૧. વિભઙ્ગવારો

હેતુપચ્ચયો

૫૧. સંકિલિટ્ઠો ધમ્મો સંકિલિટ્ઠસ્સ ધમ્મસ્સ હેતુપચ્ચયેન પચ્ચયો – સંકિલિટ્ઠા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

સંકિલિટ્ઠો ધમ્મો અસંકિલિટ્ઠસ્સ ધમ્મસ્સ હેતુપચ્ચયેન પચ્ચયો – સંકિલિટ્ઠા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

સંકિલિટ્ઠો ધમ્મો સંકિલિટ્ઠસ્સ ચ અસંકિલિટ્ઠસ્સ ચ ધમ્મસ્સ હેતુપચ્ચયેન પચ્ચયો – સંકિલિટ્ઠા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ હેતુપચ્ચયેન પચ્ચયો – અસંકિલિટ્ઠા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

આરમ્મણપચ્ચયો

૫૨. સંકિલિટ્ઠો ધમ્મો સંકિલિટ્ઠસ્સ ધમ્મસ્સ આરમ્મણપચ્ચયેન પચ્ચયો – રાગં અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ; વિચિકિચ્છા…પે… ઉદ્ધચ્ચ…પે… દોમનસ્સં ઉપ્પજ્જતિ; દિટ્ઠિં અસ્સાદેતિ…પે… (કુસલત્તિકસદિસં); વિચિકિચ્છં આરબ્ભ…પે… ઉદ્ધચ્ચં આરબ્ભ…પે… દોમનસ્સં ઉપ્પજ્જતિ; દિટ્ઠિ…પે… વિચિકિચ્છા…પે… ઉદ્ધચ્ચં ઉપ્પજ્જતિ. (૧)

સંકિલિટ્ઠો ધમ્મો અસંકિલિટ્ઠસ્સ ધમ્મસ્સ આરમ્મણપચ્ચયેન પચ્ચયો – અરિયા પહીને કિલેસે પચ્ચવેક્ખન્તિ, વિક્ખમ્ભિતે કિલેસે…પે… પુબ્બે સમુદાચિણ્ણે…પે… સંકિલિટ્ઠે ખન્ધે અનિચ્ચતો…પે… વિપસ્સતિ, ચેતોપરિયઞાણેન સંકિલિટ્ઠચિત્તસમઙ્ગિસ્સ ચિત્તં જાનાતિ; સંકિલિટ્ઠા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૫૩. અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં…પે… પુબ્બે…પે… ઝાના વુટ્ઠહિત્વા ઝાનં પચ્ચવેક્ખતિ, અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ…પે… આવજ્જનાય આરમ્મણપચ્ચયેન પચ્ચયો; ચક્ખું…પે… વત્થું અસંકિલિટ્ઠે ખન્ધે અનિચ્ચતો…પે… વિપસ્સતિ, દિબ્બેન ચક્ખુના રૂપં પસ્સતિ…પે… અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અસંકિલિટ્ઠો ધમ્મો સંકિલિટ્ઠસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઝાના વુટ્ઠહિત્વા…પે… ચક્ખું…પે… વત્થું અસંકિલિટ્ઠે ખન્ધે અસ્સાદેતિ અભિનન્દતિ, તં આરબ્ભ રાગો…પે… દોમનસ્સં ઉપ્પજ્જતિ. (૨)

અધિપતિપચ્ચયો

૫૪. સંકિલિટ્ઠો ધમ્મો સંકિલિટ્ઠસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – રાગં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ; દિટ્ઠિં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – સંકિલિટ્ઠાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

સંકિલિટ્ઠો ધમ્મો અસંકિલિટ્ઠસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સંકિલિટ્ઠાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

સંકિલિટ્ઠો ધમ્મો સંકિલિટ્ઠસ્સ ચ અસંકિલિટ્ઠસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સંકિલિટ્ઠાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૫૫. અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં…પે… પુબ્બે…પે… ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ…પે… નિબ્બાનં ફલસ્સ અધિપતિપચ્ચયેન પચ્ચયો. સહજાતાધિપતિ – અસંકિલિટ્ઠાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

અસંકિલિટ્ઠો ધમ્મો સંકિલિટ્ઠસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં…પે… સીલં…પે… ઉપોસથકમ્મં…પે… પુબ્બે…પે… ઝાના વુટ્ઠહિત્વા…પે… ચક્ખું…પે… વત્થું અસંકિલિટ્ઠે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૨)

અનન્તરપચ્ચયાદિ

૫૬. સંકિલિટ્ઠો ધમ્મો સંકિલિટ્ઠસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા સંકિલિટ્ઠા ખન્ધા પચ્છિમાનં પચ્છિમાનં સંકિલિટ્ઠાનં ખન્ધાનં અનન્તરપચ્ચયેન પચ્ચયો. (૧)

સંકિલિટ્ઠો ધમ્મો અસંકિલિટ્ઠસ્સ ધમ્મસ્સ અનન્તરપચ્ચયેન પચ્ચયો – સંકિલિટ્ઠા ખન્ધા વુટ્ઠાનસ્સ અનન્તરપચ્ચયેન પચ્ચયો. (૨)

૫૭. અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અસંકિલિટ્ઠા ખન્ધા પચ્છિમાનં પચ્છિમાનં અસંકિલિટ્ઠાનં ખન્ધાનં…પે… ફલસમાપત્તિયા અનન્તરપચ્ચયેન પચ્ચયો. (૧)

અસંકિલિટ્ઠો ધમ્મો સંકિલિટ્ઠસ્સ ધમ્મસ્સ અનન્તરપચ્ચયેન પચ્ચયો – આવજ્જના સંકિલિટ્ઠાનં ખન્ધાનં અનન્તરપચ્ચયેન પચ્ચયો. (૨)

સમનન્તરપચ્ચયેન પચ્ચયો… ચત્તારિ… સહજાતપચ્ચયેન પચ્ચયો… પઞ્ચ… અઞ્ઞમઞ્ઞપચ્ચયેન પચ્ચયો… દ્વે… નિસ્સયપચ્ચયેન પચ્ચયો… સત્ત.

