૧-૭. પટિચ્ચવારાદિ

પચ્ચયચતુક્કં

હેતુપચ્ચયો

૨૯. નહેતું નસનિદસ્સનસપ્પટિઘં ધમ્મં પટિચ્ચ નહેતુ નસનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નસનિદસ્સનસપ્પટિઘં ધમ્મં પટિચ્ચ નનહેતુ નસનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નસનિદસ્સનસપ્પટિઘં ધમ્મં પટિચ્ચ નહેતુ નસનિદસ્સનસપ્પટિઘો ચ નનહેતુ નસનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. (૩)

નનહેતું નસનિદસ્સનસપ્પટિઘં ધમ્મં પટિચ્ચ નનહેતુ નસનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નનહેતું નસનિદસ્સનસપ્પટિઘં ધમ્મં પટિચ્ચ નહેતુ નસનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નનહેતું નસનિદસ્સનસપ્પટિઘં ધમ્મં પટિચ્ચ નહેતુ નસનિદસ્સનસપ્પટિઘો ચ નનહેતુ નસનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. (૩)

નહેતું નસનિદસ્સનસપ્પટિઘઞ્ચ નનહેતું નસનિદસ્સનસપ્પટિઘઞ્ચ ધમ્મં પટિચ્ચ નહેતુ નસનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નસનિદસ્સનસપ્પટિઘઞ્ચ નનહેતું નસનિદસ્સનસપ્પટિઘઞ્ચ ધમ્મં પટિચ્ચ નનહેતુ નસનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નસનિદસ્સનસપ્પટિઘઞ્ચ નનહેતું નસનિદસ્સનસપ્પટિઘઞ્ચ ધમ્મં પટિચ્ચ નહેતુ નસનિદસ્સનસપ્પટિઘો ચ નનહેતુ નસનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. (૩) (સંખિત્તં.)

હેતુયા નવ…પે… અવિગતે નવ. (સબ્બત્થ નવ.)

૩૦. નહેતું નઅનિદસ્સનસપ્પટિઘં ધમ્મં પટિચ્ચ નહેતુ નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નઅનિદસ્સનસપ્પટિઘં ધમ્મં પટિચ્ચ નનહેતુ નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નઅનિદસ્સનસપ્પટિઘં ધમ્મં પટિચ્ચ નહેતુ નઅનિદસ્સનસપ્પટિઘો ચ નનહેતુ નઅનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. (૩)

નનહેતું નઅનિદસ્સનસપ્પટિઘં ધમ્મં પટિચ્ચ નનહેતુ નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નનહેતું નઅનિદસ્સનસપ્પટિઘં ધમ્મં પટિચ્ચ નહેતુ નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નનહેતું નઅનિદસ્સનસપ્પટિઘં ધમ્મં પટિચ્ચ નહેતુ નઅનિદસ્સનસપ્પટિઘો ચ નનહેતુ નઅનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. (૩)

નહેતું નઅનિદસ્સનસપ્પટિઘઞ્ચ નનહેતું નઅનિદસ્સનસપ્પટિઘઞ્ચ ધમ્મં પટિચ્ચ નહેતુ નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નઅનિદસ્સનસપ્પટિઘઞ્ચ નનહેતું નઅનિદસ્સનસપ્પટિઘઞ્ચ ધમ્મં પટિચ્ચ નનહેતુ નઅનિદસ્સનસપ્પટિઘો ધમ્મો ઉપ્પજ્જતિ હેતુપચ્ચયા. નહેતું નઅનિદસ્સનસપ્પટિઘઞ્ચ નનહેતું નઅનિદસ્સનસપ્પટિઘઞ્ચ ધમ્મં પટિચ્ચ નહેતુ નઅનિદસ્સનસપ્પટિઘો ચ નનહેતુ નઅનિદસ્સનસપ્પટિઘો ચ ધમ્મા ઉપ્પજ્જન્તિ હેતુપચ્ચયા. (૩) (સંખિત્તં.)

હેતુયા નવ…પે… અવિગતે નવ. (સહજાતવારેપિ…પે… સમ્પયુત્તવારેપિ સબ્બત્થ વિત્થારો.)

હેતુ-આરમ્મણપચ્ચયા

૩૧. નનહેતુ નઅનિદસ્સનસપ્પટિઘો ધમ્મો નનહેતુસ્સ નઅનિદસ્સનસપ્પટિઘસ્સ ધમ્મસ્સ હેતુપચ્ચયેન પચ્ચયો. નનહેતુ નઅનિદસ્સનસપ્પટિઘો ધમ્મો નહેતુસ્સ નઅનિદસ્સનસપ્પટિઘસ્સ ધમ્મસ્સ હેતુપચ્ચયેન પચ્ચયો. નનહેતુ નઅનિદસ્સનસપ્પટિઘો ધમ્મો નહેતુસ્સ નઅનિદસ્સનસપ્પટિઘસ્સ ચ નનહેતુસ્સ નઅનિદસ્સનસપ્પટિઘસ્સ ચ ધમ્મસ્સ હેતુપચ્ચયેન પચ્ચયો. (૩)

નહેતુ નઅનિદસ્સનસપ્પટિઘો ધમ્મો નહેતુસ્સ નઅનિદસ્સનસપ્પટિઘસ્સ ધમ્મસ્સ આરમ્મણપચ્ચયેન પચ્ચયો. (સંખિત્તં.)

હેતુયા તીણિ, આરમ્મણે નવ…પે… ઉપનિસ્સયે નવ, પુરેજાતે પચ્છાજાતે તીણિ, આસેવને નવ, કમ્મે તીણિ, વિપાકે નવ, આહારે તીણિ, ઇન્દ્રિયે નવ, ઝાને તીણિ, મગ્ગે સમ્પયુત્તે નવ, વિપ્પયુત્તે પઞ્ચ…પે… અવિગતે નવ. (પઞ્હાવારં એવં વિત્થારેતબ્બં.)

૩૨. નહેતું નઅનિદસ્સનઅપ્પટિઘં ધમ્મં પટિચ્ચ નહેતુ નઅનિદસ્સનઅપ્પટિઘો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

હેતુયા એકં. (સબ્બત્થ વિત્થારો.)