૧-૭. પટિચ્ચવારાદિ

પચ્ચયચતુક્કં

૫૩. કુસલં સઉત્તરં ધમ્મં પટિચ્ચ કુસલો સઉત્તરો ધમ્મો ઉપ્પજ્જતિ હેતુપચ્ચયા… તીણિ.

અકુસલં સઉત્તરં ધમ્મં પટિચ્ચ અકુસલો સઉત્તરો ધમ્મો ઉપ્પજ્જતિ હેતુપચ્ચયા… તીણિ.

અબ્યાકતં સઉત્તરં ધમ્મં પટિચ્ચ અબ્યાકતો સઉત્તરો ધમ્મો ઉપ્પજ્જતિ હેતુપચ્ચયા. (૧)

કુસલં સઉત્તરઞ્ચ અબ્યાકતં સઉત્તરઞ્ચ ધમ્મં પટિચ્ચ અબ્યાકતો સઉત્તરો ધમ્મો ઉપ્પજ્જતિ હેતુપચ્ચયા. (૧)

અકુસલં સઉત્તરઞ્ચ અબ્યાકતં સઉત્તરઞ્ચ ધમ્મં પટિચ્ચ અબ્યાકતો સઉત્તરો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૫૪. હેતુયા નવ, આરમ્મણે તીણિ…પે… અવિગતે નવ (સંખિત્તં. સહજાતવારમ્પિ…પે… સમ્પયુત્તવારમ્પિ પટિચ્ચવારસદિસં).

૫૫. કુસલો સઉત્તરો ધમ્મો કુસલસ્સ સઉત્તરસ્સ ધમ્મસ્સ હેતુપચ્ચયેન પચ્ચયો… તીણિ.

અકુસલો સઉત્તરો ધમ્મો અકુસલસ્સ સઉત્તરસ્સ ધમ્મસ્સ હેતુપચ્ચયેન પચ્ચયો… તીણિ.

અબ્યાકતો સઉત્તરો ધમ્મો અબ્યાકતસ્સ સઉત્તરસ્સ ધમ્મસ્સ હેતુપચ્ચયેન પચ્ચયો. (૧) (સંખિત્તં.)

૫૬. હેતુયા સત્ત, આરમ્મણે નવ, અધિપતિયા નવ…પે… અવિગતે તેરસ (સંખિત્તં).

અનુત્તરપદં

હેતુ-આરમ્મણપચ્ચયા

૫૭. કુસલં અનુત્તરં ધમ્મં પટિચ્ચ કુસલો અનુત્તરો ધમ્મો ઉપ્પજ્જતિ હેતુપચ્ચયા. (૧)

અબ્યાકતં અનુત્તરં ધમ્મં પટિચ્ચ અબ્યાકતો અનુત્તરો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

હેતુયા દ્વે, આરમ્મણે દ્વે…પે… અવિગતે દ્વે (સંખિત્તં. સહજાતવારમ્પિ…પે… સમ્પયુત્તવારમ્પિ પટિચ્ચવારસદિસં).

૫૮. કુસલો અનુત્તરો ધમ્મો કુસલસ્સ અનુત્તરસ્સ ધમ્મસ્સ હેતુપચ્ચયેન પચ્ચયો. (૧)

અબ્યાકતો અનુત્તરો ધમ્મો અબ્યાકતસ્સ અનુત્તરસ્સ ધમ્મસ્સ હેતુપચ્ચયેન પચ્ચયો. (૧)

અબ્યાકતો અનુત્તરો ધમ્મો અબ્યાકતસ્સ અનુત્તરસ્સ ધમ્મસ્સ આરમ્મણપચ્ચયેન પચ્ચયો. (૧)

અબ્યાકતો અનુત્તરો ધમ્મો કુસલસ્સ અનુત્તરસ્સ ધમ્મસ્સ આરમ્મણપચ્ચયેન પચ્ચયો. (૧) (સંખિત્તં.)

૫૯. હેતુયા દ્વે, આરમ્મણે દ્વે, અધિપતિયા તીણિ, અનન્તરે દ્વે…પે… અવિગતે દ્વે (સંખિત્તં).

(યથા કુસલત્તિકે પઞ્હાવારં, એવં વિત્થારેતબ્બં.)