૧. વિભઙ્ગવારો

હેતુપચ્ચયો

૩૧૩. નિય્યાનિકો ધમ્મો નિય્યાનિકસ્સ ધમ્મસ્સ હેતુપચ્ચયેન પચ્ચયો – નિય્યાનિકા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (મૂલં કાતબ્બં.) નિય્યાનિકા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (મૂલં કાતબ્બં.) નિય્યાનિકા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

અનિય્યાનિકો ધમ્મો અનિય્યાનિકસ્સ ધમ્મસ્સ હેતુપચ્ચયેન પચ્ચયો – અનિય્યાનિકા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

આરમ્મણપચ્ચયો

૩૧૪. નિય્યાનિકો ધમ્મો અનિય્યાનિકસ્સ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ચેતોપરિયઞાણેન નિય્યાનિકચિત્તસમઙ્ગિસ્સ ચિત્તં જાનાતિ, નિય્યાનિકા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અનિય્યાનિકો ધમ્મો અનિય્યાનિકસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ; પુબ્બે સુચિણ્ણાનિ…પે… ઝાના…પે… અરિયા ફલં પચ્ચવેક્ખન્તિ, નિબ્બાનં પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, ફલસ્સ, આવજ્જનાય આરમ્મણપચ્ચયેન પચ્ચયો; અરિયા પહીને કિલેસે…પે… વિક્ખમ્ભિતે…પે… પુબ્બે સમુદાચિણ્ણે…પે… ચક્ખું…પે… વત્થું અનિય્યાનિકે ખન્ધે અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન અનિય્યાનિકચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… અનિય્યાનિકા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો.

અનિય્યાનિકો ધમ્મો નિય્યાનિકસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં મગ્ગસ્સ આરમ્મણપચ્ચયેન પચ્ચયો. (૨)

અધિપતિપચ્ચયો

૩૧૫. નિય્યાનિકો ધમ્મો નિય્યાનિકસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – નિય્યાનિકાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. નિય્યાનિકો ધમ્મો અનિય્યાનિકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ. સહજાતાધિપતિ – નિય્યાનિકાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (મૂલં કાતબ્બં.) નિય્યાનિકાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૩૧૬. અનિય્યાનિકો ધમ્મો અનિય્યાનિકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ, પુબ્બે સુચિણ્ણાનિ…પે… ઝાના વુટ્ઠહિત્વા…પે… અરિયા ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, ફલસ્સ અધિપતિપચ્ચયેન પચ્ચયો; ચક્ખું…પે… વત્થું અનિય્યાનિકે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અનિય્યાનિકાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. અનિય્યાનિકો ધમ્મો નિય્યાનિકસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – નિબ્બાનં મગ્ગસ્સ અધિપતિપચ્ચયેન પચ્ચયો. (૨)

અનન્તરપચ્ચયાદિ

૩૧૭. નિય્યાનિકો ધમ્મો અનિય્યાનિકસ્સ ધમ્મસ્સ અનન્તરપચ્ચયેન પચ્ચયો – મગ્ગો ફલસ્સ અનન્તરપચ્ચયેન પચ્ચયો. (૧)

અનિય્યાનિકો ધમ્મો અનિય્યાનિકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અનિય્યાનિકા ખન્ધા પચ્છિમાનં પચ્છિમાનં અનિય્યાનિકાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ… અનુલોમં વોદાનસ્સ… ફલં ફલસ્સ… અનુલોમં ફલસમાપત્તિયા … નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. અનિય્યાનિકો ધમ્મો નિય્યાનિકસ્સ ધમ્મસ્સ અનન્તરપચ્ચયેન પચ્ચયો… ગોત્રભુ મગ્ગસ્સ; વોદાનં મગ્ગસ્સ અનન્તરપચ્ચયેન પચ્ચયો. (૨)

સમનન્તરપચ્ચયેન પચ્ચયો… સહજાતપચ્ચયેન પચ્ચયો… પઞ્ચ… અઞ્ઞમઞ્ઞપચ્ચયેન પચ્ચયો… દ્વે… નિસ્સયપચ્ચયેન પચ્ચયો… સત્ત.

