૫. ઇન્દ્રિયવિભઙ્ગો

૧. અભિધમ્મભાજનીયં

૨૧૯. બાવીસતિન્દ્રિયાનિ – ચક્ખુન્દ્રિયં, સોતિન્દ્રિયં, ઘાનિન્દ્રિયં, જિવ્હિન્દ્રિયં, કાયિન્દ્રિયં, મનિન્દ્રિયં, ઇત્થિન્દ્રિયં, પુરિસિન્દ્રિયં, જીવિતિન્દ્રિયં, સુખિન્દ્રિયં, દુક્ખિન્દ્રિયં, સોમનસ્સિન્દ્રિયં, દોમનસ્સિન્દ્રિયં, ઉપેક્ખિન્દ્રિયં, સદ્ધિન્દ્રિયં, વીરિયિન્દ્રિયં [વિરિયિન્દ્રિયં (સી. સ્યા.)], સતિન્દ્રિયં, સમાધિન્દ્રિયં, પઞ્ઞિન્દ્રિયં, અનઞ્ઞાતઞ્ઞસ્સામીતિન્દ્રિયં, અઞ્ઞિન્દ્રિયં, અઞ્ઞાતાવિન્દ્રિયં.

૨૨૦. તત્થ કતમં ચક્ખુન્દ્રિયં? યં ચક્ખુ ચતુન્નં મહાભૂતાનં ઉપાદાય પસાદો…પે… સુઞ્ઞો ગામોપેસો – ઇદં વુચ્ચતિ ‘‘ચક્ખુન્દ્રિયં’’.

તત્થ કતમં સોતિન્દ્રિયં…પે… ઘાનિન્દ્રિયં…પે… જિવ્હિન્દ્રિયં…પે… કાયિન્દ્રિયં? યો કાયો ચતુન્નં મહાભૂતાનં ઉપાદાય પસાદો…પે… સુઞ્ઞો ગામોપેસો – ઇદં વુચ્ચતિ ‘‘કાયિન્દ્રિયં’’.

તત્થ કતમં મનિન્દ્રિયં? એકવિધેન મનિન્દ્રિયં – ફસ્સસમ્પયુત્તં. દુવિધેન મનિન્દ્રિયં – અત્થિ સહેતુકં, અત્થિ અહેતુકં. તિવિધેન મનિન્દ્રિયં – અત્થિ કુસલં, અત્થિ અકુસલં, અત્થિ અબ્યાકતં. ચતુબ્બિધેન મનિન્દ્રિયં – અત્થિ કામાવચરં, અત્થિ રૂપાવચરં, અત્થિ અરૂપાવચરં, અત્થિ અપરિયાપન્નં. પઞ્ચવિધેન મનિન્દ્રિયં – અત્થિ સુખિન્દ્રિયસમ્પયુત્તં, અત્થિ દુક્ખિન્દ્રિયસમ્પયુત્તં, અત્થિ સોમનસ્સિન્દ્રિયસમ્પયુત્તં, અત્થિ દોમનસ્સિન્દ્રિયસમ્પયુત્તં, અત્થિ ઉપેક્ખિન્દ્રિયસમ્પયુત્તં. છબ્બિધેન મનિન્દ્રિયં – ચક્ખુવિઞ્ઞાણં…પે… મનોવિઞ્ઞાણં. એવં છબ્બિધેન મનિન્દ્રિયં.

સત્તવિધેન મનિન્દ્રિયં – ચક્ખુવિઞ્ઞાણં…પે… કાયવિઞ્ઞાણં, મનોધાતુ, મનોવિઞ્ઞાણધાતુ. એવં સત્તવિધેન મનિન્દ્રિયં.

અટ્ઠવિધેન મનિન્દ્રિયં – ચક્ખુવિઞ્ઞાણં…પે… કાયવિઞ્ઞાણં અત્થિ સુખસહગતં, અત્થિ દુક્ખસહગતં, મનોધાતુ, મનોવિઞ્ઞાણધાતુ. એવં અટ્ઠવિધેન મનિન્દ્રિયં.

નવવિધેન મનિન્દ્રિયં – ચક્ખુવિઞ્ઞાણં…પે… કાયવિઞ્ઞાણં, મનોધાતુ, મનોવિઞ્ઞાણધાતુ અત્થિ કુસલા, અત્થિ અકુસલા, અત્થિ અબ્યાકતા. એવં નવવિધેન મનિન્દ્રિયં.

દસવિધેન મનિન્દ્રિયં – ચક્ખુવિઞ્ઞાણં…પે… કાયવિઞ્ઞાણં અત્થિ સુખસહગતં, અત્થિ દુક્ખસહગતં, મનોધાતુ, મનોવિઞ્ઞાણધાતુ અત્થિ કુસલા, અત્થિ અકુસલા, અત્થિ અબ્યાકતા. એવં દસવિધેન મનિન્દ્રિયં…પે… એવં બહુવિધેન મનિન્દ્રિયં. ઇદં વુચ્ચતિ ‘‘મનિન્દ્રિયં’’.

તત્થ કતમં ઇત્થિન્દ્રિયં? યં ઇત્થિયા ઇત્થિલિઙ્ગં ઇત્થિનિમિત્તં ઇત્થિકુત્તં ઇત્થાકપ્પો ઇત્થત્તં ઇત્થિભાવો – ઇદં વુચ્ચતિ ‘‘ઇત્થિન્દ્રિયં’’.

તત્થ કતમં પુરિસિન્દ્રિયં? યં પુરિસસ્સ પુરિસલિઙ્ગં પુરિસનિમિત્તં પુરિસકુત્તં પુરિસાકપ્પો પુરિસત્તં પુરિસભાવો – ઇદં વુચ્ચતિ ‘‘પુરિસિન્દ્રિયં’’.

તત્થ કતમં જીવિતિન્દ્રિયં? જીવિતિન્દ્રિયં દુવિધેન – અત્થિ રૂપજીવિતિન્દ્રિયં, અત્થિ અરૂપજીવિતિન્દ્રિયં.

તત્થ કતમં રૂપજીવિતિન્દ્રિયં? યો તેસં રૂપીનં ધમ્માનં આયુ ઠિતિ યપના યાપના ઇરિયના વત્તના પાલના જીવિતં જીવિતિન્દ્રિયં – ઇદં વુચ્ચતિ ‘‘રૂપજીવિતિન્દ્રિયં’’.

તત્થ કતમં અરૂપજીવિતિન્દ્રિયં? યો તેસં અરૂપીનં ધમ્માનં આયુ ઠિતિ યપના યાપના ઇરિયના વત્તના પાલના જીવિતં જીવિતિન્દ્રિયં – ઇદં વુચ્ચતિ ‘‘અરૂપજીવતિન્દ્રિયં’’. ઇદં વુચ્ચતિ ‘‘જીવિતિન્દ્રિયં’’.

તત્થ કતમં સુખિન્દ્રિયં? યં કાયિકં સાતં કાયિકં સુખં કાયસમ્ફસ્સજં સાતં સુખં વેદયિતં કાયસમ્ફસ્સજા સાતા સુખા વેદના – ઇદં વુચ્ચતિ ‘‘સુખિન્દ્રિયં’’.

તત્થ કતમં દુક્ખિન્દ્રિયં? યં કાયિકં અસાતં કાયિકં દુક્ખં કાયસમ્ફસ્સજં અસાતં દુક્ખં વેદયિતં કાયસમ્ફસ્સજા અસાતા દુક્ખા વેદના – ઇદં વુચ્ચતિ ‘‘દુક્ખિન્દ્રિયં’’.

તત્થ કતમં સોમનસ્સિન્દ્રિયં? યં ચેતસિકં સાતં ચેતસિકં સુખં ચેતોસમ્ફસ્સજં સાતં સુખં વેદયિતં ચેતોસમ્ફસ્સજા સાતા સુખા વેદના – ઇદં વુચ્ચતિ ‘‘સોમનસ્સિન્દ્રિયં’’.

