૧. વિભઙ્ગવારો

હેતુપચ્ચયો

૨૭૯. અરૂપાવચરો ધમ્મો અરૂપાવચરસ્સ ધમ્મસ્સ હેતુપચ્ચયેન પચ્ચયો – અરૂપાવચરા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો; પટિસન્ધિક્ખણે…પે…. (મૂલં કાતબ્બં.) અરૂપાવચરા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (મૂલં કાતબ્બં.) અરૂપાવચરા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

નઅરૂપાવચરો ધમ્મો નઅરૂપાવચરસ્સ ધમ્મસ્સ હેતુપચ્ચયેન પચ્ચયો – નઅરૂપાવચરા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

આરમ્મણપચ્ચયો

૨૮૦. અરૂપાવચરો ધમ્મો અરૂપાવચરસ્સ ધમ્મસ્સ આરમ્મણપચ્ચયેન પચ્ચયો – આકાસાનઞ્ચાયતનં વિઞ્ઞાણઞ્ચાયતનસ્સ આરમ્મણપચ્ચયેન પચ્ચયો; આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ આરમ્મણપચ્ચયેન પચ્ચયો. અરૂપાવચરો ધમ્મો નઅરૂપાવચરસ્સ ધમ્મસ્સ આરમ્મણપચ્ચયેન પચ્ચયો – આકાસાનઞ્ચાયતનં પચ્ચવેક્ખતિ, વિઞ્ઞાણઞ્ચાયતનં…પે… આકિઞ્ચઞ્ઞાયતનં…પે… નેવસઞ્ઞાનાસઞ્ઞાયતનં પચ્ચવેક્ખતિ, અરૂપાવચરે ખન્ધે અનિચ્ચતો…પે… દોમનસ્સં ઉપ્પજ્જતિ; ચેતોપરિયઞાણેન અરૂપાવચરચિત્તસમઙ્ગિસ્સ ચિત્તં જાનાતિ, અરૂપાવચરા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

નઅરૂપાવચરો ધમ્મો નઅરૂપાવચરસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ અસ્સાદેતિ અભિનન્દતિ, તં આરબ્ભ રાગો…પે… દોમનસ્સં ઉપ્પજ્જતિ; પુબ્બે સુચિણ્ણાનિ…પે… ઝાના…પે… અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ, નિબ્બાનં પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો; અરિયા પહીને કિલેસે પચ્ચવેક્ખન્તિ, વિક્ખમ્ભિતે કિલેસે…પે… પુબ્બે…પે… ચક્ખું…પે… વત્થું નઅરૂપાવચરે ખન્ધે અનિચ્ચતો…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન નઅરૂપાવચરચિત્તસમઙ્ગિસ્સ ચિત્તં જાનાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… નઅરૂપાવચરા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અધિપતિપચ્ચયો

૨૮૧. અરૂપાવચરો ધમ્મો અરૂપાવચરસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અરૂપાવચરાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. અરૂપાવચરો ધમ્મો નઅરૂપાવચરસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – આકાસાનઞ્ચાયતનં ગરું કત્વા પચ્ચવેક્ખતિ…પે… નેવસઞ્ઞાનાસઞ્ઞાયતનં ગરું કત્વા પચ્ચવેક્ખતિ, અરૂપાવચરે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અરૂપાવચરાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (મૂલં કાતબ્બં.) અરૂપાવચરાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૨૮૨. નઅરૂપાવચરો ધમ્મો નઅરૂપાવચરસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ; પુબ્બે સુચિણ્ણાનિ…પે… ઝાના…પે… અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં…પે… નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો; ચક્ખું…પે… વત્થું નઅરૂપાવચરે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – નઅરૂપાવચરાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

અનન્તરપચ્ચયાદિ

૨૮૩. અરૂપાવચરો ધમ્મો અરૂપાવચરસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અરૂપાવચરા ખન્ધા પચ્છિમાનં પચ્છિમાનં અરૂપાવચરાનં ખન્ધાનં અનન્તરપચ્ચયેન પચ્ચયો. અરૂપાવચરો ધમ્મો નઅરૂપાવચરસ્સ ધમ્મસ્સ અનન્તરપચ્ચયેન પચ્ચયો – અરૂપાવચરં ચુતિચિત્તં નઅરૂપાવચરસ્સ ઉપપત્તિચિત્તસ્સ, અરૂપાવચરં ભવઙ્ગં આવજ્જનાય, અરૂપાવચરા ખન્ધા નઅરૂપાવચરસ્સ વુટ્ઠાનસ્સ, નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. (૨)

