૧-૭. પટિચ્ચવારાદિ

પચ્ચયચતુક્કં

હેતુપચ્ચયો

૫૦. લોકિયં અબ્યાકતં ધમ્મં પટિચ્ચ લોકિયો અબ્યાકતો ધમ્મો ઉપ્પજ્જતિ હેતુપચ્ચયા. (૧)

લોકુત્તરં અબ્યાકતં ધમ્મં પટિચ્ચ લોકુત્તરો અબ્યાકતો ધમ્મો ઉપ્પજ્જતિ હેતુપચ્ચયા… તીણિ.

લોકિયં અબ્યાકતઞ્ચ લોકુત્તરં અબ્યાકતઞ્ચ ધમ્મં પટિચ્ચ લોકિયો અબ્યાકતો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૫૧. હેતુયા પઞ્ચ, આરમ્મણે દ્વે…પે… આસેવને એકં, કમ્મે પઞ્ચ, વિપાકે પઞ્ચ…પે… અવિગતે પઞ્ચ (સંખિત્તં, અનુલોમં).

૫૨. નહેતુયા એકં, નઆરમ્મણે તીણિ, નઅધિપતિયા દ્વે…પે… નપુરેજાતે ચત્તારિ, નપચ્છાજાતે પઞ્ચ…પે… નકમ્મે એકં, નવિપાકે એકં, નઆહારે એકં…પે… નમગ્ગે એકં, નસમ્પયુત્તે તીણિ, નવિપ્પયુત્તે દ્વે, નોનત્થિયા તીણિ, નોવિગતે તીણિ (સંખિત્તં, પચ્ચનીયં).

(સહજાતવારોપિ પચ્ચયવારોપિ નિસ્સયવારોપિ સંસટ્ઠવારોપિ સમ્પયુત્તવારોપિ પટિચ્ચવારસદિસા વિત્થારેતબ્બા.)

પચ્ચયચતુક્કં

હેતુપચ્ચયો

૫૩. લોકિયો અબ્યાકતો ધમ્મો લોકિયસ્સ અબ્યાકતસ્સ ધમ્મસ્સ હેતુપચ્ચયેન પચ્ચયો. (૧)

લોકુત્તરો અબ્યાકતો ધમ્મો લોકુત્તરસ્સ અબ્યાકતસ્સ ધમ્મસ્સ હેતુપચ્ચયેન પચ્ચયો… તીણિ (સંખિત્તં).

૫૪. હેતુયા ચત્તારિ, આરમ્મણે તીણિ, અધિપતિયા ચત્તારિ, અનન્તરે ચત્તારિ, સહજાતે પઞ્ચ, અઞ્ઞમઞ્ઞે દ્વે, નિસ્સયે સત્ત, ઉપનિસ્સયે ચત્તારિ, પુરેજાતે દ્વે, પચ્છાજાતે દ્વે, આસેવને એકં, કમ્મે ચત્તારિ, વિપાકે ચત્તારિ, આહારે ચત્તારિ…પે… મગ્ગે ચત્તારિ, સમ્પયુત્તે દ્વે, વિપ્પયુત્તે તીણિ, અત્થિયા સત્ત…પે… અવિગતે સત્ત (સંખિત્તં).

(યથા કુસલત્તિકે પઞ્હાવારસ્સ અનુલોમમ્પિ પચ્ચનીયમ્પિ અનુલોમપચ્ચનીયમ્પિ પચ્ચનીયાનુલોમમ્પિ ગણિતં, એવં ગણેતબ્બં.)

લોકિયદુકકુસલત્તિકં નિટ્ઠિતં.