૧-૭. પટિચ્ચવારાદિ

પચ્ચયચતુક્કં

હેતુપચ્ચયો

૧૦. ગન્થનિયં કુસલં ધમ્મં પટિચ્ચ ગન્થનિયો કુસલો ધમ્મો ઉપ્પજ્જતિ હેતુપચ્ચયા. (૧)

અગન્થનિયં કુસલં ધમ્મં પટિચ્ચ અગન્થનિયો કુસલો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૧. હેતુયા દ્વે, આરમ્મણે દ્વે…પે… અવિગતે દ્વે (સંખિત્તં, લોકિયલોકુત્તરગમનસદિસં).

(સહજાતવારોપિ…પે… પઞ્હાવારોપિ વિત્થારેતબ્બા.)

૧૨. ગન્થનિયં અકુસલં ધમ્મં પટિચ્ચ ગન્થનિયો અકુસલો ધમ્મો ઉપ્પજ્જતિ હેતુપચ્ચયા (સંખિત્તં).

૧૩. હેતુયા એકં, આરમ્મણે એકં…પે… અવિગતે એકં (સંખિત્તં).

(સહજાતવારેપિ…પે… પઞ્હાવારેપિ સબ્બત્થ એકં.)

૧૪. ગન્થનિયં અબ્યાકતં ધમ્મં પટિચ્ચ ગન્થનિયો અબ્યાકતો ધમ્મો ઉપ્પજ્જતિ હેતુપચ્ચયા. (૧)

અગન્થનિયં અબ્યાકતં ધમ્મં પટિચ્ચ અગન્થનિયો અબ્યાકતો ધમ્મો ઉપ્પજ્જતિ હેતુપચ્ચયા… તીણિ. (૩)

ગન્થનિયં અબ્યાકતઞ્ચ અગન્થનિયં અબ્યાકતઞ્ચ ધમ્મં પટિચ્ચ ગન્થનિયો અબ્યાકતો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૫. હેતુયા પઞ્ચ, આરમ્મણે દ્વે…પે… અવિગતે પઞ્ચ (સંખિત્તં, લોકિયલોકુત્તરગમનસદિસં).

(સહજાતવારોપિ…પે… પઞ્હાવારોપિ વિત્થારેતબ્બા.)