૨૮૪. નઅરૂપાવચરો ધમ્મો નઅરૂપાવચરસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નઅરૂપાવચરા ખન્ધા પચ્છિમાનં પચ્છિમાનં નઅરૂપાવચરાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ…પે… અનુલોમં ફલસમાપત્તિયા અનન્તરપચ્ચયેન પચ્ચયો. નઅરૂપાવચરો ધમ્મો અરૂપાવચરસ્સ ધમ્મસ્સ અનન્તરપચ્ચયેન પચ્ચયો – નઅરૂપાવચરં ચુતિચિત્તં અરૂપાવચરસ્સ ઉપપત્તિચિત્તસ્સ અનન્તરપચ્ચયેન પચ્ચયો; નઅરૂપાવચરા ખન્ધા અરૂપાવચરસ્સ વુટ્ઠાનસ્સ અનન્તરપચ્ચયેન પચ્ચયો; આકાસાનઞ્ચાયતનસ્સ પરિકમ્મં આકાસાનઞ્ચાયતનસ્સ અનન્તરપચ્ચયેન પચ્ચયો; વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનસ્સ…પે… નેવસઞ્ઞાનાસઞ્ઞાયતનસ્સ પરિકમ્મં નેવસઞ્ઞાનાસઞ્ઞાયતનસ્સ અનન્તરપચ્ચયેન પચ્ચયો. (૨)

સમનન્તરપચ્ચયેન પચ્ચયો… સહજાતપચ્ચયેન પચ્ચયો… પઞ્ચ… અઞ્ઞમઞ્ઞપચ્ચયેન પચ્ચયો… દ્વે… નિસ્સયપચ્ચયેન પચ્ચયો… સત્ત.

ઉપનિસ્સયપચ્ચયો

૨૮૫. અરૂપાવચરો ધમ્મો અરૂપાવચરસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આકાસાનઞ્ચાયતનં વિઞ્ઞાણઞ્ચાયતનસ્સ ઉપનિસ્સયપચ્ચયેન પચ્ચયો; વિઞ્ઞાણઞ્ચાયતનં આકિઞ્ચઞ્ઞાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. અરૂપાવચરો ધમ્મો નઅરૂપાવચરસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અરૂપાવચરં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં કરોતિ, નઅરૂપાવચરં ઝાનં ઉપ્પાદેતિ, વિપસ્સનં…પે… મગ્ગં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ; અરૂપાવચરં સીલં…પે… પઞ્ઞં ઉપનિસ્સાય દાનં દેતિ…પે… સમાપત્તિં ઉપ્પાદેતિ… માનં જપ્પેતિ… દિટ્ઠિં ગણ્હાતિ; અરૂપાવચરા સદ્ધા…પે… પઞ્ઞા નઅરૂપાવચરાય સદ્ધાય…પે… પઞ્ઞાય… રાગસ્સ…પે… પત્થનાય… કાયિકસ્સ સુખસ્સ… કાયિકસ્સ દુક્ખસ્સ… મગ્ગસ્સ ફલસમાપત્તિયા ઉપનિસ્સયપચ્ચયેન પચ્ચયો. (૨)

૨૮૬. નઅરૂપાવચરો ધમ્મો નઅરૂપાવચરસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – નઅરૂપાવચરં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં કરોતિ, નઅરૂપાવચરં ઝાનં ઉપ્પાદેતિ, વિપસ્સનં…પે… મગ્ગં…પે… અભિઞ્ઞં…પે… સમાપત્તિં ઉપ્પાદેતિ, માનં જપ્પેતિ… દિટ્ઠિં ગણ્હાતિ; નઅરૂપાવચરં સીલં…પે… પઞ્ઞં…પે… રાગં…પે… પત્થનં…પે… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ…પે… સમાપત્તિં ઉપ્પાદેતિ… પાણં હનતિ…પે… સઙ્ઘં ભિન્દતિ; નઅરૂપાવચરા સદ્ધા…પે… સેનાસનં નઅરૂપાવચરાય સદ્ધાય…પે… પત્થનાય… કાયિકસ્સ સુખસ્સ… કાયિકસ્સ દુક્ખસ્સ, મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો. (૧)

