૧-૬. પટિચ્ચવારાદિ

પચ્ચયચતુક્કં

હેતુપચ્ચયો

૪૭. હેતુઞ્ચેવ સહેતુકઞ્ચ કુસલં ધમ્મં પટિચ્ચ હેતુ ચેવ સહેતુકો ચ કુસલો ધમ્મો ઉપ્પજ્જતિ હેતુપચ્ચયા… તીણિ.

સહેતુકઞ્ચેવ ન ચ હેતું કુસલં ધમ્મં પટિચ્ચ સહેતુકો ચેવ ન ચ હેતુ કુસલો ધમ્મો ઉપ્પજ્જતિ હેતુપચ્ચયા… તીણિ.

હેતુઞ્ચેવ સહેતુકઞ્ચ કુસલઞ્ચ સહેતુકઞ્ચેવ ન ચ હેતું કુસલઞ્ચ ધમ્મં પટિચ્ચ હેતુ ચેવ સહેતુકો ચ કુસલો ધમ્મો ઉપ્પજ્જતિ હેતુપચ્ચયા… તીણિ (સંખિત્તં).

૪૮. હેતુયા નવ, આરમ્મણે નવ…પે… કમ્મે નવ, આહારે નવ…પે… અવિગતે નવ (સંખિત્તં).

નઅધિપતિપચ્ચયો

૪૯. હેતુઞ્ચેવ સહેતુકઞ્ચ કુસલં ધમ્મં પટિચ્ચ હેતુ ચેવ સહેતુકો ચ કુસલો ધમ્મો ઉપ્પજ્જતિ નઅધિપતિપચ્ચયા (સંખિત્તં).

૫૦. નઅધિપતિયા નવ, નપુરેજાતે નવ, નપચ્છાજાતે નવ, નઆસેવને નવ, નકમ્મે તીણિ, નવિપાકે નવ, નવિપ્પયુત્તે નવ (સંખિત્તં).

હેતુપચ્ચયા નઅધિપતિયા નવ (સંખિત્તં).

નઅધિપતિપચ્ચયા હેતુયા નવ (સંખિત્તં).

(સહજાતવારોપિ પચ્ચયવારોપિ નિસ્સયવારોપિ સંસટ્ઠવારોપિ સમ્પયુત્તવારોપિ પટિચ્ચવારસદિસા વિત્થારેતબ્બા.)