તત્થ કતમં દોમનસ્સિન્દ્રિયં? યં ચેતસિકં અસાતં ચેતસિકં દુક્ખં ચેતોસમ્ફસ્સજં અસાતં દુક્ખં વેદયિતં ચેતોસમ્ફસ્સજા અસાતા દુક્ખા વેદના – ઇદં વુચ્ચતિ ‘‘દોમનસ્સિન્દ્રિયં’’.

તત્થ કતમં ઉપેક્ખિન્દ્રિયં? યં ચેતસિકં નેવ સાતં નાસાતં ચેતોસમ્ફસ્સજં અદુક્ખમસુખં વેદયિતં ચેતોસમ્ફસ્સજા અદુક્ખમસુખા વેદના – ઇદં વુચ્ચતિ ‘‘ઉપેક્ખિન્દ્રિયં’’.

તત્થ કતમં સદ્ધિન્દ્રિયં? યા સદ્ધા સદ્દહના ઓકપ્પના અભિપ્પસાદો સદ્ધા સદ્ધિન્દ્રિયં સદ્ધાબલં – ઇદં વુચ્ચતિ ‘‘સદ્ધિન્દ્રિયં’’.

તત્થ કતમં વીરિયિન્દ્રિયં? યો ચેતસિકો વીરિયારમ્ભો નિક્કમો પરક્કમો ઉય્યામો વાયામો ઉસ્સાહો ઉસ્સોળ્હી થામો ઠિતિ અસિથિલપરક્કમતા અનિક્ખિત્તછન્દતા અનિક્ખિત્તધુરતા ધુરસમ્પગ્ગાહો વીરિયં વીરિયિન્દ્રિયં વીરિયબલં – ઇદં વુચ્ચતિ ‘‘વીરિયિન્દ્રિયં’’.

તત્થ કતમં સતિન્દ્રિયં? યા સતિ અનુસ્સતિ પટિસ્સતિ સતિ સરણતા ધારણતા અપિલાપનતા અસમ્મુસ્સનતા સતિ સતિન્દ્રિયં સતિબલં સમ્માસતિ – ઇદં વુચ્ચતિ ‘‘સતિન્દ્રિયં’’.

તત્થ કતમં સમાધિન્દ્રિયં? યા ચિત્તસ્સ ઠિતિ સણ્ઠિતિ અવટ્ઠિતિ અવિસાહારો અવિક્ખેપો અવિસાહટમાનસતા સમથો સમાધિન્દ્રિયં સમાધિબલં સમ્માસમાધિ – ઇદં વુચ્ચતિ ‘‘સમાધિન્દ્રિયં’’.

તત્થ કતમં પઞ્ઞિન્દ્રિયં? યા પઞ્ઞા પજાનના…પે… અમોહો ધમ્મવિચયો સમ્માદિટ્ઠિ – ઇદં વુચ્ચતિ ‘‘પઞ્ઞિન્દ્રિયં’’.

તત્થ કતમં અનઞ્ઞાતઞ્ઞસ્સામીતિન્દ્રિયં? યા તેસં ધમ્માનં અનઞ્ઞાતાનં અદિટ્ઠાનં અપ્પત્તાનં અવિદિતાનં અસચ્છિકતાનં સચ્છિકિરિયાય પઞ્ઞા પજાનના…પે… અમોહો ધમ્મવિચયો સમ્માદિટ્ઠિ ધમ્મવિચયસમ્બોજ્ઝઙ્ગો મગ્ગઙ્ગં મગ્ગપરિયાપન્નં – ઇદં વુચ્ચતિ ‘‘અનઞ્ઞાતઞ્ઞસ્સામીતિન્દ્રિયં’’.

તત્થ કતમં અઞ્ઞિન્દ્રિયં? યા તેસં ધમ્માનં ઞાતાનં દિટ્ઠાનં પત્તાનં વિદિતાનં સચ્છિકતાનં સચ્છિકિરિયાય પઞ્ઞા પજાનના…પે… અમોહો ધમ્મવિચયો સમ્માદિટ્ઠિ ધમ્મવિચયસમ્બોજ્ઝઙ્ગો મગ્ગઙ્ગં મગ્ગપરિયાપન્નં – ઇદં વુચ્ચતિ અઞ્ઞિન્દ્રિયં.

તત્થ કતમં અઞ્ઞાતાવિન્દ્રિયં? યા તેસં ધમ્માનં અઞ્ઞાતાવીનં દિટ્ઠાનં પત્તાનં વિદિતાનં સચ્છિકતાનં સચ્છિકિરિયાય પઞ્ઞા પજાનના…પે… અમોહો ધમ્મવિચયો સમ્માદિટ્ઠિ ધમ્મવિચયસમ્બોજ્ઝઙ્ગો મગ્ગઙ્ગં મગ્ગપરિયાપન્નં – ઇદં વુચ્ચતિ ‘‘અઞ્ઞાતાવિન્દ્રિયં’’.

અભિધમ્મભાજનીયં.

૨. પઞ્હાપુચ્છકં

૨૨૧. બાવીસતિન્દ્રિયાનિ – ચક્ખુન્દ્રિયં, સોતિન્દ્રિયં, ઘાનિન્દ્રિયં, જિવ્હિન્દ્રિયં, કાયિન્દ્રિયં, મનિન્દ્રિયં, ઇત્થિન્દ્રિયં, પુરિસિન્દ્રિયં, જીવિતિન્દ્રિયં, સુખિન્દ્રિયં, દુક્ખિન્દ્રિયં, સોમનસ્સિન્દ્રિયં, દોમનસ્સિન્દ્રિયં, ઉપેક્ખિન્દ્રિયં, સદ્ધિન્દ્રિયં, વીરિયિન્દ્રિયં, સતિન્દ્રિયં, સમાધિન્દ્રિયં, પઞ્ઞિન્દ્રિયં, અનઞ્ઞાતઞ્ઞસ્સામીતિન્દ્રિયં, અઞ્ઞિન્દ્રિયં, અઞ્ઞાતાવિન્દ્રિયં.

૨૨૨. બાવીસતીનં ઇન્દ્રિયાનં કતિ કુસલા, કતિ અકુસલા, કતિ અબ્યાકતા…પે… કતિ સરણા, કતિ અરણા?

૧. તિકં

૨૨૩. દસિન્દ્રિયા અબ્યાકતા. દોમનસ્સિન્દ્રિયં અકુસલં. અનઞ્ઞાતઞ્ઞસ્સામીતિન્દ્રિયં કુસલં. ચત્તારિન્દ્રિયા સિયા કુસલા, સિયા અબ્યાકતા. છ ઇન્દ્રિયા સિયા કુસલા, સિયા અકુસલા, સિયા અબ્યાકતા.

દ્વાદસિન્દ્રિયા ન વત્તબ્બા – ‘‘સુખાય વેદનાય સમ્પયુત્તા’’તિપિ, ‘‘દુક્ખાય વેદનાય સમ્પયુત્તા’’તિપિ, ‘‘અદુક્ખમસુખાય વેદનાય સમ્પયુત્તા’’તિપિ. છ ઇન્દ્રિયા સિયા સુખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. તીણિન્દ્રિયા સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. જીવિતિન્દ્રિયં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં, સિયા ન વત્તબ્બં – ‘‘સુખાય વેદનાય સમ્પયુત્ત’’ન્તિપિ, ‘‘દુક્ખાય વેદનાય સમ્પયુત્ત’’ન્તિપિ, ‘‘અદુક્ખમસુખાય વેદનાય સમ્પયુત્ત’’ન્તિપિ.

