૧. વિભઙ્ગવારો

હેતુપચ્ચયો

૨૦૬. કામાવચરો ધમ્મો કામાવચરસ્સ ધમ્મસ્સ હેતુપચ્ચયેન પચ્ચયો – કામાવચરા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

નકામાવચરો ધમ્મો નકામાવચરસ્સ ધમ્મસ્સ હેતુપચ્ચયેન પચ્ચયો – નકામાવચરા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો; પટિસન્ધિક્ખણે…પે…. નકામાવચરો ધમ્મો કામાવચરસ્સ ધમ્મસ્સ હેતુપચ્ચયેન પચ્ચયો – નકામાવચરા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (મૂલં કાતબ્બં.) નકામાવચરા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૩)

આરમ્મણપચ્ચયો

૨૦૭. કામાવચરો ધમ્મો કામાવચરસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં…પે… ઉપોસથકમ્મં…પે… પુબ્બે સુચિણ્ણાનિ પચ્ચવેક્ખતિ અસ્સાદેતિ અભિનન્દતિ, તં આરબ્ભ રાગો…પે… દોમનસ્સં ઉપ્પજ્જતિ; અરિયા ગોત્રભું પચ્ચવેક્ખન્તિ, વોદાનં પચ્ચવેક્ખન્તિ; પહીને કિલેસે…પે… વિક્ખમ્ભિતે કિલેસે…પે… પુબ્બે સુચિણ્ણાનિ…પે… ચક્ખું…પે… વત્થું કામાવચરે ખન્ધે અનિચ્ચતો…પે… દોમનસ્સં ઉપ્પજ્જતિ; રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ આરમ્મણપચ્ચયેન પચ્ચયો. (૧)

કામાવચરો ધમ્મો નકામાવચરસ્સ ધમ્મસ્સ આરમ્મણપચ્ચયેન પચ્ચયો – દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન કામાવચરચિત્તસમઙ્ગિસ્સ ચિત્તં જાનાતિ, કામાવચરા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો. (૨)

૨૦૮. નકામાવચરો ધમ્મો નકામાવચરસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં મગ્ગસ્સ, ફલસ્સ આરમ્મણપચ્ચયેન પચ્ચયો; ચેતોપરિયઞાણેન નકામાવચરચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… નકામાવચરા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો. (૧)

નકામાવચરો ધમ્મો કામાવચરસ્સ ધમ્મસ્સ આરમ્મણપચ્ચયેન પચ્ચયો – ઝાના વુટ્ઠહિત્વા ઝાનં પચ્ચવેક્ખતિ અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ…પે… અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ; ફલં…પે… નિબ્બાનં પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, આવજ્જનાય આરમ્મણપચ્ચયેન પચ્ચયો; આકાસાનઞ્ચાયતનં પચ્ચવેક્ખતિ, વિઞ્ઞાણઞ્ચાયતનં પચ્ચવેક્ખતિ, આકિઞ્ચઞ્ઞાયતનં પચ્ચવેક્ખતિ, નેવસઞ્ઞાનાસઞ્ઞાયતનં પચ્ચવેક્ખતિ, દિબ્બં ચક્ખું પચ્ચવેક્ખતિ, દિબ્બં સોતધાતું પચ્ચવેક્ખતિ, ઇદ્ધિવિધઞાણં પચ્ચવેક્ખતિ, ચેતોપરિયઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં પચ્ચવેક્ખતિ, નકામાવચરે ખન્ધે અનિચ્ચતો…પે… દોમનસ્સં ઉપ્પજ્જતિ. (૨)

અધિપતિપચ્ચયો

૨૦૯. કામાવચરો ધમ્મો કામાવચરસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં…પે… પુબ્બે સુચિણ્ણાનિ ગરું કત્વા પચ્ચવેક્ખતિ અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ, સેક્ખા ગોત્રભું ગરું કત્વા પચ્ચવેક્ખન્તિ, વોદાનં ગરું કત્વા પચ્ચવેક્ખન્તિ, ચક્ખું…પે… વત્થું કામાવચરે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – કામાવચરાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

૨૧૦. નકામાવચરો ધમ્મો નકામાવચરસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – નિબ્બાનં મગ્ગસ્સ, ફલસ્સ અધિપતિપચ્ચયેન પચ્ચયો. સહજાતાધિપતિ – નકામાવચરાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. નકામાવચરો ધમ્મો કામાવચરસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – ઝાના વુટ્ઠહિત્વા ઝાનં ગરું કત્વા પચ્ચવેક્ખતિ અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ, અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં…પે… નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ અધિપતિપચ્ચયેન પચ્ચયો; આકાસાનઞ્ચાયતનં ગરું કત્વા પચ્ચવેક્ખતિ વિઞ્ઞાણઞ્ચાયતનં…પે… આકિઞ્ચઞ્ઞાયતનં…પે… નેવસઞ્ઞાનાસઞ્ઞાયતનં ગરું કત્વા પચ્ચવેક્ખતિ, દિબ્બં ચક્ખું…પે… દિબ્બં સોતધાતું…પે… ઇદ્ધિવિધઞાણં…પે… અનાગતંસઞાણં ગરું કત્વા પચ્ચવેક્ખતિ, નકામાવચરે ખન્ધે ગરું કત્વા અસ્સાદેતિ અભિનન્દતિ તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – નકામાવચરાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો; નકામાવચરો ધમ્મો કામાવચરસ્સ ચ નકામાવચરસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – નકામાવચરાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

અનન્તરપચ્ચયાદિ

૨૧૧. કામાવચરો ધમ્મો કામાવચરસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા કામાવચરા ખન્ધા પચ્છિમાનં પચ્છિમાનં કામાવચરાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ… અનુલોમં વોદાનસ્સ… આવજ્જના કામાવચરાનં ખન્ધાનં અનન્તરપચ્ચયેન પચ્ચયો.

કામાવચરો ધમ્મો નકામાવચરસ્સ ધમ્મસ્સ અનન્તરપચ્ચયેન પચ્ચયો – કામાવચરં ચુતિચિત્તં નકામાવચરસ્સ ઉપપત્તિચિત્તસ્સ… આવજ્જના નકામાવચરાનં ખન્ધાનં અનન્તરપચ્ચયેન પચ્ચયો; કામાવચરા ખન્ધા નકામાવચરસ્સ વુટ્ઠાનસ્સ અનન્તરપચ્ચયેન પચ્ચયો; પઠમસ્સ ઝાનસ્સ પરિકમ્મં પઠમસ્સ ઝાનસ્સ અનન્તરપચ્ચયેન પચ્ચયો…પે… ચતુત્થસ્સ ઝાનસ્સ…પે… નેવસઞ્ઞાનાસઞ્ઞાયતનસ્સ પરિકમ્મં…પે… દિબ્બસ્સ ચક્ખુસ્સ…પે… દિબ્બાય સોતધાતુયા…પે… ઇદ્ધિવિધઞાણસ્સ…પે… ચેતોપરિયઞાણસ્સ…પે… પુબ્બેનિવાસાનુસ્સતિઞાણસ્સ…પે… યથાકમ્મૂપગઞાણસ્સ…પે… અનાગતંસઞાણસ્સ પરિકમ્મં અનાગતંસઞાણસ્સ અનન્તરપચ્ચયેન પચ્ચયો; ગોત્રભુ મગ્ગસ્સ… વોદાનં મગ્ગસ્સ… અનુલોમં ફલસમાપત્તિયા અનન્તરપચ્ચયેન પચ્ચયો. (૨)

૨૧૨. નકામાવચરો ધમ્મો નકામાવચરસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નકામાવચરા ખન્ધા પચ્છિમાનં પચ્છિમાનં નકામાવચરાનં ખન્ધાનં અનન્તરપચ્ચયેન પચ્ચયો; મગ્ગો ફલસ્સ, ફલં ફલસ્સ, નિરોધા વુટ્ઠહન્તસ્સ, નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. નકામાવચરો ધમ્મો કામાવચરસ્સ ધમ્મસ્સ અનન્તરપચ્ચયેન પચ્ચયો – નકામાવચરં ચુતિચિત્તં કામાવચરસ્સ ઉપપત્તિચિત્તસ્સ, નકામાવચરં ભવઙ્ગં આવજ્જનાય, નકામાવચરા ખન્ધા કામાવચરસ્સ વુટ્ઠાનસ્સ અનન્તરપચ્ચયેન પચ્ચયો…. (૨)

સમનન્તરપચ્ચયેન પચ્ચયો… સહજાતપચ્ચયેન પચ્ચયો… સત્ત… અઞ્ઞમઞ્ઞપચ્ચયેન પચ્ચયો… છ… નિસ્સયપચ્ચયેન પચ્ચયો… સત્ત.

ઉપનિસ્સયપચ્ચયો

૨૧૩. કામાવચરો ધમ્મો કામાવચરસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કામાવચરં સદ્ધં ઉપનિસ્સાય દાનં દેતિ…પે… સીલં…પે… ઉપોસથકમ્મં…પે… વિપસ્સનં ઉપ્પાદેતિ, માનં જપ્પેતિ, દિટ્ઠિં ગણ્હાતિ; કામાવચરં સીલં…પે… પઞ્ઞં… રાગં…પે… પત્થનં… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ…પે… વિપસ્સનં ઉપ્પાદેતિ, પાણં હનતિ…પે… સઙ્ઘં ભિન્દતિ; કામાવચરા સદ્ધા…પે… સેનાસનં કામાવચરાય સદ્ધાય…પે… પત્થનાય… કાયિકસ્સ સુખસ્સ… કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. (૧)

કામાવચરો ધમ્મો નકામાવચરસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કામાવચરં સદ્ધં ઉપનિસ્સાય નકામાવચરં ઝાનં ઉપ્પાદેતિ, મગ્ગં…પે… અભિઞ્ઞં…પે… સમાપત્તિં ઉપ્પાદેતિ; કામાવચરં સીલં…પે… સેનાસનં ઉપનિસ્સાય નકામાવચરં ઝાનં ઉપ્પાદેતિ, મગ્ગં…પે… અભિઞ્ઞં…પે… સમાપત્તિં ઉપ્પાદેતિ; કામાવચરા સદ્ધા…પે… સેનાસનં નકામાવચરાય સદ્ધાય…પે… પઞ્ઞાય… મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો; પઠમસ્સ ઝાનસ્સ પરિકમ્મં પઠમસ્સ ઝાનસ્સ…પે… ચતુત્થસ્સ ઝાનસ્સ…પે… આકાસાનઞ્ચાયતનસ્સ…પે… પઠમસ્સ મગ્ગસ્સ…પે… ચતુત્થસ્સ મગ્ગસ્સ પરિકમ્મં ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. (૨)

૨૧૪. નકામાવચરો ધમ્મો નકામાવચરસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – નકામાવચરં સદ્ધં ઉપનિસ્સાય ઝાનં ઉપ્પાદેતિ, મગ્ગં…પે… અભિઞ્ઞં…પે… સમાપત્તિં ઉપ્પાદેતિ; નકામાવચરં સીલં …પે… પઞ્ઞં ઉપનિસ્સાય નકામાવચરં ઝાનં ઉપ્પાદેતિ…પે… મગ્ગં…પે… અભિઞ્ઞં…પે… સમાપત્તિં ઉપ્પાદેતિ; નકામાવચરા સદ્ધા…પે… પઞ્ઞા નકામાવચરાય સદ્ધાય…પે… પઞ્ઞાય, મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો; પઠમં ઝાનં દુતિયસ્સ ઝાનસ્સ ઉપનિસ્સયપચ્ચયેન પચ્ચયો…પે… તતિયં ઝાનં…પે… ચતુત્થં ઝાનં…પે… આકાસાનઞ્ચાયતનં વિઞ્ઞાણઞ્ચાયતનસ્સ …પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો; પઠમો મગ્ગો દુતિયસ્સ મગ્ગસ્સ…પે… દુતિયો મગ્ગો તતિયસ્સ મગ્ગસ્સ…પે… તતિયો મગ્ગો ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો; મગ્ગો ફલસમાપત્તિયા ઉપનિસ્સયપચ્ચયેન પચ્ચયો. (૧)

નકામાવચરો ધમ્મો કામાવચરસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – નકામાવચરં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં…પે… વિપસ્સનં ઉપ્પાદેતિ, માનં જપ્પેતિ, દિટ્ઠિં ગણ્હાતિ; નકામાવચરં સીલં…પે… પઞ્ઞં ઉપનિસ્સાય દાનં દેતિ, સીલં…પે… ઉપોસથકમ્મં…પે… વિપસ્સનં ઉપ્પાદેતિ, માનં જપ્પેતિ, દિટ્ઠિં ગણ્હાતિ; નકામાવચરા સદ્ધા…પે… પઞ્ઞા કામાવચરાય સદ્ધાય…પે… પઞ્ઞાય, રાગસ્સ…પે… પત્થનાય કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો; અરિયા મગ્ગં ઉપનિસ્સાય સઙ્ખારે અનિચ્ચતો…પે… વિપસ્સન્તિ, મગ્ગો અરિયાનં અત્થપટિસમ્ભિદાય… ધમ્મપટિસમ્ભિદાય… નિરુત્તિપટિસમ્ભિદાય… પટિભાનપટિસમ્ભિદાય… ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો; ફલસમાપત્તિ કાયિકસ્સ સુખસ્સ ઉપનિસ્સયપચ્ચયેન પચ્ચયો. (૨)

