૧. વિભઙ્ગવારો

હેતુપચ્ચયાદિ

૧૮૬. ઉપેક્ખાસહગતો ધમ્મો ઉપેક્ખાસહગતસ્સ ધમ્મસ્સ હેતુપચ્ચયેન પચ્ચયો – ઉપેક્ખાસહગતા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો; પટિસન્ધિક્ખણે…પે…. (એવં ચત્તારિ પઞ્હા યથા સવિતક્કદુકસ્સ.)

ઉપેક્ખાસહગતો ધમ્મો ઉપેક્ખાસહગતસ્સ ધમ્મસ્સ આરમ્મણપચ્ચયેન પચ્ચયો… અધિપતિપચ્ચયેન પચ્ચયો. (યથા સપ્પીતિકદુકં એવં આરમ્મણમ્પિ અધિપતિપિ વિત્થારેતબ્બા, ‘‘ઉપેક્ખા’’તિ નાનં.)

અનન્તરપચ્ચયાદિ

૧૮૭. ઉપેક્ખાસહગતો ધમ્મો ઉપેક્ખાસહગતસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપેક્ખાસહગતા ખન્ધા પચ્છિમાનં પચ્છિમાનં ઉપેક્ખાસહગતાનં ખન્ધાનં અનન્તરપચ્ચયેન પચ્ચયો. (૧)

ઉપેક્ખાસહગતો ધમ્મો નઉપેક્ખાસહગતસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપેક્ખાસહગતા ખન્ધા પચ્છિમાય પચ્છિમાય ઉપેક્ખાય અનન્તરપચ્ચયેન પચ્ચયો; ઉપેક્ખાસહગતં ચુતિચિત્તં નઉપેક્ખાસહગતસ્સ ઉપપત્તિચિત્તસ્સ… આવજ્જના નઉપેક્ખાસહગતાનં ખન્ધાનં… વિપાકમનોધાતુ નઉપેક્ખાસહગતાય વિપાકમનોવિઞ્ઞાણધાતુયા… ઉપેક્ખાસહગતં ભવઙ્ગં નઉપેક્ખાસહગતસ્સ ભવઙ્ગસ્સ… ઉપેક્ખાસહગતં કુસલાકુસલં નઉપેક્ખાસહગતસ્સ વુટ્ઠાનસ્સ… કિરિયં વુટ્ઠાનસ્સ… ફલં વુટ્ઠાનસ્સ… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં નઉપેક્ખાસહગતાય ફલસમાપત્તિયા અનન્તરપચ્ચયેન પચ્ચયો. (૨)

ઉપેક્ખાસહગતો ધમ્મો ઉપેક્ખાસહગતસ્સ ચ નઉપેક્ખાસહગતસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપેક્ખાસહગતા ખન્ધા પચ્છિમાનં પચ્છિમાનં ઉપેક્ખાસહગતાનં ખન્ધાનં ઉપેક્ખાય ચ અનન્તરપચ્ચયેન પચ્ચયો. (૩)

૧૮૮. નઉપેક્ખાસહગતો ધમ્મો નઉપેક્ખાસહગતસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપેક્ખા પચ્છિમાય પચ્છિમાય ઉપેક્ખાય અનન્તરપચ્ચયેન પચ્ચયો; પુરિમા પુરિમા નઉપેક્ખાસહગતા ખન્ધા પચ્છિમાનં પચ્છિમાનં નઉપેક્ખાસહગતાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ…પે… અનુલોમં ફલસમાપત્તિયા અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા ઉપેક્ખા પચ્છિમાનં પચ્છિમાનં ઉપેક્ખાસહગતાનં ખન્ધાનં અનન્તરપચ્ચયેન પચ્ચયો; નઉપેક્ખાસહગતં ચુતિચિત્તં ઉપેક્ખાસહગતસ્સ ઉપપત્તિચિત્તસ્સ… નઉપેક્ખાસહગતં ભવઙ્ગં આવજ્જનાય… કાયવિઞ્ઞાણધાતુ વિપાકમનોધાતુયા… નઉપેક્ખાસહગતા વિપાકમનોવિઞ્ઞાણધાતુ કિરિયમનોવિઞ્ઞાણધાતુયા… નઉપેક્ખાસહગતં ભવઙ્ગં ઉપેક્ખાસહગતસ્સ ભવઙ્ગસ્સ… નઉપેક્ખાસહગતં કુસલાકુસલં ઉપેક્ખાસહગતસ્સ વુટ્ઠાનસ્સ… કિરિયં વુટ્ઠાનસ્સ… ફલં વુટ્ઠાનસ્સ અનન્તરપચ્ચયેન પચ્ચયો. (૨)

નઉપેક્ખાસહગતો ધમ્મો ઉપેક્ખાસહગતસ્સ ચ નઉપેક્ખાસહગતસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપેક્ખા પચ્છિમાનં પચ્છિમાનં ઉપેક્ખાસહગતાનં ખન્ધાનં ઉપેક્ખાય ચ અનન્તરપચ્ચયેન પચ્ચયો. (૩)

૧૮૯. ઉપેક્ખાસહગતો ચ નઉપેક્ખાસહગતો ચ ધમ્મા ઉપેક્ખાસહગતસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ઉપેક્ખાસહગતા ખન્ધા ચ ઉપેક્ખા ચ પચ્છિમાનં પચ્છિમાનં ઉપેક્ખાસહગતાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા ઉપેક્ખાસહગતા ખન્ધા ચ ઉપેક્ખા ચ પચ્છિમાય પચ્છિમાય ઉપેક્ખાય અનન્તરપચ્ચયેન પચ્ચયો; ઉપેક્ખાસહગતં ચુતિચિત્તઞ્ચ ઉપેક્ખા ચ નઉપેક્ખાસહગતસ્સ ઉપપત્તિચિત્તસ્સ… આવજ્જના ચ ઉપેક્ખા ચ નઉપેક્ખાસહગતાનં ખન્ધાનં… વિપાકમનોધાતુ ચ ઉપેક્ખા ચ નઉપેક્ખાસહગતાય વિપાકમનોવિઞ્ઞાણધાતુયા… ઉપેક્ખાસહગતં ભવઙ્ગઞ્ચ ઉપેક્ખા ચ નઉપેક્ખાસહગતસ્સ ભવઙ્ગસ્સ… ઉપેક્ખાસહગતં કુસલાકુસલઞ્ચ ઉપેક્ખા ચ નઉપેક્ખાસહગતસ્સ વુટ્ઠાનસ્સ… કિરિયઞ્ચ ઉપેક્ખા ચ વુટ્ઠાનસ્સ… ફલઞ્ચ ઉપેક્ખા ચ વુટ્ઠાનસ્સ… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનઞ્ચ ઉપેક્ખા ચ નઉપેક્ખાસહગતાય ફલસમાપત્તિયા અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા ઉપેક્ખાસહગતા ખન્ધા ચ ઉપેક્ખા ચ પચ્છિમાનં પચ્છિમાનં ઉપેક્ખાસહગતાનં ખન્ધાનં ઉપેક્ખાય ચ અનન્તરપચ્ચયેન પચ્ચયો. (૩)

સમનન્તરપચ્ચયેન પચ્ચયો… સહજાતપચ્ચયેન પચ્ચયો… નવ… અઞ્ઞમઞ્ઞપચ્ચયેન પચ્ચયો… નવ… નિસ્સયપચ્ચયેન પચ્ચયો… નવ.

ઉપનિસ્સયપચ્ચયો

૧૯૦. ઉપેક્ખાસહગતો ધમ્મો ઉપેક્ખાસહગતસ્સ ધમ્મસ્સ ઉપનિસ્સયપચ્ચયેન પચ્ચયો… તીણિ.

નઉપેક્ખાસહગતો ધમ્મો નઉપેક્ખાસહગતસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – નઉપેક્ખાસહગતં સદ્ધં ઉપનિસ્સાય નઉપેક્ખાસહગતેન ચિત્તેન દાનં દેતિ, સીલં…પે… ઉપોસથકમ્મં…પે… નઉપેક્ખાસહગતં ઝાનં…પે… વિપસ્સનં…પે… મગ્ગં…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ; નઉપેક્ખાસહગતં સીલં…પે… પઞ્ઞં… રાગં… દોસં… મોહં… માનં… દિટ્ઠિં… પત્થનં… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપેક્ખં ઉપનિસ્સાય નઉપેક્ખાસહગતેન ચિત્તેન દાનં દેતિ…પે… સમાપત્તિં ઉપ્પાદેતિ, પાણં હનતિ…પે… સઙ્ઘં ભિન્દતિ; નઉપેક્ખાસહગતા સદ્ધા…પે… સેનાસનં ઉપેક્ખા ચ નઉપેક્ખાસહગતાય સદ્ધાય…પે… પઞ્ઞાય… રાગસ્સ…પે… પત્થનાય… કાયિકસ્સ સુખસ્સ… કાયિકસ્સ દુક્ખસ્સ … મગ્ગસ્સ, ફલસમાપત્તિયા ઉપેક્ખાય ચ ઉપનિસ્સયપચ્ચયેન પચ્ચયો. (૧)

