(૧) પચ્ચુપ્પન્નવારો

(ક) અનુલોમપુગ્ગલો

૫૦. (ક) યસ્સ રૂપક્ખન્ધો ઉપ્પજ્જતિ તસ્સ વેદનાક્ખન્ધો ઉપ્પજ્જતીતિ?

અસઞ્ઞસત્તં ઉપપજ્જન્તાનં તેસં રૂપક્ખન્ધો ઉપ્પજ્જતિ, નો ચ તેસં વેદનાક્ખન્ધો ઉપ્પજ્જતિ. પઞ્ચવોકારં ઉપપજ્જન્તાનં તેસં રૂપક્ખન્ધો ચ ઉપ્પજ્જતિ વેદનાક્ખન્ધો ચ ઉપ્પજ્જતિ.

(ખ) યસ્સ વા પન વેદનાક્ખન્ધો ઉપ્પજ્જતિ તસ્સ રૂપક્ખન્ધો ઉપ્પજ્જતીતિ?

અરૂપં ઉપપજ્જન્તાનં તેસં વેદનાક્ખન્ધો ઉપ્પજ્જતિ, નો ચ તેસં રૂપક્ખન્ધો ઉપ્પજ્જતિ. પઞ્ચવોકારં ઉપપજ્જન્તાનં તેસં વેદનાક્ખન્ધો ચ ઉપ્પજ્જતિ રૂપક્ખન્ધો ચ ઉપ્પજ્જતિ.

(ખ) અનુલોમઓકાસો

૫૧. (ક) યત્થ રૂપક્ખન્ધો ઉપ્પજ્જતિ તત્થ વેદનાક્ખન્ધો ઉપ્પજ્જતીતિ?

અસઞ્ઞસત્તે તત્થ રૂપક્ખન્ધો ઉપ્પજ્જતિ, નો ચ તત્થ વેદનાક્ખન્ધો ઉપ્પજ્જતિ. પઞ્ચવોકારે તત્થ રૂપક્ખન્ધો ચ ઉપ્પજ્જતિ વેદનાક્ખન્ધો ચ ઉપ્પજ્જતિ.

(ખ) યત્થ વા પન વેદનાક્ખન્ધો ઉપ્પજ્જતિ તત્થ રૂપક્ખન્ધો ઉપ્પજ્જતીતિ?

અરૂપે તત્થ વેદનાક્ખન્ધો ઉપ્પજ્જતિ, નો ચ તત્થ રૂપક્ખન્ધો ઉપ્પજ્જતિ. પઞ્ચવોકારે તત્થ વેદનાક્ખન્ધો ચ ઉપ્પજ્જતિ રૂપક્ખન્ધો ચ ઉપ્પજ્જતિ.

(ગ) અનુલોમપુગ્ગલોકાસા

૫૨. (ક) યસ્સ યત્થ રૂપક્ખન્ધો ઉપ્પજ્જતિ તસ્સ તત્થ વેદનાક્ખન્ધો ઉપ્પજ્જતીતિ?

અસઞ્ઞસત્તં ઉપપજ્જન્તાનં તેસં તત્થ રૂપક્ખન્ધો ઉપ્પજ્જતિ, નો ચ તેસં તત્થ વેદનાક્ખન્ધો ઉપ્પજ્જતિ. પઞ્ચવોકારં ઉપપજ્જન્તાનં તેસં તત્થ રૂપક્ખન્ધો ચ ઉપ્પજ્જતિ વેદનાક્ખન્ધો ચ ઉપ્પજ્જતિ.

(ખ) યસ્સ વા પન યત્થ વેદનાક્ખન્ધો ઉપ્પજ્જતિ તસ્સ તત્થ રૂપક્ખન્ધો ઉપ્પજ્જતીતિ?

અરૂપં ઉપપજ્જન્તાનં તેસં તત્થ વેદનાક્ખન્ધો ઉપ્પજ્જતિ, નો ચ તેસં તત્થ રૂપક્ખન્ધો ઉપ્પજ્જતિ. પઞ્ચવોકારં ઉપપજ્જન્તાનં તેસં તત્થ વેદનાક્ખન્ધો ચ ઉપ્પજ્જતિ રૂપક્ખન્ધો ચ ઉપ્પજ્જતિ.

(ઘ) પચ્ચનીકપુગ્ગલો

૫૩. (ક) યસ્સ રૂપક્ખન્ધો નુપ્પજ્જતિ તસ્સ વેદનાક્ખન્ધો નુપ્પજ્જતીતિ?

અરૂપં ઉપપજ્જન્તાનં તેસં રૂપક્ખન્ધો નુપ્પજ્જતિ, નો ચ તેસં વેદનાક્ખન્ધો નુપ્પજ્જતિ. સબ્બેસં ચવન્તાનં તેસં રૂપક્ખન્ધો ચ નુપ્પજ્જતિ વેદનાક્ખન્ધો ચ નુપ્પજ્જતિ.

(ખ) યસ્સ વા પન વેદનાક્ખન્ધો નુપ્પજ્જતિ તસ્સ રૂપક્ખન્ધો નુપ્પજ્જતીતિ?

અસઞ્ઞસત્તં ઉપપજ્જન્તાનં તેસં વેદનાક્ખન્ધો નુપ્પજ્જતિ, નો ચ તેસં રૂપક્ખન્ધો નુપ્પજ્જતિ. સબ્બેસં ચવન્તાનં તેસં વેદનાક્ખન્ધો ચ નુપ્પજ્જતિ રૂપક્ખન્ધો ચ નુપ્પજ્જતિ.

(ઙ) પચ્ચનીકઓકાસો

૫૪. (ક) યત્થ રૂપક્ખન્ધો નુપ્પજ્જતિ તત્થ વેદનાક્ખન્ધો નુપ્પજ્જતીતિ? ઉપ્પજ્જતિ.

(ખ) યત્થ વા પન વેદનાક્ખન્ધો નુપ્પજ્જતિ તત્થ રૂપક્ખન્ધો નુપ્પજ્જતીતિ? ઉપ્પજ્જતિ.

(ચ) પચ્ચનીકપુગ્ગલોકાસા

૫૫. (ક) યસ્સ યત્થ રૂપક્ખન્ધો નુપ્પજ્જતિ તસ્સ તત્થ વેદનાક્ખન્ધો નુપ્પજ્જતીતિ?

અરૂપં ઉપપજ્જન્તાનં તેસં તત્થ રૂપક્ખન્ધો નુપ્પજ્જતિ, નો ચ તેસં તત્થ વેદનાક્ખન્ધો નુપ્પજ્જતિ. સબ્બેસં ચવન્તાનં તેસં તત્થ રૂપક્ખન્ધો ચ નુપ્પજ્જતિ વેદનાક્ખન્ધો ચ નુપ્પજ્જતિ.

(ખ) યસ્સ વા પન યત્થ વેદનાક્ખન્ધો નુપ્પજ્જતિ તસ્સ તત્થ રૂપક્ખન્ધો નુપ્પજ્જતીતિ?

અસઞ્ઞસત્તં ઉપપજ્જન્તાનં તેસં તત્થ વેદનાક્ખન્ધો નુપ્પજ્જતિ, નો ચ તેસં તત્થ રૂપક્ખન્ધો નુપ્પજ્જતિ. સબ્બેસં ચવન્તાનં તેસં તત્થ વેદનાક્ખન્ધો ચ નુપ્પજ્જતિ રૂપક્ખન્ધો ચ નુપ્પજ્જતિ.