સત્તિન્દ્રિયા નેવવિપાકનવિપાકધમ્મધમ્મા. તીણિન્દ્રિયા વિપાકા. દ્વિન્દ્રિયા વિપાકધમ્મધમ્મા. અઞ્ઞિન્દ્રિયં સિયા વિપાકં, સિયા વિપાકધમ્મધમ્મં. નવિન્દ્રિયા સિયા વિપાકા, સિયા વિપાકધમ્મધમ્મા, સિયા નેવવિપાકનવિપાકધમ્મધમ્મા. નવિન્દ્રિયા ઉપાદિન્નુપાદાનિયા. દોમનસ્સિન્દ્રિયં અનુપાદિન્નુપાદાનિયં. તીણિન્દ્રિયા અનુપાદિન્નઅનુપાદાનિયા. નવિન્દ્રિયા સિયા ઉપાદિન્નુપાદાનિયા, સિયા અનુપાદિન્નુપાદાનિયા, સિયા અનુપાદિન્નઅનુપાદાનિયા.

નવિન્દ્રિયા અસંકિલિટ્ઠસંકિલેસિકા. દોમનસ્સિન્દ્રિયં સંકિલિટ્ઠસંકિલેસિકં. તીણિન્દ્રિયા અસંકિલિટ્ઠઅસંકિલેસિકા. તીણિન્દ્રિયા સિયા અસંકિલિટ્ઠસંકિલેસિકા, સિયા અસંકિલિટ્ઠઅસંકિલેસિકા. છ ઇન્દ્રિયા સિયા સંકિલિટ્ઠસંકિલેસિકા, સિયા અસંકિલિટ્ઠસંકિલેસિકા, સિયા અસંકિલિટ્ઠઅસંકિલેસિકા. નવિન્દ્રિયા અવિતક્કઅવિચારા. દોમનસ્સિન્દ્રિયં સવિતક્કસવિચારં. ઉપેક્ખિન્દ્રિયં સિયા સવિતક્કસવિચારં, સિયા અવિતક્કઅવિચારં. એકાદસિન્દ્રિયા સિયા સવિતક્કસવિચારા, સિયા અવિતક્કવિચારમત્તા, સિયા અવિતક્કઅવિચારા.

એકાદસિન્દ્રિયા ન વત્તબ્બા – ‘‘પીતિસહગતા’’તિપિ, ‘‘સુખસહગતા’’તિપિ, ‘‘ઉપેક્ખાસહગતા’’તિપિ. સોમનસ્સિન્દ્રિયં સિયા પીતિસહગતં ન સુખસહગતં ન ઉપેક્ખાસહગતં, સિયા ન વત્તબ્બં – ‘‘પીતિસહગત’’ન્તિ. છ ઇન્દ્રિયા સિયા પીતિસહગતા, સિયા સુખસહગતા, સિયા ઉપેક્ખાસહગતા. ચત્તારિન્દ્રિયા સિયા પીતિસહગતા, સિયા સુખસહગતા, સિયા ઉપેક્ખાસહગતા, સિયા ન વત્તબ્બા – ‘‘પીતિસહગતા’’તિપિ, ‘‘સુખસહગતા’’તિપિ, ‘‘ઉપેક્ખાસહગતા’’તિપિ.

પન્નરસિન્દ્રિયા નેવ દસ્સનેન ન ભાવનાય પહાતબ્બા. દોમનસ્સિન્દ્રિયં સિયા દસ્સનેન પહાતબ્બં, સિયા ભાવનાય પહાતબ્બં. છ ઇન્દ્રિયા સિયા દસ્સનેન પહાતબ્બા, સિયા ભાવનાય પહાતબ્બા, સિયા નેવ દસ્સનેન ન ભાવનાય પહાતબ્બા. પન્નરસિન્દ્રિયા નેવ દસ્સનેન ન ભાવનાય પહાતબ્બહેતુકા. દોમનસ્સિન્દ્રિયં સિયા દસ્સનેન પહાતબ્બહેતુકં, સિયા ભાવનાય પહાતબ્બહેતુકં. છ ઇન્દ્રિયા સિયા દસ્સનેન પહાતબ્બહેતુકા, સિયા ભાવનાય પહાતબ્બહેતુકા, સિયા નેવ દસ્સનેન ન ભાવનાય પહાતબ્બહેતુકા.

દસિન્દ્રિયા નેવાચયગામિનાપચયગામિનો. દોમનસ્સિન્દ્રિયં આચયગામિ. અનઞ્ઞાતઞ્ઞસ્સામીતિન્દ્રિયં અપચયગામિ. અઞ્ઞિન્દ્રિયં સિયા અપચયગામિ, સિયા નેવાચયગામિનાપચયગામિ. નવિન્દ્રિયા સિયા આચયગામિનો, સિયા અપચયગામિનો, સિયા નેવાચયગામિનાપચયગામિનો. દસિન્દ્રિયા નેવસેક્ખનાસેક્ખા. દ્વિન્દ્રિયા સેક્ખા. અઞ્ઞાતાવિન્દ્રિયં અસેક્ખં. નવિન્દ્રિયા સિયા સેક્ખા, સિયા અસેક્ખા, સિયા નેવસેક્ખનાસેક્ખા.

દસિન્દ્રિયા પરિત્તા. તીણિન્દ્રિયા અપ્પમાણા. નવિન્દ્રિયા સિયા પરિત્તા, સિયા મહગ્ગતા, સિયા અપ્પમાણા. સત્તિન્દ્રિયા અનારમ્મણા. દ્વિન્દ્રિયા પરિત્તારમ્મણા. તીણિન્દ્રિયા અપ્પમાણારમ્મણા. દોમનસ્સિન્દ્રિયં સિયા પરિત્તારમ્મણં સિયા મહગ્ગતારમ્મણં, ન અપ્પમાણારમ્મણં, સિયા ન વત્તબ્બં – ‘‘પરિત્તારમ્મણ’’ન્તિપિ, ‘‘મહગ્ગતારમ્મણ’’ન્તિ પિ. નવિન્દ્રિયા સિયા પરિત્તારમ્મણા, સિયા મહગ્ગતારમ્મણા, સિયા અપ્પમાણારમ્મણા, સિયા ન વત્તબ્બા – ‘‘પરિત્તારમ્મણા’’તિપિ, ‘‘મહગ્ગતારમ્મણા’’તિપિ, ‘‘અપ્પમાણારમ્મણા’’તિપિ.

નવિન્દ્રિયા મજ્ઝિમા. દોમનસ્સિન્દ્રિયં હીનં. તીણિન્દ્રિયા પણીતા. તીણિન્દ્રિયા સિયા મજ્ઝિમા, સિયા પણીતા. છ ઇન્દ્રિયા સિયા હીના, સિયા મજ્ઝિમા, સિયા પણીતા. દસિન્દ્રિયા અનિયતા. અનઞ્ઞાતઞ્ઞસ્સામીતિન્દ્રિયં સમ્મત્તનિયતં. ચત્તારિન્દ્રિયા સિયા સમ્મત્તનિયતા, સિયા અનિયતા. દોમનસ્સિન્દ્રિયં સિયા મિચ્છત્તનિયતં, સિયા અનિયતં. છ ઇન્દ્રિયા સિયા મિચ્છત્તનિયતા, સિયા સમ્મત્તનિયતા, સિયા અનિયતા. સત્તિન્દ્રિયા અનારમ્મણા. ચત્તારિન્દ્રિયા ન વત્તબ્બા – ‘‘મગ્ગારમ્મણા’’તિપિ, ‘‘મગ્ગહેતુકા’’તિપિ, ‘‘મગ્ગાધિપતિનો’’તિપિ. અનઞ્ઞાતઞ્ઞસ્સામીતિન્દ્રિયં ન મગ્ગારમ્મણં, સિયા મગ્ગહેતુકં, સિયા મગ્ગાધિપતિ, સિયા ન વત્તબ્બં – ‘‘મગ્ગહેતુક’’ન્તિપિ, ‘‘મગ્ગાધિપતી’’તિપિ. અઞ્ઞિન્દ્રિયં ન મગ્ગારમ્મણં, સિયા મગ્ગહેતુકં, સિયા મગ્ગાધિપતિ, સિયા ન વત્તબ્બં – ‘‘મગ્ગહેતુક’’ન્તિપિ, ‘‘મગ્ગાધિપતી’’તિપિ. નવિન્દ્રિયા સિયા મગ્ગારમ્મણા, સિયા મગ્ગહેતુકા, સિયા મગ્ગાધિપતિનો, સિયા ન વત્તબ્બા – ‘‘મગ્ગારમ્મણા’’તિપિ, ‘‘મગ્ગહેતુકા’’તિપિ, ‘‘મગ્ગાધિપતિનો’’તિપિ.

