૧. વિભઙ્ગવારો

હેતુપચ્ચયો

૩૪૯. સરણો ધમ્મો સરણસ્સ ધમ્મસ્સ હેતુપચ્ચયેન પચ્ચયો (અરૂપદુકસદિસં, ચત્તારિ).

આરમ્મણપચ્ચયો

૩૫૦. સરણો ધમ્મો સરણસ્સ ધમ્મસ્સ આરમ્મણપચ્ચયેન પચ્ચયો – રાગં અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ, દિટ્ઠિં અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ, વિચિકિચ્છં આરબ્ભ …પે… ઉદ્ધચ્ચં આરબ્ભ…પે… દોમનસ્સં આરબ્ભ દોમનસ્સં ઉપ્પજ્જતિ, દિટ્ઠિ…પે… વિચિકિચ્છા…પે… ઉદ્ધચ્ચં ઉપ્પજ્જતિ. સરણો ધમ્મો અરણસ્સ ધમ્મસ્સ આરમ્મણપચ્ચયેન પચ્ચયો – અરિયા પહીને કિલેસે…પે… વિક્ખમ્ભિતે કિલેસે…પે… પુબ્બે સમુદાચિણ્ણે…પે… સરણે ખન્ધે અનિચ્ચતો…પે… વિપસ્સતિ, ચેતોપરિયઞાણેન સરણચિત્તસમઙ્ગિસ્સ ચિત્તં જાનાતિ. સરણા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૩૫૧. અરણો ધમ્મો અરણસ્સ ધમ્મસ્સ આરમ્મણપચ્ચયેન પચ્ચયો; દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ, પુબ્બે…પે… ઝાના…પે… અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં…પે… નિબ્બાનં પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો. ચક્ખું…પે… વત્થું અરણે ખન્ધે અનિચ્ચતો…પે… વિપસ્સતિ, દિબ્બેન ચક્ખુના રૂપં પસ્સતિ …પે… અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. અરણો ધમ્મો સરણસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… પુબ્બે…પે… ઝાના…પે… ચક્ખું…પે… વત્થું, અરણે ખન્ધે અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. (૨)

અધિપતિપચ્ચયો

૩૫૨. સરણો ધમ્મો સરણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – રાગં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ… દિટ્ઠિ ઉપ્પજ્જતિ; દિટ્ઠિં ગરું કત્વા અસ્સાદેતિ અભિનન્દતિ. સહજાતાધિપતિ – સરણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. સરણો ધમ્મો અરણસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સરણાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. સરણો ધમ્મો સરણસ્સ ચ અરણસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સરણાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૩૫૩. અરણો ધમ્મો અરણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં …પે… ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે…પે… ઝાના…પે… અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં…પે… નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, અધિપતિપચ્ચયેન પચ્ચયો. સહજાતાધિપતિ – અરણાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. અરણો ધમ્મો સરણસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ… દિટ્ઠિ ઉપ્પજ્જતિ; પુબ્બે સુચિણ્ણાનિ…પે… ઝાના…પે… ચક્ખું…પે… વત્થું, અરણે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ… દિટ્ઠિ ઉપ્પજ્જતિ. (૨)

અનન્તરપચ્ચયાદિ

૩૫૪. સરણો ધમ્મો સરણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા સરણા ખન્ધા પચ્છિમાનં પચ્છિમાનં સરણાનં ખન્ધાનં અનન્તરપચ્ચયેન પચ્ચયો. સરણો ધમ્મો અરણસ્સ ધમ્મસ્સ અનન્તરપચ્ચયેન પચ્ચયો – સરણા ખન્ધા વુટ્ઠાનસ્સ અનન્તરપચ્ચયેન પચ્ચયો. (૨)

૩૫૫. અરણો ધમ્મો અરણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અરણા ખન્ધા પચ્છિમાનં પચ્છિમાનં અરણાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ…પે… ફલસમાપત્તિયા અનન્તરપચ્ચયેન પચ્ચયો. અરણો ધમ્મો સરણસ્સ ધમ્મસ્સ અનન્તરપચ્ચયેન પચ્ચયો – આવજ્જના સરણાનં ખન્ધાનં અનન્તરપચ્ચયેન પચ્ચયો. (૨)

સમનન્તરપચ્ચયેન પચ્ચયો… સહજાતપચ્ચયેન પચ્ચયો… પઞ્ચ… અઞ્ઞમઞ્ઞપચ્ચયેન પચ્ચયો… દ્વે… નિસ્સયપચ્ચયેન પચ્ચયો… સત્ત.