નઉપેક્ખાસહગતો ધમ્મો ઉપેક્ખાસહગતસ્સ ધમ્મસ્સ ઉપનિસ્સયપચ્ચયેન પચ્ચયો (તીણિપિ ઉપનિસ્સયા). નઉપેક્ખાસહગતં સદ્ધં ઉપનિસ્સાય ઉપેક્ખાસહગતેન ચિત્તેન દાનં દેતિ…પે… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ; નઉપેક્ખાસહગતં સીલં…પે… સેનાસનં ઉપેક્ખં ઉપનિસ્સાય ઉપેક્ખાસહગતેન ચિત્તેન દાનં દેતિ…પે… સમાપત્તિં ઉપ્પાદેતિ, ઉપેક્ખાસહગતેન ચિત્તેન અદિન્નં આદિયતિ, મુસા ભણતિ, પિસુણં…પે… સમ્ફં…પે… સન્ધિં…પે… નિલ્લોપં…પે… એકાગારિકં…પે… પરિપન્થે…પે… પરદારં…પે… ગામઘાતં…પે… નિગમઘાતં કરોતિ; નઉપેક્ખાસહગતા સદ્ધા…પે… સેનાસનં ઉપેક્ખા ચ ઉપેક્ખાસહગતાય સદ્ધાય…પે… પત્થનાય… મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો.

નઉપેક્ખાસહગતો ધમ્મો ઉપેક્ખાસહગતસ્સ ચ નઉપેક્ખાસહગતસ્સ ચ ધમ્મસ્સ ઉપનિસ્સયપચ્ચયેન પચ્ચયો (તીણિ ઉપનિસ્સયા દુતિયગમનસદિસા). (૩)

ઉપેક્ખાસહગતો ચ નઉપેક્ખાસહગતો ચ ધમ્મા ઉપેક્ખાસહગતસ્સ ધમ્મસ્સ ઉપનિસ્સયપચ્ચયેન પચ્ચયો… તીણિ.

પુરેજાતપચ્ચયો

૧૯૧. નઉપેક્ખાસહગતો ધમ્મો નઉપેક્ખાસહગતસ્સ ધમ્મસ્સ પુરેજાતપચ્ચયેન પચ્ચયો… તીણિ (સપ્પીતિકદુકસદિસા).

પચ્છાજાતપચ્ચયાદિ

૧૯૨. ઉપેક્ખાસહગતો ધમ્મો નઉપેક્ખાસહગતસ્સ ધમ્મસ્સ પચ્છાજાતપચ્ચયેન પચ્ચયો… તીણિ… આસેવનપચ્ચયેન પચ્ચયો… નવ… કમ્મપચ્ચયેન પચ્ચયો… છ. (ચત્તારિ સહજાતા નાનાક્ખણિકા કાતબ્બા, દ્વે નાનાક્ખણિકા ચ.)… વિપાકપચ્ચયેન પચ્ચયો… નવ… આહારપચ્ચયેન પચ્ચયો… ચત્તારિ… ઇન્દ્રિયપચ્ચયેન પચ્ચયો… નવ… ઝાનપચ્ચયેન પચ્ચયો… નવ… મગ્ગપચ્ચયેન પચ્ચયો… ચત્તારિ… સમ્પયુત્તપચ્ચયેન પચ્ચયો… છ… વિપ્પયુત્તપચ્ચયેન પચ્ચયો… પઞ્ચ… અત્થિપચ્ચયેન પચ્ચયો… નવ… નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો. (ઇમાનિ પચ્ચયાનિ સપ્પીતિકકરણેન વિભજિતબ્બાનિ.)