તત્થ સઞ્ઞાક્ખન્ધો ઉપ્પજ્જિસ્સતીતિ? આમન્તા.

(ખ) યત્થ વા પન સઞ્ઞાક્ખન્ધો ઉપ્પજ્જિસ્સતિ તત્થ વેદનાક્ખન્ધો ઉપ્પજ્જતીતિ? આમન્તા.

(ગ) અનુલોમપુગ્ગલોકાસા

૮૪. (ક) યસ્સ યત્થ રૂપક્ખન્ધો ઉપ્પજ્જતિ તસ્સ તત્થ વેદનાક્ખન્ધો ઉપ્પજ્જિસ્સતીતિ?

પચ્છિમભવિકાનં પઞ્ચવોકારં ઉપપજ્જન્તાનં અસઞ્ઞસત્તં ઉપપજ્જન્તાનં તેસં તત્થ રૂપક્ખન્ધો ઉપ્પજ્જતિ, નો ચ તેસં તત્થ વેદનાક્ખન્ધો ઉપ્પજ્જિસ્સતિ. ઇતરેસં પઞ્ચવોકારં ઉપપજ્જન્તાનં તેસં તત્થ રૂપક્ખન્ધો ચ ઉપ્પજ્જતિ વેદનાક્ખન્ધો ચ ઉપ્પજ્જિસ્સતિ.

(ખ) યસ્સ વા પન યત્થ વેદનાક્ખન્ધો ઉપ્પજ્જિસ્સતિ તસ્સ તત્થ રૂપક્ખન્ધો ઉપ્પજ્જતીતિ?

પઞ્ચવોકારા ચવન્તાનં અરૂપાનં તેસં તત્થ વેદનાક્ખન્ધો ઉપ્પજ્જિસ્સતિ, નો ચ તેસં તત્થ રૂપક્ખન્ધો ઉપ્પજ્જતિ. પઞ્ચવોકારં ઉપપજ્જન્તાનં તેસં તત્થ વેદનાક્ખન્ધો ચ ઉપ્પજ્જિસ્સતિ રૂપક્ખન્ધો ચ ઉપ્પજ્જતિ.

૮૫. (ક) યસ્સ યત્થ વેદનાક્ખન્ધો ઉપ્પજ્જતિ તસ્સ તત્થ સઞ્ઞાક્ખન્ધો ઉપ્પજ્જિસ્સતીતિ?

પચ્છિમભવિકાનં ઉપપજ્જન્તાનં તેસં તત્થ વેદનાક્ખન્ધો ઉપ્પજ્જતિ, નો ચ તેસં તત્થ સઞ્ઞાક્ખન્ધો ઉપ્પજ્જિસ્સતિ. ઇતરેસં ચતુવોકારં પઞ્ચવોકારં ઉપપજ્જન્તાનં તેસં તત્થ વેદનાક્ખન્ધો ચ ઉપ્પજ્જતિ સઞ્ઞાક્ખન્ધો ચ ઉપ્પજ્જિસ્સતિ.

(ખ) યસ્સ વા પન યત્થ સઞ્ઞાક્ખન્ધો ઉપ્પજ્જિસ્સતિ તસ્સ તત્થ વેદનાક્ખન્ધો ઉપ્પજ્જતીતિ?

ચતુવોકારા પઞ્ચવોકારા ચવન્તાનં તેસં તત્થ સઞ્ઞાક્ખન્ધો ઉપ્પજ્જિસ્સતિ, નો ચ તેસં તત્થ વેદનાક્ખન્ધો ઉપ્પજ્જતિ. ચતુવોકારં પઞ્ચવોકારં ઉપપજ્જન્તાનં તેસં તત્થ સઞ્ઞાક્ખન્ધો ચ ઉપ્પજ્જિસ્સતિ વેદનાક્ખન્ધો ચ ઉપ્પજ્જતિ.

