(૬) અતીતાનાગતવારો

(ક) અનુલોમપુગ્ગલો

૯૨. (ક) યસ્સ રૂપક્ખન્ધો ઉપ્પજ્જિત્થ તસ્સ વેદનાક્ખન્ધો ઉપ્પજ્જિસ્સતીતિ?

પચ્છિમભવિકાનં તેસં રૂપક્ખન્ધો ઉપ્પજ્જિત્થ, નો ચ તેસં વેદનાક્ખન્ધો ઉપ્પજ્જિસ્સતિ. ઇતરેસં તેસં રૂપક્ખન્ધો ચ ઉપ્પજ્જિત્થ વેદનાક્ખન્ધો ચ ઉપ્પજ્જિસ્સતિ.

(ખ) યસ્સ વા પન વેદનાક્ખન્ધો ઉપ્પજ્જિસ્સતિ તસ્સ રૂપક્ખન્ધો ઉપ્પજ્જિત્થાતિ? આમન્તા.

૯૩. (ક) યસ્સ વેદનાક્ખન્ધો ઉપ્પજ્જિત્થ તસ્સ સઞ્ઞાક્ખન્ધો ઉપ્પજ્જિસ્સતીતિ?

પચ્છિમભવિકાનં તેસં વેદનાક્ખન્ધો ઉપ્પજ્જિત્થ, નો ચ તેસં સઞ્ઞાક્ખન્ધો ઉપ્પજ્જિસ્સતિ. ઇતરેસં તેસં વેદનાક્ખન્ધો ચ ઉપ્પજ્જિત્થ સઞ્ઞાક્ખન્ધો ચ ઉપ્પજ્જિસ્સતિ.

(ખ) યસ્સ વા પન સઞ્ઞાક્ખન્ધો ઉપ્પજ્જિસ્સતિ તસ્સ વેદનાક્ખન્ધો ઉપ્પજ્જિત્થાતિ? આમન્તા.

(ખ) અનુલોમઓકાસો

૯૪. (ક) યત્થ રૂપક્ખન્ધો ઉપ્પજ્જિત્થ તત્થ વેદનાક્ખન્ધો ઉપ્પજ્જિસ્સતીતિ?

અસઞ્ઞસત્તે તત્થ રૂપક્ખન્ધો ઉપ્પજ્જિત્થ, નો ચ તત્થ વેદનાક્ખન્ધો ઉપ્પજ્જિસ્સતિ. પઞ્ચવોકારે તત્થ રૂપક્ખન્ધો ચ ઉપ્પજ્જિત્થ વેદનાક્ખન્ધો ચ ઉપ્પજ્જિસ્સતિ.

(ખ) યત્થ વા પન વેદનાક્ખન્ધો ઉપ્પજ્જિસ્સતિ તત્થ રૂપક્ખન્ધો ઉપ્પજ્જિત્થાતિ?

અરૂપે તત્થ વેદનાક્ખન્ધો ઉપ્પજ્જિસ્સતિ, નો ચ તત્થ રૂપક્ખન્ધો ઉપ્પજ્જિત્થ. પઞ્ચવોકારે તત્થ વેદનાક્ખન્ધો ચ ઉપ્પજ્જિસ્સતિ રૂપક્ખન્ધો ચ ઉપ્પજ્જિત્થ.

૯૫. (ક) યત્થ વેદનાક્ખન્ધો ઉપ્પજ્જિત્થ તત્થ સઞ્ઞાક્ખન્ધો ઉપ્પજ્જિસ્સતીતિ? આમન્તા.

(ખ) યત્થ વા પન સઞ્ઞાક્ખન્ધો ઉપ્પજ્જિસ્સતિ તત્થ વેદનાક્ખન્ધો ઉપ્પજ્જિત્થાતિ? આમન્તા.

(ગ) અનુલોમપુગ્ગલોકાસા

૯૬. (ક) યસ્સ યત્થ રૂપક્ખન્ધો ઉપ્પજ્જિત્થ તસ્સ તત્થ વેદનાક્ખન્ધો ઉપ્પજ્જિસ્સતીતિ?

પઞ્ચવોકારે પચ્છિમભવિકાનં અસઞ્ઞસત્તાનં તેસં તત્થ રૂપક્ખન્ધો ઉપ્પજ્જિત્થ, નો ચ તેસં તત્થ વેદનાક્ખન્ધો ઉપ્પજ્જિસ્સતિ. ઇતરેસં પઞ્ચવોકારાનં તેસં તત્થ રૂપક્ખન્ધો ચ ઉપ્પજ્જિત્થ વેદનાક્ખન્ધો ચ ઉપ્પજ્જિસ્સતિ.

(ખ) યસ્સ વા પન યત્થ વેદનાક્ખન્ધો ઉપ્પજ્જિસ્સતિ તસ્સ તત્થ રૂપક્ખન્ધો ઉપ્પજ્જિત્થાતિ?

અરૂપાનં તેસં તત્થ વેદનાક્ખન્ધો ઉપ્પજ્જિસ્સતિ, નો ચ તેસં તત્થ રૂપક્ખન્ધો ઉપ્પજ્જિત્થ. પઞ્ચવોકારાનં તેસં તત્થ વેદનાક્ખન્ધો ચ ઉપ્પજ્જિસ્સતિ રૂપક્ખન્ધો ચ ઉપ્પજ્જિત્થ.

૯૭. (ક) યસ્સ યત્થ વેદનાક્ખન્ધો ઉપ્પજ્જિત્થ તસ્સ તત્થ સઞ્ઞાક્ખન્ધો ઉપ્પજ્જિસ્સતીતિ?