પુરેજાતપચ્ચયાદિ

૨૧૫. કામાવચરો ધમ્મો કામાવચરસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ …પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ કામાવચરાનં ખન્ધાનં પુરેજાતપચ્ચયેન પચ્ચયો. કામાવચરો ધમ્મો નકામાવચરસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. વત્થુપુરેજાતં – વત્થુ નકામાવચરાનં ખન્ધાનં પુરેજાતપચ્ચયેન પચ્ચયો. (૨)

પચ્છાજાતપચ્ચયેન પચ્ચયો… દ્વે… આસેવનપચ્ચયેન પચ્ચયો… તીણિ.

કમ્મપચ્ચયાદિ

૨૧૬. કામાવચરો ધમ્મો કામાવચરસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા (સંખિત્તં).

નકામાવચરો ધમ્મો નકામાવચરસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા (સંખિત્તં). નકામાવચરો ધમ્મો કામાવચરસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા (સંખિત્તં). નકામાવચરો ધમ્મો કામાવચરસ્સ ચ નકામાવચરસ્સ ચ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા (સંખિત્તં). (૩)

વિપાકપચ્ચયેન પચ્ચયો… ચત્તારિ… આહારપચ્ચયેન પચ્ચયો… ચત્તારિ… ઇન્દ્રિયપચ્ચયેન પચ્ચયો… ચત્તારિ… ઝાનપચ્ચયેન પચ્ચયો… ચત્તારિ… મગ્ગપચ્ચયેન પચ્ચયો… ચત્તારિ… સમ્પયુત્તપચ્ચયેન પચ્ચયો… દ્વે.

વિપ્પયુત્તપચ્ચયો

૨૧૭. કામાવચરો ધમ્મો કામાવચરસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં). કામાવચરો ધમ્મો નકામાવચરસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં. સહજાતં (સંખિત્તં) પટિસન્ધિક્ખણે વત્થુ નકામાવચરાનં ખન્ધાનં વિપ્પયુત્તપચ્ચયેન પચ્ચયો. પુરેજાતં – વત્થુ નકામાવચરાનં ખન્ધાનં વિપ્પયુત્તપચ્ચયેન પચ્ચયો. (૨)

નકામાવચરો ધમ્મો કામાવચરસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – નકામાવચરા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે…પે…. પચ્છાજાતા – નકામાવચરા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અત્થિપચ્ચયાદિ

૨૧૮. કામાવચરો ધમ્મો કામાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). કામાવચરો ધમ્મો નકામાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતં – પટિસન્ધિક્ખણે વત્થુ નકામાવચરાનં ખન્ધાનં અત્થિપચ્ચયેન પચ્ચયો. પુરેજાતં – દિબ્બેન ચક્ખુના રૂપં પસ્સતિ…પે… (પુરેજાતસદિસં). (૨)

નકામાવચરો ધમ્મો નકામાવચરસ્સ ધમ્મસ્સ અત્થિપચ્ચયેન પચ્ચયો – સહજાતં (સંખિત્તં). નકામાવચરો ધમ્મો કામાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં (વિપ્પયુત્તસદિસં). નકામાવચરો ધમ્મો કામાવચરસ્સ ચ નકામાવચરસ્સ ચ ધમ્મસ્સ અત્થિપચ્ચયેન પચ્ચયો (પટિચ્ચસદિસં). (૩)

૨૧૯. કામાવચરો ચ નકામાવચરો ચ ધમ્મા કામાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – નકામાવચરા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; પટિસન્ધિક્ખણે…પે…. પચ્છાજાતા – નકામાવચરા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – નકામાવચરા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. કામાવચરો ચ નકામાવચરો ચ ધમ્મા નકામાવચરસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – નકામાવચરો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે… પટિસન્ધિક્ખણે…પે…. નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો. (૨)