(૩) મૂલકનયો

૬૮. (ક) યે કેચિ અકુસલા ધમ્મા, સબ્બે તે અકુસલમૂલકાતિ?

અહેતુકં અકુસલં ન અકુસલમૂલકં. સહેતુકં અકુસલં અકુસલમૂલકં.

(ખ) યે વા પન અકુસલમૂલકા, સબ્બે તે ધમ્મા અકુસલાતિ?

અકુસલસમુટ્ઠાનં રૂપં અકુસલમૂલકં ન અકુસલં. અકુસલં અકુસલમૂલકઞ્ચેવ અકુસલઞ્ચ.

૬૯. (ક) યે કેચિ અકુસલા ધમ્મા, સબ્બે તે અકુસલમૂલેન એકમૂલકાતિ?

અહેતુકં અકુસલં અકુસલમૂલેન ન એકમૂલકં. સહેતુકં અકુસલં અકુસલમૂલેન એકમૂલકં.

(ખ) યે વા પન અકુસલમૂલેન એકમૂલકા, સબ્બે તે ધમ્મા અકુસલાતિ?

અકુસલસમુટ્ઠાનં રૂપં અકુસલમૂલેન એકમૂલકં, ન અકુસલં. અકુસલં અકુસલમૂલેન એકમૂલકઞ્ચેવ અકુસલઞ્ચ.

૭૦. (ક) યે કેચિ અકુસલમૂલેન એકમૂલકા ધમ્મા, સબ્બે તે અકુસલમૂલેન અઞ્ઞમઞ્ઞમૂલકાતિ?

મૂલાનિ યાનિ એકતો ઉપ્પજ્જન્તિ અકુસલમૂલાનિ એકમૂલકાનિ ચેવ અઞ્ઞમઞ્ઞમૂલકાનિ ચ. અવસેસા અકુસલમૂલસહજાતા ધમ્મા અકુસલમૂલેન એકમૂલકા ન ચ અઞ્ઞમઞ્ઞમૂલકા.

(ખ) યે વા પન અકુસલમૂલેન અઞ્ઞમઞ્ઞમૂલકા, સબ્બે તે ધમ્મા અકુસલાતિ? આમન્તા.