દસિન્દ્રિયા સિયા ઉપ્પન્ના, સિયા ઉપ્પાદિનો, ન વત્તબ્બા – ‘‘અનુપ્પન્ના’’તિ. દ્વિન્દ્રિયા સિયા ઉપ્પન્ના, સિયા અનુપ્પન્ના, ન વત્તબ્બા – ‘‘ઉપ્પાદિનો’’તિ. દસિન્દ્રિયા સિયા ઉપ્પન્ના, સિયા અનુપ્પન્ના, સિયા ઉપ્પાદિનો; સિયા અતીતા, સિયા અનાગતા, સિયા પચ્ચુપ્પન્ના. સત્તિન્દ્રિયા અનારમ્મણા. દ્વિન્દ્રિયા પચ્ચુપ્પન્નારમ્મણા. તીણિન્દ્રિયા ન વત્તબ્બા – ‘‘અતીતારમ્મણા’’તિપિ, ‘‘અનાગતારમ્મણા’’તિપિ, ‘‘પચ્ચુપ્પન્નારમ્મણા’’તિપિ. દસિન્દ્રિયા સિયા અતીતારમ્મણા, સિયા અનાગતારમ્મણા, સિયા પચ્ચુપ્પન્નારમ્મણા, સિયા ન વત્તબ્બા – ‘‘અતીતારમ્મણા’’તિપિ, ‘‘અનાગતારમ્મણા’’તિપિ, ‘‘પચ્ચુપ્પન્નારમ્મણા’’તિપિ; સિયા અજ્ઝત્તા, સિયા બહિદ્ધા, સિયા અજ્ઝત્તબહિદ્ધા. સત્તિન્દ્રિયા અનારમ્મણા. તીણિન્દ્રિયા બહિદ્ધારમ્મણા. ચત્તારિન્દ્રિયા સિયા અજ્ઝત્તારમ્મણા, સિયા બહિદ્ધારમ્મણા, સિયા અજ્ઝત્તબહિદ્ધારમ્મણા, અટ્ઠિન્દ્રિયા સિયા અજ્ઝત્તારમ્મણા, સિયા બહિદ્ધારમ્મણા, સિયા અજ્ઝત્તબહિદ્ધારમ્મણા, સિયા ન વત્તબ્બા – ‘‘અજ્ઝત્તારમ્મણા’’તિપિ, ‘‘બહિદ્ધારમ્મણા’’તિપિ, ‘‘અજ્ઝત્તબહિદ્ધારમ્મણા’’તિપિ. પઞ્ચિન્દ્રિયા અનિદસ્સનસપ્પટિઘા. સત્તરસિન્દ્રિયા અનિદસ્સનઅપ્પટિઘા.

૨. દુકં

૨૨૪. ચત્તારિન્દ્રિયા હેતૂ. અટ્ઠારસિન્દ્રિયા ન હેતૂ. સત્તિન્દ્રિયા સહેતુકા. નવિન્દ્રિયા અહેતુકા. છ ઇન્દ્રિયા સિયા સહેતુકા, સિયા અહેતુકા. સત્તિન્દ્રિયા હેતુસમ્પયુત્તા. નવિન્દ્રિયા હેતુવિપ્પયુત્તા. છ ઇન્દ્રિયા સિયા હેતુસમ્પયુત્તા, સિયા હેતુવિપ્પયુત્તા. ચત્તારિન્દ્રિયા હેતૂ ચેવ સહેતુકા ચ. નવિન્દ્રિયા ન વત્તબ્બા – ‘‘હેતૂ ચેવ સહેતુકા ચા’’તિપિ, ‘‘સહેતુકા ચેવ ન ચ હેતૂ’’તિપિ. તીણિન્દ્રિયા ન વત્તબ્બા – ‘‘હેતૂ ચેવ સહેતુકા ચા’’તિ. સહેતુકા ચેવ ન ચ હેતૂ. છ ઇન્દ્રિયા ન વત્તબ્બા – ‘‘હેતૂ ચેવ સહેતુકા ચા’’તિ, સિયા સહેતુકા ચેવ ન ચ હેતૂ, સિયા ન વત્તબ્બા – ‘‘સહેતુકા ચેવ ન ચ હેતૂ’’તિ.

ચત્તારિન્દ્રિયા હેતૂ ચેવ હેતુસમ્પયુત્તા ચ. નવિન્દ્રિયા ન વત્તબ્બા – ‘‘હેતૂ ચેવ હેતુસમ્પયુત્તા ચા’’તિપિ, ‘‘હેતુસમ્પયુત્તા ચેવ ન ચ હેતૂ’’તિપિ. તીણિન્દ્રિયા ન વત્તબ્બા – ‘‘હેતૂ ચેવ હેતુસમ્પયુત્તા ચા’’તિ, ‘‘હેતુસમ્પયુત્તા ચેવ ન ચ હેતૂ’’. છ ઇન્દ્રિયા ન વત્તબ્બા – ‘‘હેતૂ ચેવ હેતુસમ્પયુત્તા ચા’’તિ, સિયા હેતુસમ્પયુત્તા ચેવ ન ચ હેતૂ, સિયા ન વત્તબ્બા – ‘‘હેતુસમ્પયુત્તા ચેવ ન ચ હેતૂ’’તિ.

નવિન્દ્રિયા ન હેતૂ અહેતુકા. તીણિન્દ્રિયા ન હેતૂ સહેતુકા. ચત્તારિન્દ્રિયા ન વત્તબ્બા – ‘‘ન હેતૂ સહેતુકા’’તિપિ, ‘‘ન હેતૂ અહેતુકા’’તિપિ. છ ઇન્દ્રિયા સિયા ન હેતૂ સહેતુકા, સિયા ન હેતૂ અહેતુકા.

સપ્પચ્ચયા. સઙ્ખતા. અનિદસ્સના. પઞ્ચિન્દ્રિયા સપ્પટિઘા. સત્તરસિન્દ્રિયા અપ્પટિઘા. સત્તિન્દ્રિયા રૂપા. ચુદ્દસિન્દ્રિયા અરૂપા. જીવિતિન્દ્રિયં સિયા રૂપં, સિયા અરૂપં. દસિન્દ્રિયા લોકિયા. તીણિન્દ્રિયા લોકુત્તરા. નવિન્દ્રિયા સિયા લોકિયા, સિયા લોકુત્તરા; કેનચિ વિઞ્ઞેય્યા, કેનચિ ન વિઞ્ઞેય્યા.