ઉપનિસ્સયપચ્ચયો

૫૮. સંકિલિટ્ઠો ધમ્મો સંકિલિટ્ઠસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – રાગં ઉપનિસ્સાય પાણં હનતિ…પે… સઙ્ઘં ભિન્દતિ, દોસં…પે… પત્થનં ઉપનિસ્સાય પાણં હનતિ…પે… સઙ્ઘં ભિન્દતિ, રાગો…પે… પત્થના રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૧)

સંકિલિટ્ઠો ધમ્મો અસંકિલિટ્ઠસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – રાગં ઉપનિસ્સાય દાનં દેતિ…પે… સમાપત્તિં ઉપ્પાદેતિ, દોસં…પે… પત્થનં ઉપનિસ્સાય દાનં દેતિ…પે… સમાપત્તિં ઉપ્પાદેતિ, રાગો…પે… પત્થના સદ્ધાય…પે… પઞ્ઞાય કાયિકસ્સ સુખસ્સ… કાયિકસ્સ દુક્ખસ્સ… મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો. (૨)

૫૯. અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સમાપત્તિં ઉપ્પાદેતિ; સીલં…પે… પઞ્ઞં, કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ…પે… સમાપત્તિં ઉપ્પાદેતિ; સદ્ધા…પે… સેનાસનં સદ્ધાય…પે… ફલસમાપત્તિયા ઉપનિસ્સયપચ્ચયેન પચ્ચયો. (૧)

અસંકિલિટ્ઠો ધમ્મો સંકિલિટ્ઠસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ; સીલં…પે… પઞ્ઞં… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય પાણં હનતિ…પે… સઙ્ઘં ભિન્દતિ; સદ્ધા…પે… સેનાસનં રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૨)

પુરેજાતપચ્ચયો

૬૦. અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં (સંખિત્તં). અસંકિલિટ્ઠો ધમ્મો સંકિલિટ્ઠસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં (સંખિત્તં). (૨)

પચ્છાજાતાસેવનપચ્ચયા

૬૧. સંકિલિટ્ઠો ધમ્મો અસંકિલિટ્ઠસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). …આસેવનપચ્ચયેન પચ્ચયો… દ્વે.

કમ્મપચ્ચયો

૬૨. સંકિલિટ્ઠો ધમ્મો સંકિલિટ્ઠસ્સ ધમ્મસ્સ કમ્મપચ્ચયેન પચ્ચયો – સંકિલિટ્ઠા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

સંકિલિટ્ઠો ધમ્મો અસંકિલિટ્ઠસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – સંકિલિટ્ઠા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – સંકિલિટ્ઠા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (મૂલં કાતબ્બં.) સંકિલિટ્ઠા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અસંકિલિટ્ઠા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – અસંકિલિટ્ઠા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયાદિ

૬૩. અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ વિપાકપચ્ચયેન પચ્ચયો… એકં.

સંકિલિટ્ઠો ધમ્મો સંકિલિટ્ઠસ્સ ધમ્મસ્સ આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો.

વિપ્પયુત્તપચ્ચયો

૬૪. સંકિલિટ્ઠો ધમ્મો અસંકિલિટ્ઠસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સંખિત્તં). (૧)

અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં). (૧)

અસંકિલિટ્ઠો ધમ્મો સંકિલિટ્ઠસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ સંકિલિટ્ઠાનં ખન્ધાનં વિપ્પયુત્તપચ્ચયેન પચ્ચયો. (૨)

અત્થિપચ્ચયાદિ

૬૫. સંકિલિટ્ઠો ધમ્મો સંકિલિટ્ઠસ્સ ધમ્મસ્સ અત્થિપચ્ચયેન પચ્ચયો … એકં (પટિચ્ચવારસદિસં). સંકિલિટ્ઠો ધમ્મો અસંકિલિટ્ઠસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં (સંખિત્તં). સંકિલિટ્ઠો ધમ્મો સંકિલિટ્ઠસ્સ ચ અસંકિલિટ્ઠસ્સ ચ ધમ્મસ્સ અત્થિપચ્ચયેન પચ્ચયો (પટિચ્ચસદિસં). (૩)

અસંકિલિટ્ઠો ધમ્મો અસંકિલિટ્ઠસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). અસંકિલિટ્ઠો ધમ્મો સંકિલિટ્ઠસ્સ ધમ્મસ્સ અત્થિપચ્ચયેન પચ્ચયો – પુરેજાતં (સંખિત્તં). (૨)

૬૬. સંકિલિટ્ઠો ચ અસંકિલિટ્ઠો ચ ધમ્મા સંકિલિટ્ઠસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – સંકિલિટ્ઠો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે… (સંખિત્તં). (૧)

સંકિલિટ્ઠો ચ અસંકિલિટ્ઠો ચ ધમ્મા અસંકિલિટ્ઠસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – સંકિલિટ્ઠા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – સંકિલિટ્ઠા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – સંકિલિટ્ઠા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો.