૩. પચ્ચયવારો

૧-૪. પચ્ચયચતુક્કં

૩૪૭. સરણં ધમ્મં પચ્ચયા સરણો ધમ્મો ઉપ્પજ્જતિ હેતુપચ્ચયા – સરણં એકં ખન્ધં પચ્ચયા તયો ખન્ધા…પે… દ્વે ખન્ધે…પે… (યથા અરૂપાવચરદુકસ્સ પચ્ચયવારોપિ એવં કાતબ્બો).

હેતુયા નવ, આરમ્મણે ચત્તારિ, અધિપતિયા નવ…પે… અવિગતે નવ.

અનુલોમં.

૩૪૮. સરણં ધમ્મં પચ્ચયા સરણો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે પચ્ચયા વિચિકિચ્છાસહગતો ઉદ્ધચ્ચસહગતો મોહો. (૧)

અરણં ધમ્મં પચ્ચયા અરણો ધમ્મો ઉપ્પજ્જતિ નહેતુપચ્ચયા – અહેતુકં અરણં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… અહેતુકપટિસન્ધિક્ખણે…પે… (યાવ અસઞ્ઞસત્તા) ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા અહેતુકા ખન્ધા. અરણં ધમ્મં પચ્ચયા સરણો ધમ્મો ઉપ્પજ્જતિ નહેતુપચ્ચયા – વત્થું પચ્ચયા વિચિકિચ્છાસહગતો ઉદ્ધચ્ચસહગતો મોહો. (૨)

સરણઞ્ચ અરણઞ્ચ ધમ્મં પચ્ચયા સરણો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા વિચિકિચ્છાસહગતો ઉદ્ધચ્ચસહગતો મોહો. (૧)

નહેતુયા ચત્તારિ, નઆરમ્મણે તીણિ, નઅધિપતિયા નવ, નઅનન્તરે તીણિ, નસમનન્તરે તીણિ, નઅઞ્ઞમઞ્ઞે તીણિ, નઉપનિસ્સયે તીણિ, નપુરેજાતે ચત્તારિ, નપચ્છાજાતે નવ, નઆસેવને નવ, નકમ્મે ચત્તારિ, નવિપાકે નવ, નઆહારે એકં, નઇન્દ્રિયે એકં, નઝાને એકં, નમગ્ગે એકં, નસમ્પયુત્તે તીણિ, નવિપ્પયુત્તે દ્વે, નોનત્થિયા તીણિ, નોવિગતે તીણિ.

પચ્ચનીયં.