નો આસવા. દસિન્દ્રિયા સાસવા. તીણિન્દ્રિયા અનાસવા. નવિન્દ્રિયા સિયા સાસવા, સિયા અનાસવા. પન્નરસિન્દ્રિયા આસવવિપ્પયુત્તા. દોમનસ્સિન્દ્રિયં આસવસમ્પયુત્તં. છ ઇન્દ્રિયા સિયા આસવસમ્પયુત્તા, સિયા આસવવિપ્પયુત્તા. દસિન્દ્રિયા ન વત્તબ્બા – ‘‘આસવા ચેવ સાસવા ચા’’તિ, ‘‘સાસવા ચેવ નો ચ આસવા’’. તીણિન્દ્રિયા ન વત્તબ્બા – ‘‘આસવા ચેવ સાસવા ચા’’તિપિ, ‘‘સાસવા ચેવ નો ચ આસવા’’તિપિ. નવિન્દ્રિયા ન વત્તબ્બા – ‘‘આસવા ચેવ સાસવા ચા’’તિ, સિયા સાસવા ચેવ નો ચ આસવા, સિયા ન વત્તબ્બા – ‘‘સાસવા ચેવ નો ચ આસવા’’તિ.

પન્નરસિન્દ્રિયા ન વત્તબ્બા – ‘‘આસવા ચેવ આસવસમ્પયુત્તા ચા’’તિપિ, ‘‘આસવસમ્પયુત્તા ચેવ નો ચ આસવા’’તિપિ. દોમનસ્સિન્દ્રિયં ન વત્તબ્બં – ‘‘આસવો ચેવ આસવસમ્પયુત્તઞ્ચા’’તિ, ‘‘આસવસમ્પયુત્તઞ્ચેવ નો ચ આસવો’’. છ ઇન્દ્રિયા ન વત્તબ્બા – ‘‘આસવા ચેવ આસવસમ્પયુત્તા ચા’’તિ, સિયા આસવસમ્પયુત્તા ચેવ નો ચ આસવા, સિયા ન વત્તબ્બા – ‘‘આસવસમ્પયુત્તા ચેવ નો ચ આસવા’’તિ. નવિન્દ્રિયા આસવવિપ્પયુત્તસાસવા. તીણિન્દ્રિયા આસવવિપ્પયુત્તઅનાસવા. દોમનસ્સિન્દ્રિયં ન વત્તબ્બં – ‘‘આસવવિપ્પયુત્તસાસવ’’ન્તિપિ, ‘‘આસવવિપ્પયુત્તઅનાસવ’’ન્તિપિ. તીણિન્દ્રિયા સિયા આસવવિપ્પયુત્તસાસવા, સિયા આસવવિપ્પયુત્તઅનાસવા. છ ઇન્દ્રિયા સિયા આસવવિપ્પયુત્તસાસવા, સિયા આસવવિપ્પયુત્તઅનાસવા, સિયા ન વત્તબ્બા – ‘‘આસવવિપ્પયુત્તસાસવા’’તિપિ, ‘‘આસવવિપ્પયુત્તઅનાસવા’’તિપિ.

નો સંયોજના. દસિન્દ્રિયા સંયોજનિયા. તીણિન્દ્રિયા અસંયોજનિયા. નવિન્દ્રિયા સિયા સંયોજનિયા, સિયા અસંયોજનિયા. પન્નરસિન્દ્રિયા સંયોજનવિપ્પયુત્તા. દોમનસ્સિન્દ્રિયં સંયોજનસમ્પયુત્તં. છ ઇન્દ્રિયા સિયા સંયોજનસમ્પયુત્તા, સિયા સંયોજનવિપ્પયુત્તા. દસિન્દ્રિયા ન વત્તબ્બા – ‘‘સંયોજના ચેવ સંયોજનિયા ચા’’તિ, સંયોજનિયા ચેવ નો ચ સંયોજના. તીણિન્દ્રિયા ન વત્તબ્બા – ‘‘સંયોજના ચેવ સંયોજનિયા ચા’’તિપિ, ‘‘સંયોજનિયા ચેવ નો ચ સંયોજના’’તિપિ. નવિન્દ્રિયા ન વત્તબ્બા – ‘‘સંયોજના ચેવ સંયોજનિયા ચા’’તિ, સિયા સંયોજનિયા ચેવ નો ચ સંયોજના, સિયા ન વત્તબ્બા – ‘‘સંયોજનિયા ચેવ નો ચ સંયોજના’’તિ.

પન્નરસિન્દ્રિયા ન વત્તબ્બા – ‘‘સંયોજના ચેવ સંયોજનસમ્પયુત્તા ચા’’તિપિ, ‘‘સંયોજનસમ્પયુત્તા ચેવ નો ચ સંયોજના’’તિપિ. દોમનસ્સિન્દ્રિયં ન વત્તબ્બં – ‘‘સંયોજનઞ્ચેવ સંયોજનસમ્પયુત્તઞ્ચા’’તિ, સંયોજનસમ્પયુત્તઞ્ચેવ નો ચ સંયોજનં. છ ઇન્દ્રિયા ન વત્તબ્બા – ‘‘સંયોજના ચેવ સંયોજનસમ્પયુત્તા ચા’’તિ, સિયા સંયોજનસમ્પયુત્તા ચેવ નો ચ સંયોજના, સિયા ન વત્તબ્બા – ‘‘સંયોજનસમ્પયુત્તા ચેવ નો ચ સંયોજના’’તિ.

નવિન્દ્રિયા સંયોજનવિપ્પયુત્તસંયોજનિયા. તીણિન્દ્રિયા સંયોજનવિપ્પયુત્તઅસંયોજનિયા. દોમનસ્સિન્દ્રિયં ન વત્તબ્બં – ‘‘સંયોજનવિપ્પયુત્તસંયોજનિય’’ન્તિપિ, ‘‘સંયોજનવિપ્પયુત્તઅસંયોજનિય’’ન્તિપિ. તીણિન્દ્રિયા સિયા સંયોજનવિપ્પયુત્તસંયોજનિયા, સિયા સંયોજનવિપ્પયુત્તઅસંયોજનિયા. છ ઇન્દ્રિયા સિયા સંયોજનવિપ્પયુત્તસંયોજનિયા, સિયા સંયોજનવિપ્પયુત્તઅસંયોજનિયા, સિયા ન વત્તબ્બા – ‘‘સંયોજનવિપ્પયુત્તસંયોજનિયા’’તિપિ, ‘‘સંયોજનવિપ્પયુત્તઅસંયોજનિયા’’તિપિ.

નો ગન્થા. દસિન્દ્રિયા ગન્થનિયા. તીણિન્દ્રિયા અગન્થનિયા. નવિન્દ્રિયા સિયા ગન્થનિયા, સિયા અગન્થનિયા. પન્નરસિન્દ્રિયા ગન્થવિપ્પયુત્તા. દોમનસ્સિન્દ્રિયં ગન્થસમ્પયુત્તં. છ ઇન્દ્રિયા સિયા ગન્થસમ્પયુત્તા, સિયા ગન્થવિપ્પયુત્તા. દસિન્દ્રિયા ન વત્તબ્બા – ‘‘ગન્થા ચેવ ગન્થનિયા ચા’’તિ, ગન્થનિયા ચેવ નો ચ ગન્થા. તીણિન્દ્રિયા ન વત્તબ્બા – ‘‘ગન્થા ચેવ ગન્થનિયા ચા’’તિપિ, ‘‘ગન્થનિયા ચેવ નો ચ ગન્થા’’તિપિ. નવિન્દ્રિયા ન વત્તબ્બા – ‘‘ગન્થા ચેવ ગન્થનિયા ચા’’તિ, સિયા ગન્થનિયા ચેવ નો ચ ગન્થા, સિયા ન વત્તબ્બા – ‘‘ગન્થનિયા ચેવ નો ચ ગન્થા’’તિ.

પન્નરસિન્દ્રિયા ન વત્તબ્બા – ‘‘ગન્થા ચેવ ગન્થસમ્પયુત્તા ચા’’તિપિ, ‘‘ગન્થસમ્પયુત્તા ચેવ નો ચ ગન્થા’’તિપિ. દોમનસ્સિન્દ્રિયં ન વત્તબ્બં – ‘‘ગન્થો ચેવ ગન્થસમ્પયુત્ત’’ઞ્ચાતિ, ગન્થસમ્પયુત્તઞ્ચેવ નો ચ ગન્થો. છ ઇન્દ્રિયા ન વત્તબ્બા – ‘‘ગન્થા ચેવ ગન્થસમ્પયુત્તા ચા’’તિ, સિયા ગન્થસમ્પયુત્તા ચેવ નો ચ ગન્થા, સિયા ન વત્તબ્બા – ‘‘ગન્થસમ્પયુત્તા ચેવ નો ચ ગન્થા’’તિ.