નઅરૂપાવચરો ધમ્મો અરૂપાવચરસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આકાસાનઞ્ચાયતનસ્સ પરિકમ્મં આકાસાનઞ્ચાયતનસ્સ ઉપનિસ્સયપચ્ચયેન પચ્ચયો…પે… નેવસઞ્ઞાનાસઞ્ઞાયતનસ્સ પરિકમ્મં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. (૨)

પુરેજાતપચ્ચયાદિ

૨૮૭. નઅરૂપાવચરો ધમ્મો નઅરૂપાવચરસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નઅરૂપાવચરાનં ખન્ધાનં પુરેજાતપચ્ચયેન પચ્ચયો. નઅરૂપાવચરો ધમ્મો અરૂપાવચરસ્સ ધમ્મસ્સ પુરેજાતપચ્ચયેન પચ્ચયો. વત્થુપુરેજાતં – વત્થુ અરૂપાવચરાનં ખન્ધાનં પુરેજાતપચ્ચયેન પચ્ચયો. (૨)

પચ્છાજાતપચ્ચયેન પચ્ચયો… દ્વે… આસેવનપચ્ચયેન પચ્ચયો… તીણિ.

કમ્મપચ્ચયો

૨૮૮. અરૂપાવચરો ધમ્મો અરૂપાવચરસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા…પે…. અરૂપાવચરો ધમ્મો નઅરૂપાવચરસ્સ ધમ્મસ્સ કમ્મપચ્ચયેન પચ્ચયો – અરૂપાવચરા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. (મૂલં કાતબ્બં.) અરૂપાવચરા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

નઅરૂપાવચરો ધમ્મો નઅરૂપાવચરસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – નઅરૂપાવચરા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો (સંખિત્તં). (૧)

વિપાકપચ્ચયાદિ

૨૮૯. અરૂપાવચરો ધમ્મો અરૂપાવચરસ્સ ધમ્મસ્સ વિપાકપચ્ચયેન પચ્ચયો (સંખિત્તં).

નઅરૂપાવચરો ધમ્મો નઅરૂપાવચરસ્સ ધમ્મસ્સ વિપાકપચ્ચયેન પચ્ચયો (સંખિત્તં)… આહારપચ્ચયેન પચ્ચયો… ચત્તારિ… ઇન્દ્રિયપચ્ચયેન પચ્ચયો… ચત્તારિ… ઝાનપચ્ચયેન પચ્ચયો… ચત્તારિ… મગ્ગપચ્ચયેન પચ્ચયો… ચત્તારિ… સમ્પયુત્તપચ્ચયેન પચ્ચયો… દ્વે.

વિપ્પયુત્તપચ્ચયો

૨૯૦. અરૂપાવચરો ધમ્મો નઅરૂપાવચરસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સંખિત્તં). (૧)

નઅરૂપાવચરો ધમ્મો નઅરૂપાવચરસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં). નઅરૂપાવચરો ધમ્મો અરૂપાવચરસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ અરૂપાવચરાનં ખન્ધાનં વિપ્પયુત્તપચ્ચયેન પચ્ચયો. (૨)

અત્થિપચ્ચયાદિ

૨૯૧. અરૂપાવચરો ધમ્મો અરૂપાવચરસ્સ ધમ્મસ્સ અત્થિપચ્ચયેન પચ્ચયો – સહજાતં…પે…. અરૂપાવચરો ધમ્મો નઅરૂપાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં…પે…. અરૂપાવચરો ધમ્મો અરૂપાવચરસ્સ ચ નઅરૂપાવચરસ્સ ચ ધમ્મસ્સ અત્થિપચ્ચયેન પચ્ચયો – સહજાતં (સંખિત્તં). (૩)

નઅરૂપાવચરો ધમ્મો નઅરૂપાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). નઅરૂપાવચરો ધમ્મો અરૂપાવચરસ્સ ધમ્મસ્સ અત્થિપચ્ચયેન પચ્ચયો. પુરેજાતં – વત્થુ અરૂપાવચરાનં ખન્ધાનં અત્થિપચ્ચયેન પચ્ચયો. (૨)

૨૯૨. અરૂપાવચરો ચ નઅરૂપાવચરો ચ ધમ્મા અરૂપાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – અરૂપાવચરો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. અરૂપાવચરો ચ નઅરૂપાવચરો ચ ધમ્મા નઅરૂપાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – અરૂપાવચરા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – અરૂપાવચરા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – અરૂપાવચરા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો.