૧. વિભઙ્ગવારો

નહેતુપચ્ચયો

૫. કિલેસં ધમ્મં પટિચ્ચ કિલેસો ધમ્મો ઉપ્પજ્જતિ નહેતુપચ્ચયા – વિચિકિચ્છં પટિચ્ચ મોહો, ઉદ્ધચ્ચં પટિચ્ચ મોહો. (૧)

નોકિલેસં ધમ્મં પટિચ્ચ નોકિલેસો ધમ્મો ઉપ્પજ્જતિ નહેતુપચ્ચયા – અહેતુકં નોકિલેસં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… અહેતુકપટિસન્ધિક્ખણે…પે… (યાવ અસઞ્ઞસત્તા). (૧)

નોકિલેસં ધમ્મં પટિચ્ચ કિલેસો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૨)

કિલેસઞ્ચ નોકિલેસઞ્ચ ધમ્મં પટિચ્ચ કિલેસો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ખન્ધે ચ વિચિકિચ્છઞ્ચ પટિચ્ચ વિચિકિચ્છાસહગતો મોહો, ઉદ્ધચ્ચસહગતે ખન્ધે ચ ઉદ્ધચ્ચઞ્ચ પટિચ્ચ ઉદ્ધચ્ચસહગતો મોહો. (૧)

નઆરમ્મણપચ્ચયાદિ

૬. કિલેસં ધમ્મં પટિચ્ચ નોકિલેસો ધમ્મો ઉપ્પજ્જતિ નઆરમ્મણપચ્ચયા – કિલેસે પટિચ્ચ ચિત્તસમુટ્ઠાનં રૂપં. (૧)

નોકિલેસં ધમ્મં પટિચ્ચ નોકિલેસો ધમ્મો ઉપ્પજ્જતિ નઆરમ્મણપચ્ચયા – નોકિલેસે ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે… ખન્ધે પટિચ્ચ વત્થુ (યાવ અસઞ્ઞસત્તા). (૧)

કિલેસઞ્ચ નોકિલેસઞ્ચ ધમ્મં પટિચ્ચ નોકિલેસો ધમ્મો ઉપ્પજ્જતિ નઆરમ્મણપચ્ચયા – કિલેસે ચ સમ્પયુત્તકે ચ ખન્ધે પટિચ્ચ ચિત્તસમુટ્ઠાનં રૂપં, કિલેસે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

નઅધિપતિપચ્ચયા… નઅનન્તરપચ્ચયા… નસમનન્તરપચ્ચયા… નઅઞ્ઞમઞ્ઞપચ્ચયા… નઉપનિસ્સયપચ્ચયા.

નપુરેજાતપચ્ચયાદિ

૭. કિલેસં ધમ્મં પટિચ્ચ કિલેસો ધમ્મો ઉપ્પજ્જતિ નપુરેજાતપચ્ચયા – અરૂપે લોભં પટિચ્ચ મોહો દિટ્ઠિ થિનં ઉદ્ધચ્ચં અહિરિકં અનોત્તપ્પં, લોભં પટિચ્ચ મોહો દિટ્ઠિ ઉદ્ધચ્ચં અહિરિકં અનોત્તપ્પં, લોભં પટિચ્ચ મોહો માનો થિનં ઉદ્ધચ્ચં અહિરિકં અનોત્તપ્પં, લોભં પટિચ્ચ મોહો માનો ઉદ્ધચ્ચં અહિરિકં અનોત્તપ્પં, લોભં પટિચ્ચ મોહો થિનં ઉદ્ધચ્ચં અહિરિકં અનોત્તપ્પં, લોભં પટિચ્ચ મોહો ઉદ્ધચ્ચં અહિરિકં અનોત્તપ્પં; વિચિકિચ્છં પટિચ્ચ મોહો ઉદ્ધચ્ચં અહિરિકં અનોત્તપ્પં; ઉદ્ધચ્ચં પટિચ્ચ મોહો અહિરિકં અનોત્તપ્પં (અરૂપે દોસમૂલકં નત્થિ). (૧)

કિલેસં ધમ્મં પટિચ્ચ નોકિલેસો ધમ્મો ઉપ્પજ્જતિ નપુરેજાતપચ્ચયા – અરૂપે કિલેસે પટિચ્ચ સમ્પયુત્તકા ખન્ધા, કિલેસે પટિચ્ચ ચિત્તસમુટ્ઠાનં રૂપં (એવં નવપિ પઞ્હા કાતબ્બા), નપચ્છાજાતપચ્ચયા, નઆસેવનપચ્ચયા.

નકમ્મપચ્ચયો

૮. કિલેસં ધમ્મં પટિચ્ચ નોકિલેસો ધમ્મો ઉપ્પજ્જતિ નકમ્મપચ્ચયા – કિલેસે પટિચ્ચ સમ્પયુત્તકા ચેતના. (૧)

નોકિલેસં ધમ્મં પટિચ્ચ નોકિલેસો ધમ્મો ઉપ્પજ્જતિ નકમ્મપચ્ચયા – નોકિલેસે ખન્ધે પટિચ્ચ સમ્પયુત્તકા ચેતના; બાહિરં… આહારસમુટ્ઠાનં… ઉતુસમુટ્ઠાનં…પે…. (૧)

કિલેસઞ્ચ નોકિલેસઞ્ચ ધમ્મં પટિચ્ચ નોકિલેસો ધમ્મો ઉપ્પજ્જતિ નકમ્મપચ્ચયા – કિલેસે ચ સમ્પયુત્તકે ચ ખન્ધે પટિચ્ચ સમ્પયુત્તકા ચેતના. (૧) (એવં સબ્બે પચ્ચયા કાતબ્બા.)