ઉપનિસ્સયપચ્ચયો

૩૧૮. નિય્યાનિકો ધમ્મો નિય્યાનિકસ્સ ધમ્મસ્સ ઉપનિસ્સયપચ્ચયેન પચ્ચયો. પકતૂપનિસ્સયો – પઠમો મગ્ગો દુતિયસ્સ મગ્ગસ્સ ઉપનિસ્સયપચ્ચયેન પચ્ચયો…પે… તતિયો મગ્ગો ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. નિય્યાનિકો ધમ્મો અનિય્યાનિકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અરિયા મગ્ગં ઉપનિસ્સાય અનુપ્પન્નં સમાપત્તિં ઉપ્પાદેન્તિ, ઉપ્પન્નં સમાપજ્જન્તિ, સઙ્ખારે અનિચ્ચતો…પે… વિપસ્સન્તિ, મગ્ગો અરિયાનં અત્થપટિસમ્ભિદાય…પે… પટિભાનપટિસમ્ભિદાય ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો, મગ્ગો ફલસમાપત્તિયા ઉપનિસ્સયપચ્ચયેન પચ્ચયો. (૨)

૩૧૯. અનિય્યાનિકો ધમ્મો અનિય્યાનિકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અનિય્યાનિકં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં કરોતિ, ઝાનં ઉપ્પાદેતિ… વિપસ્સનં… અભિઞ્ઞં… સમાપત્તિં ઉપ્પાદેતિ… માનં જપ્પેતિ… દિટ્ઠિં ગણ્હાતિ; અનિય્યાનિકં સીલં…પે… પઞ્ઞં… રાગં…પે… પત્થનં… ઉતું… ભોજનં… સેનાસનં ઉપનિસ્સાય દાનં દેતિ…પે… સમાપત્તિં ઉપ્પાદેતિ, પાણં હનતિ…પે… સઙ્ઘં ભિન્દતિ; અનિય્યાનિકા સદ્ધા…પે… સેનાસનં અનિય્યાનિકાય સદ્ધાય…પે… પત્થનાય… કાયિકસ્સ સુખસ્સ… કાયિકસ્સ દુક્ખસ્સ… ફલસમાપત્તિયા ઉપનિસ્સયપચ્ચયેન પચ્ચયો. અનિય્યાનિકો ધમ્મો નિય્યાનિકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પઠમસ્સ મગ્ગસ્સ પરિકમ્મં પઠમસ્સ મગ્ગસ્સ ઉપનિસ્સયપચ્ચયેન પચ્ચયો…પે… ચતુત્થસ્સ મગ્ગસ્સ પરિકમ્મં ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. (૨)

પુરેજાતપચ્ચયાદિ

૩૨૦. અનિય્યાનિકો ધમ્મો અનિય્યાનિકસ્સ ધમ્મસ્સ પુરેજાતપચ્ચયેન પચ્ચયો… દ્વે (અરૂપદુકસદિસા કાતબ્બા)… પચ્છાજાતપચ્ચયેન પચ્ચયો… દ્વે… આસેવનપચ્ચયેન પચ્ચયો… દ્વે.

કમ્મપચ્ચયો

૩૨૧. નિય્યાનિકો ધમ્મો નિય્યાનિકસ્સ ધમ્મસ્સ કમ્મપચ્ચયેન પચ્ચયો – નિય્યાનિકા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. નિય્યાનિકો ધમ્મો અનિય્યાનિકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – નિય્યાનિકા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – નિય્યાનિકા ચેતના ફલસ્સ કમ્મપચ્ચયેન પચ્ચયો. (મૂલં કાતબ્બં) નિય્યાનિકા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

૩૨૨. અનિય્યાનિકો ધમ્મો અનિય્યાનિકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા (સંખિત્તં). નાનાક્ખણિકા – અનિય્યાનિકા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો… વિપાકપચ્ચયેન પચ્ચયો… એકંયેવ… આહારપચ્ચયેન પચ્ચયો… ચત્તારિ… ઇન્દ્રિયપચ્ચયેન પચ્ચયો… ચત્તારિ… ઝાનપચ્ચયેન પચ્ચયો… ચત્તારિ… મગ્ગપચ્ચયેન પચ્ચયો… ચત્તારિ… સમ્પયુત્તપચ્ચયેન પચ્ચયો… દ્વે… વિપ્પયુત્તપચ્ચયેન પચ્ચયો… તીણિ (અરૂપદુકસદિસા કાતબ્બા)… અત્થિપચ્ચયેન પચ્ચયો… સત્ત (અરૂપદુકસદિસા કાતબ્બા, આમસના નાનાપદાયેવ)… નત્થિપચ્ચયેન પચ્ચયો… તીણિ… વિગતપચ્ચયેન પચ્ચયો… તીણિ… અવિગતપચ્ચયેન પચ્ચયો… સત્ત.