૨. વેદનાક્ખન્ધો

૮. તત્થ કતમો વેદનાક્ખન્ધો? યા કાચિ વેદના અતીતાનાગતપચ્ચુપ્પન્ના અજ્ઝત્તા વા બહિદ્ધા વા ઓળારિકા વા સુખુમા વા હીના વા પણીતા વા યા દૂરે સન્તિકે વા, તદેકજ્ઝં અભિસઞ્ઞૂહિત્વા અભિસઙ્ખિપિત્વા – અયં વુચ્ચતિ વેદનાક્ખન્ધો.

૯. તત્થ કતમા વેદના અતીતા? યા વેદના અતીતા નિરુદ્ધા વિગતા વિપરિણતા અત્થઙ્ગતા અબ્ભત્થઙ્ગતા ઉપ્પજ્જિત્વા વિગતા અતીતા અતીતંસેન સઙ્ગહિતા, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના અતીતા.

તત્થ કતમા વેદના અનાગતા? યા વેદના અજાતા અભૂતા અસઞ્જાતા અનિબ્બત્તા અનભિનિબ્બત્તા અપાતુભૂતા અનુપ્પન્ના અસમુપ્પન્ના અનુટ્ઠિતા અસમુટ્ઠિતા અનાગતા અનાગતંસેન સઙ્ગહિતા, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના અનાગતા.

તત્થ કતમા વેદના પચ્ચુપ્પન્ના? યા વેદના જાતા ભૂતા સઞ્જાતા નિબ્બત્તા અભિનિબ્બત્તા પાતુભૂતા ઉપ્પન્ના સમુપ્પન્ના ઉટ્ઠિતા સમુટ્ઠિતા પચ્ચુપ્પન્ના પચ્ચુપ્પન્નંસેન સઙ્ગહિતા, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના પચ્ચુપ્પન્ના.

૧૦. તત્થ કતમા વેદના અજ્ઝત્તા? યા વેદના તેસં તેસં સત્તાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના અજ્ઝત્તા.

તત્થ કતમા વેદના બહિદ્ધા? યા વેદના તેસં તેસં પરસત્તાનં પરપુગ્ગલાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના બહિદ્ધા.

૧૧. તત્થ કતમા વેદના ઓળારિકા સુખુમા? અકુસલા વેદના ઓળારિકા, કુસલાબ્યાકતા વેદના સુખુમા. કુસલાકુસલા વેદના ઓળારિકા, અબ્યાકતા વેદના સુખુમા. દુક્ખા વેદના ઓળારિકા, સુખા ચ અદુક્ખમસુખા ચ વેદના સુખુમા. સુખદુક્ખા વેદના ઓળારિકા, અદુક્ખમસુખા વેદના સુખુમા. અસમાપન્નસ્સ વેદના ઓળારિકા, સમાપન્નસ્સ વેદના સુખુમા. સાસવા વેદના ઓળારિકા, અનાસવા વેદના સુખુમા. તં તં વા પન વેદનં ઉપાદાયુપાદાય વેદના ઓળારિકા સુખુમા દટ્ઠબ્બા.

૧૨. તત્થ કતમા વેદના હીના પણીતા? અકુસલા વેદના હીના, કુસલાબ્યાકતા વેદના પણીતા. કુસલાકુસલા વેદના હીના, અબ્યાકતા વેદના પણીતા. દુક્ખા વેદના હીના, સુખા ચ અદુક્ખમસુખા ચ વેદના પણીતા. સુખદુક્ખા વેદના હીના, અદુક્ખમસુખા વેદના પણીતા. અસમાપન્નસ્સ વેદના હીના, સમાપન્નસ્સ વેદના પણીતા. સાસવા વેદના હીના, અનાસવા વેદના પણીતા. તં તં વા પન વેદનં ઉપાદાયુપાદાય વેદના હીના પણીતા દટ્ઠબ્બા.

૧૩. તત્થ કતમા વેદના દૂરે? અકુસલા વેદના કુસલાબ્યાકતાહિ વેદનાહિ દૂરે; કુસલાબ્યાકતા વેદના અકુસલાય વેદનાય દૂરે; કુસલા વેદના અકુસલાબ્યાકતાહિ વેદનાહિ દૂરે; અકુસલાબ્યાકતા વેદના કુસલાય વેદનાય દૂરે; અબ્યાકતા વેદના કુસલાકુસલાહિ વેદનાહિ દૂરે; કુસલાકુસલા વેદના અબ્યાકતાય વેદનાય દૂરે. દુક્ખા વેદના સુખાય ચ અદુક્ખમસુખાય ચ વેદનાહિ દૂરે; સુખા ચ અદુક્ખમસુખા ચ વેદના દુક્ખાય વેદનાય દૂરે; સુખા વેદના દુક્ખાય ચ અદુક્ખમસુખાય ચ વેદનાહિ દૂરે; દુક્ખા ચ અદુક્ખમસુખા ચ વેદના સુખાય વેદનાય દૂરે; અદુક્ખમસુખા વેદના સુખદુક્ખાહિ વેદનાહિ દૂરે; સુખદુક્ખા વેદના અદુક્ખમસુખાય વેદનાય દૂરે. અસમાપન્નસ્સ વેદના સમાપન્નસ્સ વેદનાય દૂરે; સમાપન્નસ્સ વેદના અસમાપન્નસ્સ વેદનાય દૂરે. સાસવા વેદના અનાસવાય વેદનાય દૂરે; અનાસવા વેદના સાસવાય વેદનાય દૂરે – અયં વુચ્ચતિ વેદના દૂરે.

તત્થ કતમા વેદના સન્તિકે? અકુસલા વેદના અકુસલાય વેદનાય સન્તિકે; કુસલા વેદના કુસલાય વેદનાય સન્તિકે; અબ્યાકતા વેદના અબ્યાકતાય વેદનાય સન્તિકે. દુક્ખા વેદના દુક્ખાય વેદનાય સન્તિકે; સુખા વેદના સુખાય વેદનાય સન્તિકે; અદુક્ખમસુખા વેદના અદુક્ખમસુખાય વેદનાય સન્તિકે. અસમાપન્નસ્સ વેદના અસમાપન્નસ્સ વેદનાય સન્તિકે; સમાપન્નસ્સ વેદના સમાપન્નસ્સ વેદનાય સન્તિકે. સાસવા વેદના સાસવાય વેદનાય સન્તિકે; અનાસવા વેદના અનાસવાય વેદનાય સન્તિકે. અયં વુચ્ચતિ વેદના સન્તિકે. તં તં વા પન વેદનં ઉપાદાયુપાદાય વેદના દૂરે સન્તિકે દટ્ઠબ્બા.