નવિન્દ્રિયા ગન્થવિપ્પયુત્તગન્થનિયા. તીણિન્દ્રિયા ગન્થવિપ્પયુત્તઅગન્થનિયા. દોમનસ્સિન્દ્રિયં ન વત્તબ્બં – ‘‘ગન્થવિપ્પયુત્તગન્થનિય’’ન્તિપિ, ‘‘ગન્થવિપ્પયુત્તઅગન્થનિય’’ન્તિપિ. તીણિન્દ્રિયા સિયા ગન્થવિપ્પયુત્તગન્થનિયા, સિયા ગન્થવિપ્પયુત્તઅગન્થનિયા. છ ઇન્દ્રિયા સિયા ગન્થવિપ્પયુત્તગન્થનિયા, સિયા ગન્થવિપ્પયુત્તઅગન્થનિયા, સિયા ન વત્તબ્બા – ‘‘ગન્થવિપ્પયુત્તગન્થનિયા’’તિપિ, ‘‘ગન્થવિપ્પયુત્તઅગન્થનિયા’’તિપિ.

નો ઓઘા…પે… નો યોગા…પે… નો નીવરણા. દસિન્દ્રિયા નીવરણિયા. તીણિન્દ્રિયા અનીવરણિયા. નવિન્દ્રિયા સિયા નીવરણિયા, સિયા અનીવરણિયા. પન્નરસિન્દ્રિયા નીવરણવિપ્પયુત્તા. દોમનસ્સિન્દ્રિયં નીવરણસમ્પયુત્તં. છ ઇન્દ્રિયા સિયા નીવરણસમ્પયુત્તા, સિયા નીવરણવિપ્પયુત્તા. દસિન્દ્રિયા ન વત્તબ્બા – ‘‘નીવરણા ચેવ નીવરણિયા ચા’’તિ, નીવરણિયા ચેવ નો ચ નીવરણા. તીણિન્દ્રિયા ન વત્તબ્બા – ‘‘નીવરણા ચેવ નીવરણિયા ચા’’તિપિ, ‘‘નીવરણિયા ચેવ નો ચ નીવરણા’’તિપિ. નવિન્દ્રિયા ન વત્તબ્બા – ‘‘નીવરણા ચેવ નીવરણિયા ચા’’તિ, સિયા નીવરણિયા ચેવ નો ચ નીવરણા, સિયા ન વત્તબ્બા – ‘‘નીવરણિયા ચેવ નો ચ નીવરણા’’તિ.

પન્નરસિન્દ્રિયા ન વત્તબ્બા – ‘‘નીવરણા ચેવ નીવરણસમ્પયુત્તા ચા’’તિપિ, ‘‘નીવરણસમ્પયુત્તા ચેવ નો ચ નીવરણા’’તિપિ. દોમનસ્સિન્દ્રિયં ન વત્તબ્બં – ‘‘નીવરણઞ્ચેવ નીવરણસમ્પયુત્તઞ્ચા’’તિ, નીવરણસમ્પયુત્તઞ્ચેવ નો ચ નીવરણં. છ ઇન્દ્રિયા ન વત્તબ્બા – ‘‘નીવરણા ચેવ નીવરણસમ્પયુત્તા ચા’’તિ, સિયા નીવરણસમ્પયુત્તા ચેવ નો ચ નીવરણા, સિયા ન વત્તબ્બા – ‘‘નીવરણસમ્પયુત્તા ચેવ નો ચ નીવરણા’’તિ.

નવિન્દ્રિયા નીવરણવિપ્પયુત્તનીવરણિયા. તીણિન્દ્રિયા નીવરણવિપ્પયુત્તઅનીવરણિયા. દોમનસ્સિન્દ્રિયં ન વત્તબ્બં – ‘‘નીવરણવિપ્પયુત્તનીવરણિય’’ન્તિપિ, ‘‘નીવરણવિપ્પયુત્તઅનીવરણિય’’ન્તિપિ. તીણિન્દ્રિયા સિયા નીવરણવિપ્પયુત્તનીવરણિયા, સિયા નીવરણવિપ્પયુત્તઅનીવરણિયા. છ ઇન્દ્રિયા સિયા નીવરણવિપ્પયુત્તનીવરણિયા, સિયા નીવરણવિપ્પયુત્તઅનીવરણિયા, સિયા ન વત્તબ્બા – ‘‘નીવરણવિપ્પયુત્તનીવરણિયા’’તિપિ, ‘‘નીવરણવિપ્પયુત્તઅનીવરણિયા’’તિપિ.

નો પરામાસા. દસિન્દ્રિયા પરામટ્ઠા. તીણિન્દ્રિયા અપરામટ્ઠા. નવિન્દ્રિયા સિયા પરામટ્ઠા, સિયા અપરામટ્ઠા. સોળસિન્દ્રિયા પરામાસવિપ્પયુત્તા. છ ઇન્દ્રિયા સિયા પરામાસસમ્પયુત્તા, સિયા પરામાસવિપ્પયુત્તા. દસિન્દ્રિયા ન વત્તબ્બા – ‘‘પરામાસા ચેવ પરામટ્ઠા ચા’’તિ, પરામટ્ઠા ચેવ નો ચ પરામાસા. તીણિન્દ્રિયા ન વત્તબ્બા – ‘‘પરામાસા ચેવ પરામટ્ઠા ચા’’તિપિ, ‘‘પરામટ્ઠા ચેવ નો ચ પરામાસા’’તિપિ. નવિન્દ્રિયા ન વત્તબ્બા – ‘‘પરામાસા ચેવ પરામટ્ઠા ચા’’તિ, સિયા પરામટ્ઠા ચેવ નો ચ પરામાસા, સિયા ન વત્તબ્બા – ‘‘પરામટ્ઠા ચેવ નો ચ પરામાસા’’તિ. દસિન્દ્રિયા પરામાસવિપ્પયુત્તપરામટ્ઠા. તીણિન્દ્રિયા પરામાસવિપ્પયુત્તઅપરામટ્ઠા. તીણિન્દ્રિયા સિયા પરામાસવિપ્પયુત્તપરામટ્ઠા, સિયા પરામાસવિપ્પયુત્તઅપરામટ્ઠા. છ ઇન્દ્રિયા સિયા પરામાસવિપ્પયુત્તપરામટ્ઠા, સિયા પરામાસવિપ્પયુત્તઅપરામટ્ઠા, સિયા ન વત્તબ્બા – ‘‘પરામાસવિપ્પયુત્તપરામટ્ઠા’’તિપિ, ‘‘પરામાસવિપ્પયુત્તઅપરામટ્ઠા’’તિપિ.

સત્તિન્દ્રિયા અનારમ્મણા. ચુદ્દસિન્દ્રિયા સારમ્મણા. જીવિતિન્દ્રિયં સિયા સારમ્મણં, સિયા અનારમ્મણં. એકવીસતિન્દ્રિયા નો ચિત્તા. મનિન્દ્રિયં ચિત્તં. તેરસિન્દ્રિયા ચેતસિકા. અટ્ઠિન્દ્રિયા અચેતસિકા. જીવિતિન્દ્રિયં સિયા ચેતસિકં, સિયા અચેતસિકં. તેરસિન્દ્રિયા ચિત્તસમ્પયુત્તા. સત્તિન્દ્રિયા ચિત્તવિપ્પયુત્તા. જીવિતિન્દ્રિયં સિયા ચિત્તસમ્પયુત્તં, સિયા ચિત્તવિપ્પયુત્તં. મનિન્દ્રિયં ન વત્તબ્બં – ‘‘ચિત્તેન સમ્પયુત્ત’’ન્તિપિ, ‘‘ચિત્તેન વિપ્પયુત્ત’’ન્તિપિ.

તેરસિન્દ્રિયા ચિત્તસંસટ્ઠા. સત્તિન્દ્રિયા ચિત્તવિસંસટ્ઠા. જીવિતિન્દ્રિયં સિયા ચિત્તસંસટ્ઠં, સિયા ચિત્તવિસંસટ્ઠં. મનિન્દ્રિયં ન વત્તબ્બં – ‘‘ચિત્તેન સંસટ્ઠ’’ન્તિપિ, ‘‘ચિત્તેન વિસંસટ્ઠ’’ન્તિપિ. તેરસિન્દ્રિયા ચિત્તસમુટ્ઠાના. અટ્ઠિન્દ્રિયા નો ચિત્તસમુટ્ઠાના. જીવિતિન્દ્રિયં સિયા ચિત્તસમુટ્ઠાનં, સિયા નો ચિત્તસમુટ્ઠાનં.

તેરસિન્દ્રિયા ચિત્તસહભુનો. અટ્ઠિન્દ્રિયા નો ચિત્તસહભુનો. જીવિતિન્દ્રિયં સિયા ચિત્તસહભૂ, સિયા નો ચિત્તસહભૂ. તેરસિન્દ્રિયા ચિત્તાનુપરિવત્તિનો. અટ્ઠિન્દ્રિયા નો ચિત્તાનુપરિવત્તિનો. જીવિતિન્દ્રિયં સિયા ચિત્તાનુપરિવત્તિ, સિયા નો ચિત્તાનુપરિવત્તિ.

તેરસિન્દ્રિયા ચિત્તસંસટ્ઠસમુટ્ઠાના. અટ્ઠિન્દ્રિયા નો ચિત્તસંસટ્ઠસમુટ્ઠાના. જીવિતિન્દ્રિયં સિયા ચિત્તસંસટ્ઠસમુટ્ઠાનં, સિયા નો ચિત્તસંસટ્ઠસમુટ્ઠાનં. તેરસિન્દ્રિયા ચિત્તસંસટ્ઠસમુટ્ઠાનસહભુનો. અટ્ઠિન્દ્રિયા નો ચિત્તસંસટ્ઠસમુટ્ઠાનસહભુનો. જીવિતિન્દ્રિયં સિયા ચિત્તસંસટ્ઠસમુટ્ઠાનસહભૂ, સિયા નો ચિત્તસંસટ્ઠસમુટ્ઠાનસહભૂ. તેરસિન્દ્રિયા ચિત્તસંસટ્ઠસમુટ્ઠાનાનુપરિવત્તિનો. અટ્ઠિન્દ્રિયા નો ચિત્તસંસટ્ઠસમુટ્ઠાનાનુપરિવત્તિનો. જીવિતિન્દ્રિયં સિયા ચિત્તસંસટ્ઠસમુટ્ઠાનાનુપરિવત્તિ, સિયા નો ચિત્તસંસટ્ઠસમુટ્ઠાનાનુપરિવત્તિ. છ ઇન્દ્રિયા અજ્ઝત્તિકા. સોળસિન્દ્રિયા બાહિરા.

સત્તિન્દ્રિયા ઉપાદા. ચુદ્દસિન્દ્રિયા નો ઉપાદા. જીવિતિન્દ્રિયં સિયા ઉપાદા, સિયા નો ઉપાદા. નવિન્દ્રિયા ઉપાદિન્ના. ચત્તારિન્દ્રિયા અનુપાદિન્ના. નવિન્દ્રિયા સિયા ઉપાદિન્ના, સિયા અનુપાદિન્ના. નો ઉપાદાના. દસિન્દ્રિયા ઉપાદાનિયા. તીણિન્દ્રિયા અનુપાદાનિયા. નવિન્દ્રિયા સિયા ઉપાદાનિયા, સિયા અનુપાદાનિયા. સોળસિન્દ્રિયા ઉપાદાનવિપ્પયુત્તા. છ ઇન્દ્રિયા સિયા ઉપાદાનસમ્પયુત્તા, સિયા ઉપાદાનવિપ્પયુત્તા. દસિન્દ્રિયા ન વત્તબ્બા – ‘‘ઉપાદાના ચેવ ઉપાદાનિયા ચા’’તિ, ઉપાદાનિયા ચેવ નો ચ ઉપાદાના. તીણિન્દ્રિયા ન વત્તબ્બા – ‘‘ઉપાદાના ચેવ ઉપાદાનિયા ચા’’તિપિ, ‘‘ઉપાદાનિયા ચેવ નો ચ ઉપાદાના’’તિપિ. નવિન્દ્રિયા ન વત્તબ્બા – ‘‘ઉપાદાના ચેવ ઉપાદાનિયા ચા’’તિ, સિયા ઉપાદાનિયા ચેવ નો ચ ઉપાદાના. દસિન્દ્રિયા સિયા ઉપાદાનિયા ચેવ નો ચ ઉપાદાના, સિયા ન વત્તબ્બા – ‘‘ઉપાદાનિયા ચેવ નો ચ ઉપાદાના’’તિ.

સોળસિન્દ્રિયા ન વત્તબ્બા – ‘‘ઉપાદાના ચેવ ઉપાદાનસમ્પયુત્તા ચા’’તિપિ, ‘‘ઉપાદાનસમ્પયુત્તા ચેવ નો ચ ઉપાદાના’’તિપિ. છ ઇન્દ્રિયા ન વત્તબ્બા – ‘‘ઉપાદાના ચેવ ઉપાદાનસમ્પયુત્તા ચા’’તિ, સિયા ઉપાદાનસમ્પયુત્તા ચેવ નો ચ ઉપાદાના, સિયા ન વત્તબ્બા – ‘‘ઉપાદાનસમ્પયુત્તા ચેવ નો ચ ઉપાદાના’’તિ. દસિન્દ્રિયા ઉપાદાનવિપ્પયુત્તઉપાદાનિયા. તીણિન્દ્રિયા ઉપાદાનવિપ્પયુત્તઅનુપાદાનિયા. તીણિન્દ્રિયા સિયા ઉપાદાનવિપ્પયુત્તઉપાદાનિયા, સિયા ઉપાદાનવિપ્પયુત્તઅનુપાદાનિયા. છ ઇન્દ્રિયા સિયા ઉપાદાનવિપ્પયુત્તઉપાદાનિયા, સિયા ઉપાદાનવિપ્પયુત્તઅનુપાદાનિયા, સિયા ન વત્તબ્બા – ‘‘ઉપાદાનવિપ્પયુત્તઉપાદાનિયા’’તિપિ, ‘‘ઉપાદાનવિપ્પયુત્તઅનુપાદાનિયા’’તિપિ.

નો કિલેસા. દસિન્દ્રિયા સંકિલેસિકા. તીણિન્દ્રિયા અસંકિલેસિકા. નવિન્દ્રિયા સિયા સંકિલેસિકા, સિયા અસંકિલેસિકા. પન્નરસિન્દ્રિયા અસંકિલિટ્ઠા. દોમનસ્સિન્દ્રિયં સંકિલિટ્ઠં. છ ઇન્દ્રિયા સિયા સંકિલિટ્ઠા, સિયા અસંકિલિટ્ઠા. પન્નરસિન્દ્રિયા કિલેસવિપ્પયુત્તા. દોમનસ્સિન્દ્રિયં કિલેસસમ્પયુત્તં. છ ઇન્દ્રિયા સિયા કિલેસસમ્પયુત્તા, સિયા કિલેસવિપ્પયુત્તા. દસિન્દ્રિયા ન વત્તબ્બા – ‘‘કિલેસા ચેવ સંકિલેસિકા ચા’’તિ, સંકિલેસિકા ચેવ નો ચ કિલેસા. તીણિન્દ્રિયા ન વત્તબ્બા – ‘‘કિલેસા ચેવ સંકિલેસિકા ચા’’તિપિ, ‘‘સંકિલેસિકા ચેવ નો ચ કિલેસા’’તિપિ. નવિન્દ્રિયા ન વત્તબ્બા – ‘‘કિલેસા ચેવ સંકિલેસિકા ચા’’તિ, સિયા સંકિલેસિકા ચેવ નો ચ કિલેસા, સિયા ન વત્તબ્બા – ‘‘સંકિલેસિકા ચેવ નો ચ કિલેસા’’તિ.

પન્નરસિન્દ્રિયા ન વત્તબ્બા – ‘‘કિલેસા ચેવ સંકિલિટ્ઠા ચા’’તિપિ, ‘‘સંકિલિટ્ઠા ચેવ નો ચ કિલેસા’’તિપિ. દોમનસ્સિન્દ્રિયં ન વત્તબ્બં – ‘‘કિલેસો ચેવ સંકિલિટ્ઠઞ્ચા’’તિ, સંકિલિટ્ઠઞ્ચેવ નો ચ કિલેસો. છ ઇન્દ્રિયા ન વત્તબ્બા – ‘‘કિલેસા ચેવ સંકિલિટ્ઠા ચા’’તિ, સિયા સંકિલિટ્ઠા ચેવ નો ચ કિલેસા, સિયા ન વત્તબ્બા – ‘‘સંકિલિટ્ઠા ચેવ નો ચ કિલેસા’’તિ.

પન્નરસિન્દ્રિયા ન વત્તબ્બા – ‘‘કિલેસા ચેવ કિલેસસમ્પયુત્તા ચા’’તિપિ, ‘‘કિલેસસમ્પયુત્તા ચેવ નો ચ કિલેસા’’તિપિ. દોમનસ્સિન્દ્રિયં ન વત્તબ્બં – ‘‘કિલેસો ચેવ કિલેસસમ્પયુત્તઞ્ચા’’તિ, કિલેસસમ્પયુત્તઞ્ચેવ નો ચ કિલેસો. છ ઇન્દ્રિયા ન વત્તબ્બા – ‘‘કિલેસા ચેવ કિલેસસમ્પયુત્તા ચા’’તિ, સિયા કિલેસસમ્પયુત્તા ચેવ નો ચ કિલેસા, સિયા ન વત્તબ્બા – ‘‘કિલેસસમ્પયુત્તા ચેવ નો ચ કિલેસા’’તિ. નવિન્દ્રિયા કિલેસવિપ્પયુત્તસંકિલેસિકા. તીણિન્દ્રિયા કિલેસવિપ્પયુત્તઅસંકિલેસિકા. દોમનસ્સિન્દ્રિયં ન વત્તબ્બં – ‘‘કિલેસવિપ્પયુત્તસંકિલેસિક’’ન્તિપિ, ‘‘કિલેસવિપ્પયુત્તઅસંકિલેસિક’’ન્તિપિ. તીણિન્દ્રિયા સિયા કિલેસવિપ્પયુત્તસંકિલેસિકા, સિયા કિલેસવિપ્પયુત્તઅસંકિલેસિકા. છ ઇન્દ્રિયા સિયા કિલેસવિપ્પયુત્તસંકિલેસિકા, સિયા કિલેસવિપ્પયુત્તઅસંકિલેસિકા, સિયા ન વત્તબ્બા – ‘‘કિલેસવિપ્પયુત્તસંકિલેસિકા’’તિપિ, ‘‘કિલેસવિપ્પયુત્તઅસંકિલેસિકા’’તિપિ.

પન્નરસિન્દ્રિયા ન દસ્સનેન પહાતબ્બા. સત્તિન્દ્રિયા સિયા દસ્સનેન પહાતબ્બા, સિયા ન દસ્સનેન પહાતબ્બા. પન્નરસિન્દ્રિયા ન ભાવનાય પહાતબ્બા. સત્તિન્દ્રિયા સિયા ભાવનાય પહાતબ્બા, સિયા ન ભાવનાય પહાતબ્બા. પન્નરસિન્દ્રિયા ન દસ્સનેન પહાતબ્બહેતુકા. સત્તિન્દ્રિયા સિયા દસ્સનેન પહાતબ્બહેતુકા, સિયા ન દસ્સનેન પહાતબ્બહેતુકા. પન્નરસિન્દ્રિયા ન ભાવનાય પહાતબ્બહેતુકા. સત્તિન્દ્રિયા સિયા ભાવનાય પહાતબ્બહેતુકા, સિયા ન ભાવનાય પહાતબ્બહેતુકા.

નવિન્દ્રિયા અવિતક્કા. દોમનસ્સિન્દ્રિયં સવિતક્કં. દ્વાદસિન્દ્રિયા સિયા સવિતક્કા, સિયા અવિતક્કા. નવિન્દ્રિયા અવિચારા. દોમનસ્સિન્દ્રિયં સવિચારં. દ્વાદસિન્દ્રિયા સિયા સવિચારા, સિયા અવિચારા. એકાદસિન્દ્રિયા અપ્પીતિકા. એકાદસિન્દ્રિયા સિયા સપ્પીતિકા, સિયા અપ્પીતિકા. એકાદસિન્દ્રિયા ન પીતિસહગતા. એકાદસિન્દ્રિયા સિયા પીતિસહગતા, સિયા ન પીતિસહગતા. દ્વાદસિન્દ્રિયા ન સુખસહગતા. દસિન્દ્રિયા સિયા સુખસહગતા, સિયા ન સુખસહગતા. દ્વાદસિન્દ્રિયા ન ઉપેક્ખાસહગતા. દસિન્દ્રિયા સિયા ઉપેક્ખાસહગતા, સિયા ન ઉપેક્ખાસહગતા.

દસિન્દ્રિયા કામાવચરા. તીણિન્દ્રિયા ન કામાવચરા. નવિન્દ્રિયા સિયા કામાવચરા, સિયા ન કામાવચરા. તેરસિન્દ્રિયા ન રૂપાવચરા. નવિન્દ્રિયા સિયા રૂપાવચરા, સિયા ન રૂપાવચરા. ચુદ્દસિન્દ્રિયા ન અરૂપાવચરા. અટ્ઠિન્દ્રિયા સિયા અરૂપાવચરા, સિયા ન અરૂપાવચરા. દસિન્દ્રિયા પરિયાપન્ના. તીણિન્દ્રિયા અપરિયાપન્ના. નવિન્દ્રિયા સિયા પરિયાપન્ના, સિયા અપરિયાપન્ના. એકાદસિન્દ્રિયા અનિય્યાનિકા. અનઞ્ઞાતઞ્ઞસ્સામીતિન્દ્રિયં નિય્યાનિકં. દસિન્દ્રિયા સિયા નિય્યાનિકા, સિયા અનિય્યાનિકા. દસિન્દ્રિયા અનિયતા. અનઞ્ઞાતઞ્ઞસ્સામીતિન્દ્રિયં નિયતં. એકાદસિન્દ્રિયા સિયા નિયતા, સિયા અનિયતા. દસિન્દ્રિયા સઉત્તરા. તીણિન્દ્રિયા અનુત્તરા. નવિન્દ્રિયા સિયા સઉત્તરા, સિયા અનુત્તરા. પન્નરસિન્દ્રિયા અરણા. દોમનસ્સિન્દ્રિયં સરણં. છ ઇન્દ્રિયા સિયા સરણા, સિયા અરણાતિ.

પઞ્હાપુચ્છકં.

ઇન્દ્રિયવિભઙ્ગો નિટ્ઠિતો.