૧-૬. પટિચ્ચવારાદિ

પચ્ચયચતુક્કં

હેતુપચ્ચયો

૨૭. હેતું અકુસલં ધમ્મં પટિચ્ચ હેતુ અકુસલો ધમ્મો ઉપ્પજ્જતિ હેતુપચ્ચયા. હેતું અકુસલં ધમ્મં પટિચ્ચ નહેતુ અકુસલો ધમ્મો ઉપ્પજ્જતિ હેતુપચ્ચયા. હેતું અકુસલં ધમ્મં પટિચ્ચ હેતુ અકુસલો ચ નહેતુ અકુસલો ચ ધમ્મા ઉપ્પજ્જન્તિ હેતુપચ્ચયા. (૩)

૨૮. નહેતું અકુસલં ધમ્મં પટિચ્ચ નહેતુ અકુસલો ધમ્મો ઉપ્પજ્જતિ હેતુપચ્ચયા. નહેતું અકુસલં ધમ્મં પટિચ્ચ હેતુ અકુસલો ધમ્મો ઉપ્પજ્જતિ હેતુપચ્ચયા. નહેતું અકુસલં ધમ્મં પટિચ્ચ હેતુ અકુસલો ચ નહેતુ અકુસલો ચ ધમ્મા ઉપ્પજ્જન્તિ હેતુપચ્ચયા. (૩)

૨૯. હેતું અકુસલઞ્ચ નહેતું અકુસલઞ્ચ ધમ્મં પટિચ્ચ હેતુ અકુસલો ધમ્મો ઉપ્પજ્જતિ હેતુપચ્ચયા. હેતું અકુસલઞ્ચ નહેતું અકુસલઞ્ચ ધમ્મં પટિચ્ચ નહેતુ અકુસલો ધમ્મો ઉપ્પજ્જતિ હેતુપચ્ચયા. હેતું અકુસલઞ્ચ નહેતું અકુસલઞ્ચ ધમ્મં પટિચ્ચ હેતુ અકુસલો ચ નહેતુ અકુસલો ચ ધમ્મા ઉપ્પજ્જન્તિ હેતુપચ્ચયા. (૩)

૩૦. હેતુયા નવ, આરમ્મણે નવ, અધિપતિયા નવ…પે… કમ્મે નવ, આહારે નવ…પે… અવિગતે નવ (સંખિત્તં, અનુલોમં).

નહેતુપચ્ચયો

૩૧. નહેતું અકુસલં ધમ્મં પટિચ્ચ હેતુ અકુસલો ધમ્મો ઉપ્પજ્જતિ નહેતુપચ્ચયા. (૧)

નઅધિપતિપચ્ચયાદિ

૩૨. હેતું અકુસલં ધમ્મં પટિચ્ચ હેતુ અકુસલો ધમ્મો ઉપ્પજ્જતિ નઅધિપતિપચ્ચયા… નવ…પે….

હેતું અકુસલં ધમ્મં પટિચ્ચ નહેતુ અકુસલો ધમ્મો ઉપ્પજ્જતિ નકમ્મપચ્ચયા. (૧)

નહેતું અકુસલં ધમ્મં પટિચ્ચ નહેતુ અકુસલો ધમ્મો ઉપ્પજ્જતિ નકમ્મપચ્ચયા. (૧)

હેતું અકુસલઞ્ચ નહેતું અકુસલઞ્ચ ધમ્મં પટિચ્ચ નહેતુ અકુસલો ધમ્મો ઉપ્પજ્જતિ નકમ્મપચ્ચયા. (૧) (સંખિત્તં.)

૩૩. નહેતુયા એકં, નઅધિપતિયા નવ, નપુરેજાતે નવ, નપચ્છાજાતે નવ, નઆસેવને નવ, નકમ્મે તીણિ, નવિપાકે નવ, નવિપ્પયુત્તે નવ (પચ્ચનીયં).

હેતુપચ્ચયા નઅધિપતિયા નવ (સંખિત્તં, અનુલોમપચ્ચનીયં).

નહેતુપચ્ચયા આરમ્મણે એકં (સંખિત્તં, પચ્ચનીયાનુલોમં).

(સહજાતવારમ્પિ પચ્ચયવારમ્પિ નિસ્સયવારમ્પિ સંસટ્ઠવારમ્પિ સમ્પયુત્તવારમ્પિ પટિચ્ચવારસદિસા વિત્થારેતબ્બા.)