પચ્છિમભવિકાનં તેસં તત્થ વેદનાક્ખન્ધો ઉપ્પજ્જિત્થ, નો ચ તેસં તત્થ સઞ્ઞાક્ખન્ધો ઉપ્પજ્જિસ્સતિ. ઇતરેસં ચતુવોકારાનં પઞ્ચવોકારાનં તેસં તત્થ વેદનાક્ખન્ધો ચ ઉપ્પજ્જિત્થ સઞ્ઞાક્ખન્ધો ચ ઉપ્પજ્જિસ્સતિ.

(ખ) યસ્સ વા પન યત્થ સઞ્ઞાક્ખન્ધો ઉપ્પજ્જિસ્સતિ તસ્સ તત્થ વેદનાક્ખન્ધો ઉપ્પજ્જિત્થાતિ? આમન્તા.

(ઘ) પચ્ચનીકપુગ્ગલો

૯૮. (ક) યસ્સ રૂપક્ખન્ધો નુપ્પજ્જિત્થ તસ્સ વેદનાક્ખન્ધો નુપ્પજ્જિસ્સતીતિ? નત્થિ.

(ખ) યસ્સ વા પન વેદનાક્ખન્ધો નુપ્પજ્જિસ્સતિ તસ્સ રૂપક્ખન્ધો નુપ્પજ્જિત્થાતિ? ઉપ્પજ્જિત્થ.

૯૯. (ક) યસ્સ વેદનાક્ખન્ધો નુપ્પજ્જિત્થ તસ્સ સઞ્ઞાક્ખન્ધો નુપ્પજ્જિસ્સતીતિ? નત્થિ.

(ખ) યસ્સ વા પન સઞ્ઞાક્ખન્ધો નુપ્પજ્જિસ્સતિ તસ્સ વેદનાક્ખન્ધો નુપ્પજ્જિત્થાતિ? ઉપ્પજ્જિત્થ.

(ઙ) પચ્ચનીકઓકાસો

૧૦૦. (ક) યત્થ રૂપક્ખન્ધો નુપ્પજ્જિત્થ તત્થ વેદનાક્ખન્ધો નુપ્પજ્જિસ્સતીતિ? ઉપ્પજ્જિસ્સતિ.

(ખ) યત્થ વા પન વેદનાક્ખન્ધો નુપ્પજ્જિસ્સતિ તત્થ રૂપક્ખન્ધો નુપ્પજ્જિત્થાતિ? ઉપ્પજ્જિત્થ.

૧૦૧. (ક) યત્થ વેદનાક્ખન્ધો નુપ્પજ્જિત્થ તત્થ સઞ્ઞાક્ખન્ધો નુપ્પજ્જિસ્સતીતિ? આમન્તા.

(ખ) યત્થ વા પન સઞ્ઞાક્ખન્ધો નુપ્પજ્જિસ્સતિ તત્થ વેદનાક્ખન્ધો નુપ્પજ્જિત્થાતિ? આમન્તા.

(ચ) પચ્ચનીકપુગ્ગલોકાસા

૧૦૨. (ક) યસ્સ યત્થ રૂપક્ખન્ધો નુપ્પજ્જિત્થ તસ્સ તત્થ વેદનાક્ખન્ધો નુપ્પજ્જિસ્સતીતિ?

અરૂપાનં તેસં તત્થ રૂપક્ખન્ધો નુપ્પજ્જિત્થ, નો ચ તેસં તત્થ વેદનાક્ખન્ધો નુપ્પજ્જિસ્સતિ. સુદ્ધાવાસાનં અરૂપે પચ્છિમભવિકાનં તેસં તત્થ રૂપક્ખન્ધો ચ નુપ્પજ્જિત્થ વેદનાક્ખન્ધો ચ નુપ્પજ્જિસ્સતિ.

(ખ) યસ્સ વા પન યત્થ વેદનાક્ખન્ધો નુપ્પજ્જિસ્સતિ તસ્સ તત્થ રૂપક્ખન્ધો નુપ્પજ્જિત્થાતિ?

પઞ્ચવોકારે પચ્છિમભવિકાનં અસઞ્ઞસત્તાનં તેસં તત્થ વેદનાક્ખન્ધો નુપ્પજ્જિસ્સતિ, નો ચ તેસં તત્થ રૂપક્ખન્ધો નુપ્પજ્જિત્થ. સુદ્ધાવાસાનં અરૂપે પચ્છિમભવિકાનં તેસં તત્થ વેદનાક્ખન્ધો ચ નુપ્પજ્જિસ્સતિ રૂપક્ખન્ધો ચ નુપ્પજ્જિત્થ.

૧૦૩. (ક) યસ્સ યત્થ વેદનાક્ખન્ધો નુપ્પજ્જિત્થ તસ્સ તત્થ સઞ્ઞાક્ખન્ધો નુપ્પજ્જિસ્સતીતિ? આમન્તા.

(ખ) યસ્સ વા પન યત્થ સઞ્ઞાક્ખન્ધો નુપ્પજ્જિસ્સતિ તસ્સ તત્થ વેદનાક્ખન્ધો નુપ્પજ્જિત્થાતિ?

પચ્છિમભવિકાનં તેસં તત્થ સઞ્ઞાક્ખન્ધો નુપ્પજ્જિસ્સતિ, નો ચ તેસં તત્થ વેદનાક્ખન્ધો નુપ્પજ્જિત્થ. સુદ્ધાવાસાનં અસઞ્ઞસત્તાનં તેસં તત્થ સઞ્ઞાક્ખન્ધો ચ નુપ્પજ્જિસ્સતિ વેદનાક્ખન્ધો ચ નુપ્પજ્જિત્થ.

ઉપ્પાદવારો નિટ્ઠિતો.