(ઘ) પચ્ચનીકપુગ્ગલો

૮૬. (ક) યસ્સ રૂપક્ખન્ધો નુપ્પજ્જતિ તસ્સ વેદનાક્ખન્ધો નુપ્પજ્જિસ્સતીતિ?

સબ્બેસં ચવન્તાનં અરૂપં ઉપપજ્જન્તાનં તેસં રૂપક્ખન્ધો નુપ્પજ્જતિ, નો ચ તેસં વેદનાક્ખન્ધો નુપ્પજ્જિસ્સતિ. પઞ્ચવોકારે પરિનિબ્બન્તાનં અરૂપે પચ્છિમભવિકાનં તેસં રૂપક્ખન્ધો ચ નુપ્પજ્જતિ વેદનાક્ખન્ધો ચ નુપ્પજ્જિસ્સતિ.

(ખ) યસ્સ વા પન વેદનાક્ખન્ધો નુપ્પજ્જિસ્સતિ તસ્સ રૂપક્ખન્ધો નુપ્પજ્જતીતિ?

પચ્છિમભવિકાનં પઞ્ચવોકારં ઉપપજ્જન્તાનં તેસં વેદનાક્ખન્ધો નુપ્પજ્જિસ્સતિ, નો ચ તેસં રૂપક્ખન્ધો નુપ્પજ્જતિ. પઞ્ચવોકારે પરિનિબ્બન્તાનં અરૂપે પચ્છિમભવિકાનં તેસં વેદનાક્ખન્ધો ચ નુપ્પજ્જિસ્સતિ રૂપક્ખન્ધો ચ નુપ્પજ્જતિ.

૮૭. (ક) યસ્સ વેદનાક્ખન્ધો નુપ્પજ્જતિ તસ્સ સઞ્ઞાક્ખન્ધો નુપ્પજ્જિસ્સતીતિ?

સબ્બેસં ચવન્તાનં અસઞ્ઞસત્તં ઉપપજ્જન્તાનં તેસં વેદનાક્ખન્ધો નુપ્પજ્જતિ, નો ચ તેસં સઞ્ઞાક્ખન્ધો નુપ્પજ્જિસ્સતિ. પરિનિબ્બન્તાનં તેસં વેદનાક્ખન્ધો ચ નુપ્પજ્જતિ સઞ્ઞાક્ખન્ધો ચ નુપ્પજ્જિસ્સતિ.

(ખ) યસ્સ વા પન સઞ્ઞાક્ખન્ધો નુપ્પજ્જિસ્સતિ તસ્સ વેદનાક્ખન્ધો નુપ્પજ્જતીતિ?

પચ્છિમભવિકાનં ઉપપજ્જન્તાનં [પચ્છિમભવિકાનં પઞ્ચવોકારં ઉપપજ્જન્તાનં (સી. સ્યા.)] તેસં સઞ્ઞાક્ખન્ધો નુપ્પજ્જિસ્સતિ, નો ચ તેસં વેદનાક્ખન્ધો નુપ્પજ્જતિ. પરિનિબ્બન્તાનં તેસં સઞ્ઞાક્ખન્ધો ચ નુપ્પજ્જિસ્સતિ વેદનાક્ખન્ધો ચ નુપ્પજ્જતિ.

(ઙ) પચ્ચનીકઓકાસો

૮૮. (ક) યત્થ રૂપક્ખન્ધો નુપ્પજ્જતિ તત્થ વેદનાક્ખન્ધો નુપ્પજ્જિસ્સતીતિ? ઉપ્પજ્જિસ્સતિ.

(ખ) યત્થ વા પન વેદનાક્ખન્ધો નુપ્પજ્જિસ્સતિ તત્થ રૂપક્ખન્ધો નુપ્પજ્જતીતિ? ઉપ્પજ્જતિ.

૮૯. (ક) યત્થ વેદનાક્ખન્ધો નુપ્પજ્જતિ તત્થ સઞ્ઞાક્ખન્ધો નુપ્પજ્જિસ્સતીતિ? આમન્તા.

(ખ) યત્થ વા પન સઞ્ઞાક્ખન્ધો નુપ્પજ્જિસ્સતિ તત્થ વેદનાક્ખન્ધો નુપ્પજ્જતીતિ? આમન્તા.

(ચ) પચ્ચનીકપુગ્ગલોકાસા

૯૦. (ક) યસ્સ યત્થ રૂપક્ખન્ધો નુપ્પજ્જતિ તસ્સ તત્થ વેદનાક્ખન્ધો નુપ્પજ્જિસ્સતીતિ?

પઞ્ચવોકારા ચવન્તાનં અરૂપાનં તેસં તત્થ રૂપક્ખન્ધો નુપ્પજ્જતિ, નો ચ તેસં તત્થ વેદનાક્ખન્ધો નુપ્પજ્જિસ્સતિ. પઞ્ચવોકારે પરિનિબ્બન્તાનં અરૂપે પચ્છિમભવિકાનં અસઞ્ઞસત્તા ચવન્તાનં તેસં તત્થ રૂપક્ખન્ધો ચ નુપ્પજ્જતિ વેદનાક્ખન્ધો ચ નુપ્પજ્જિસ્સતિ.

(ખ) યસ્સ વા પન યત્થ વેદનાક્ખન્ધો નુપ્પજ્જિસ્સતિ તસ્સ તત્થ રૂપક્ખન્ધો નુપ્પજ્જતીતિ?

પચ્છિમભવિકાનં પઞ્ચવોકારં ઉપપજ્જન્તાનં અસઞ્ઞસત્તં ઉપપજ્જન્તાનં તેસં તત્થ વેદનાક્ખન્ધો નુપ્પજ્જિસ્સતિ, નો ચ તેસં તત્થ રૂપક્ખન્ધો નુપ્પજ્જતિ. પઞ્ચવોકારે પરિનિબ્બન્તાનં અરૂપે પચ્છિમભવિકાનં અસઞ્ઞસત્તા ચવન્તાનં તેસં તત્થ વેદનાક્ખન્ધો ચ નુપ્પજ્જિસ્સતિ રૂપક્ખન્ધો ચ નુપ્પજ્જતિ.

૯૧. (ક) યસ્સ યત્થ વેદનાક્ખન્ધો નુપ્પજ્જતિ તસ્સ તત્થ સઞ્ઞાક્ખન્ધો નુપ્પજ્જિસ્સતીતિ?

ચતુવોકારા પઞ્ચવોકારા ચવન્તાનં તેસં તત્થ વેદનાક્ખન્ધો નુપ્પજ્જતિ, નો ચ તેસં તત્થ સઞ્ઞાક્ખન્ધો નુપ્પજ્જિસ્સતિ. પરિનિબ્બન્તાનં અસઞ્ઞસત્તાનં તેસં તત્થ વેદનાક્ખન્ધો ચ નુપ્પજ્જતિ સઞ્ઞાક્ખન્ધો ચ નુપ્પજ્જિસ્સતિ.

(ખ) યસ્સ વા પન યત્થ સઞ્ઞાક્ખન્ધો નુપ્પજ્જિસ્સતિ તસ્સ તત્થ વેદનાક્ખન્ધો નુપ્પજ્જતીતિ?

પચ્છિમભવિકાનં ઉપપજ્જન્તાનં તેસં તત્થ સઞ્ઞાક્ખન્ધો નુપ્પજ્જિસ્સતિ, નો ચ તેસં તત્થ વેદનાક્ખન્ધો નુપ્પજ્જતિ. પરિનિબ્બન્તાનં અસઞ્ઞસત્તાનં તેસં તત્થ સઞ્ઞાક્ખન્ધો ચ નુપ્પજ્જિસ્સતિ વેદનાક્ખન્ધો ચ નુપ્પજ્જતિ.