ઉપનિસ્સયપચ્ચયો

૩૫૬. સરણો ધમ્મો સરણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – રાગં ઉપનિસ્સાય પાણં હનતિ…પે… સઙ્ઘં ભિન્દતિ; દોસં…પે… પત્થનં ઉપનિસ્સાય પાણં હનતિ…પે… સઙ્ઘં ભિન્દતિ, રાગો…પે… પત્થના રાગસ્સ…પે… પત્થનાય ઉપનિસ્સયપચ્ચયેન પચ્ચયો. સરણો ધમ્મો અરણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – રાગં ઉપનિસ્સાય દાનં દેતિ, સીલં…પે… ઉપોસથકમ્મં કરોતિ, ઝાનં ઉપ્પાદેતિ, વિપસ્સનં…પે… મગ્ગં…પે… અભિઞ્ઞં…પે… સમાપત્તિં ઉપ્પાદેતિ; દોસં…પે… પત્થનં ઉપનિસ્સાય દાનં દેતિ…પે… સમાપત્તિં ઉપ્પાદેતિ, રાગો…પે… પત્થના સદ્ધાય…પે… પઞ્ઞાય… કાયિકસ્સ સુખસ્સ… કાયિકસ્સ દુક્ખસ્સ… મગ્ગસ્સ… ફલસમાપત્તિયા ઉપનિસ્સયપચ્ચયેન પચ્ચયો. (૨)

૩૫૭. અરણો ધમ્મો અરણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સમાપત્તિં ઉપ્પાદેતિ; સીલં…પે… પઞ્ઞં… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ…પે… સમાપત્તિં ઉપ્પાદેતિ; સદ્ધા …પે… સેનાસનં સદ્ધાય…પે… પઞ્ઞાય… કાયિકસ્સ સુખસ્સ… કાયિકસ્સ દુક્ખસ્સ… મગ્ગસ્સ… ફલસમાપત્તિયા ઉપનિસ્સયપચ્ચયેન પચ્ચયો. (૧)

અરણો ધમ્મો સરણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ; સીલં…પે… સેનાસનં ઉપનિસ્સાય પાણં હનતિ…પે… સઙ્ઘં ભિન્દતિ; સદ્ધા…પે… સેનાસનં રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૨)

પુરેજાતપચ્ચયાદિ

૩૫૮. અરણો ધમ્મો અરણસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… વિપસ્સતિ…પે… દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ …પે… કાયાયતનં કાયવિઞ્ઞાણસ્સ…પે… વત્થુ અરણાનં ખન્ધાનં પુરેજાતપચ્ચયેન પચ્ચયો. અરણો ધમ્મો સરણસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. વત્થુપુરેજાતં – વત્થુ સરણાનં ખન્ધાનં પુરેજાતપચ્ચયેન પચ્ચયો. (૨)

પચ્છાજાતપચ્ચયેન પચ્ચયો… દ્વે… આસેવનપચ્ચયેન પચ્ચયો… દ્વે.

કમ્મપચ્ચયો

૩૫૯. સરણો ધમ્મો સરણસ્સ ધમ્મસ્સ કમ્મપચ્ચયેન પચ્ચયો – સરણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (મૂલં કાતબ્બં.) સહજાતા, નાનાક્ખણિકા. સહજાતા – સરણા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – સરણા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (મૂલં કાતબ્બં.) સરણા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

અરણો ધમ્મો અરણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – (સંખિત્તં). (૧)

વિપાકપચ્ચયેન પચ્ચયો… એકં… આહારપચ્ચયેન પચ્ચયો… ચત્તારિ… ઇન્દ્રિયપચ્ચયેન પચ્ચયો… ચત્તારિ… ઝાનપચ્ચયેન પચ્ચયો… ચત્તારિ… મગ્ગપચ્ચયેન પચ્ચયો… ચત્તારિ… સમ્પયુત્તપચ્ચયેન પચ્ચયો… દ્વે… વિપ્પયુત્તપચ્ચયેન પચ્ચયો… તીણિ (અરૂપદુકસદિસા).

અત્થિપચ્ચયો

૩૬૦. સરણો ધમ્મો સરણસ્સ ધમ્મસ્સ અત્થિપચ્ચયેન પચ્ચયો (સંખિત્તં). સરણો ધમ્મો અરણસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં (સંખિત્તં). સરણો ધમ્મો સરણસ્સ ચ અરણસ્સ ચ ધમ્મસ્સ અત્થિપચ્ચયેન પચ્ચયો (સંખિત્તં). (૩)

૩૬૧. અરણો ધમ્મો અરણસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). અરણો ધમ્મો સરણસ્સ ધમ્મસ્સ અત્થિપચ્ચયેન પચ્ચયો. પુરેજાતં – ચક્ખું …પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ, વત્થુ સરણાનં ખન્ધાનં અત્થિપચ્ચયેન પચ્ચયો. (૨)

સરણો ચ અરણો ચ ધમ્મા સરણસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (સંખિત્તં). સરણો ચ અરણો ચ ધમ્મા અરણસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – સરણા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – સરણા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – સરણા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)