૩. પચ્ચયવારો

૧-૪. પચ્ચયાનુલોમાદિ

૧૪૭. સપ્પીતિકં ધમ્મં પચ્ચયા સપ્પીતિકો ધમ્મો ઉપ્પજ્જતિ હેતુપચ્ચયા. (સંખિત્તં. યથા સવિતક્કદુકે અનુલોમપચ્ચયવારં, એવં પવત્તિપટિસન્ધિ નવ પઞ્હા પરિપુણ્ણા પીતિ નિન્નાનાકરણા.)

હેતુયા નવ, આરમ્મણે નવ, અધિપતિયા નવ…પે… અવિગતે નવ.

અનુલોમં.

સપ્પીતિકં ધમ્મં પચ્ચયા સપ્પીતિકો ધમ્મો ઉપ્પજ્જતિ નહેતુપચ્ચયા… તીણિ (પટિચ્ચસદિસા).

અપ્પીતિકં ધમ્મં પચ્ચયા અપ્પીતિકો ધમ્મો ઉપ્પજ્જતિ નહેતુપચ્ચયા. (પવત્તિપટિસન્ધિ કાતબ્બા પટિચ્ચવારસદિસા, યાવ અસઞ્ઞસત્તા.) ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા અહેતુકા અપ્પીતિકા ખન્ધા પીતિ ચ, વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા વિચિકિચ્છાસહગતો ઉદ્ધચ્ચસહગતો મોહો. (અનુલોમસદિસા નવ પઞ્હા, પવત્તિયેવ પટિસન્ધિ નત્થિ, એકોયેવ મોહો.)

નહેતુયા નવ, નઆરમ્મણે તીણિ, નઅધિપતિયા નવ, નઅનન્તરે તીણિ…પે… નઉપનિસ્સયે તીણિ, નપુરેજાતે નવ, નપચ્છાજાતે નવ, નઆસેવને નવ, નકમ્મે નવ, નવિપાકે નવ, નઆહારે એકં, નઇન્દ્રિયે એકં, નઝાને એકં, નમગ્ગે નવ, નસમ્પયુત્તે તીણિ, નવિપ્પયુત્તે છ, નોનત્થિયા તીણિ, નોવિગતે તીણિ.

પચ્ચનીયં.