૧-૪. પચ્ચયાનુલોમાદિ

હેતુપચ્ચયો

૧૮૩. ઉપેક્ખાસહગતં ધમ્મં પચ્ચયા ઉપેક્ખાસહગતો ધમ્મો ઉપ્પજ્જતિ હેતુપચ્ચયા – ઉપેક્ખાસહગતં એકં ખન્ધં પચ્ચયા દ્વે ખન્ધા, દ્વે ખન્ધે…પે… પટિસન્ધિક્ખણે…પે… (યથા સવિતક્કદુકસદિસં પચ્ચયવારે નાનાકરણં. ‘‘ઉપેક્ખ’’ન્તિ નવપિ પઞ્હા કાતબ્બા, પટિસન્ધિપવત્તિપિ વત્થુપિ.)

હેતુયા નવ, આરમ્મણે નવ…પે… પુરેજાતે નવ, આસેવને નવ (સબ્બત્થ નવ), અવિગતે નવ.

અનુલોમં.

૧૮૪. ઉપેક્ખાસહગતં ધમ્મં પચ્ચયા ઉપેક્ખાસહગતો ધમ્મો ઉપ્પજ્જતિ નહેતુપચ્ચયા – અહેતુકં ઉપેક્ખાસહગતં એકં ખન્ધં પચ્ચયા દ્વે ખન્ધા, દ્વે ખન્ધે…પે… અહેતુકપટિસન્ધિક્ખણે…પે… વિચિકિચ્છાસહગતે ઉદ્ધચ્ચસહગતે ખન્ધે પચ્ચયા વિચિકિચ્છાસહગતો ઉદ્ધચ્ચસહગતો મોહો. (એવં નવપિ પઞ્હા પવત્તિપટિસન્ધિયો યથા સવિતક્કદુકસ્સ એવં કાતબ્બા. તીણિયેવ મોહો, પવત્તે વત્થુપિ કાતબ્બા.)

નહેતુયા નવ, નઆરમ્મણે તીણિ, નઅધિપતિયા નવ, નઅનન્તરે તીણિ, નસમનન્તરે તીણિ, નઉપનિસ્સયે તીણિ, નપુરેજાતે નવ, નપચ્છાજાતે નવ, નઆસેવને નવ, નકમ્મે ચત્તારિ, નવિપાકે નવ, નઆહારે એકં, નઇન્દ્રિયે એકં, નઝાને એકં, નમગ્ગે નવ, નસમ્પયુત્તે તીણિ, નવિપ્પયુત્તે છ, નોનત્થિયા તીણિ, નોવિગતે તીણિ.

પચ્ચનીયં.