૧. વિભઙ્ગવારો

હેતુપચ્ચયો

૧૦૨. સવિતક્કં ધમ્મં પટિચ્ચ સવિતક્કો ધમ્મો ઉપ્પજ્જતિ હેતુપચ્ચયા – સવિતક્કં એકં ખન્ધં પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે…પે…. સવિતક્કં ધમ્મં પટિચ્ચ અવિતક્કો ધમ્મો ઉપ્પજ્જતિ હેતુપચ્ચયા – સવિતક્કે ખન્ધે પટિચ્ચ વિતક્કો ચિત્તસમુટ્ઠાનઞ્ચ રૂપં; પટિસન્ધિક્ખણે…પે…. સવિતક્કં ધમ્મં પટિચ્ચ સવિતક્કો ચ અવિતક્કો ચ ધમ્મા ઉપ્પજ્જન્તિ હેતુપચ્ચયા – સવિતક્કં એકં ખન્ધં પટિચ્ચ તયો ખન્ધા વિતક્કો ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે…. (૩)

૧૦૩. અવિતક્કં ધમ્મં પટિચ્ચ અવિતક્કો ધમ્મો ઉપ્પજ્જતિ હેતુપચ્ચયા – અવિતક્કં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વિતક્કં પટિચ્ચ ચિત્તસમુટ્ઠાનં રૂપં; પટિસન્ધિક્ખણે અવિતક્કં એકં ખન્ધં પટિચ્ચ તયો ખન્ધા કટત્તા ચ રૂપં…પે… દ્વે ખન્ધે…પે… વિતક્કં પટિચ્ચ કટત્તારૂપં, ખન્ધે પટિચ્ચ વત્થુ, વત્થું પટિચ્ચ ખન્ધા, વિતક્કં પટિચ્ચ વત્થુ, વત્થું પટિચ્ચ વિતક્કો, એકં મહાભૂતં…પે…. (૧)

અવિતક્કં ધમ્મં પટિચ્ચ સવિતક્કો ધમ્મો ઉપ્પજ્જતિ હેતુપચ્ચયા – વિતક્કં પટિચ્ચ સમ્પયુત્તકા ખન્ધા; પટિસન્ધિક્ખણે વિતક્કં પટિચ્ચ સમ્પયુત્તકા ખન્ધા, પટિસન્ધિક્ખણે વત્થું પટિચ્ચ સવિતક્કા ખન્ધા. (૨)

અવિતક્કં ધમ્મં પટિચ્ચ સવિતક્કો ચ અવિતક્કો ચ ધમ્મા ઉપ્પજ્જન્તિ હેતુપચ્ચયા – વિતક્કં પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં, વિતક્કં પટિચ્ચ સવિતક્કા ખન્ધા, મહાભૂતે પટિચ્ચ ચિત્તસમુટ્ઠાનં રૂપં; પટિસન્ધિક્ખણે વિતક્કં પટિચ્ચ સમ્પયુત્તકા ખન્ધા કટત્તા ચ રૂપં, પટિસન્ધિક્ખણે વિતક્કં પટિચ્ચ સવિતક્કા ખન્ધા, મહાભૂતે પટિચ્ચ કટત્તારૂપં, પટિસન્ધિક્ખણે વત્થું પટિચ્ચ સવિતક્કા ખન્ધા, મહાભૂતે પટિચ્ચ કટત્તારૂપં, પટિસન્ધિક્ખણે વત્થું પટિચ્ચ વિતક્કો સમ્પયુત્તકા ચ ખન્ધા. (૩)

૧૦૪. સવિતક્કઞ્ચ અવિતક્કઞ્ચ ધમ્મં પટિચ્ચ સવિતક્કો ધમ્મો ઉપ્પજ્જતિ હેતુપચ્ચયા – સવિતક્કં એકં ખન્ધઞ્ચ વિતક્કઞ્ચ પટિચ્ચ તયો ખન્ધા…પે… દ્વે ખન્ધે …પે… પટિસન્ધિક્ખણે સવિતક્કં એકં ખન્ધઞ્ચ વિતક્કઞ્ચ પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે સવિતક્કં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે…પે…. (૧)

સવિતક્કઞ્ચ અવિતક્કઞ્ચ ધમ્મં પટિચ્ચ અવિતક્કો ધમ્મો ઉપ્પજ્જતિ હેતુપચ્ચયા – સવિતક્કે ખન્ધે ચ વિતક્કઞ્ચ મહાભૂતે ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે સવિતક્કે ખન્ધે ચ વિતક્કઞ્ચ મહાભૂતે ચ પટિચ્ચ કટત્તારૂપં, પટિસન્ધિક્ખણે સવિતક્કે ખન્ધે ચ વત્થુઞ્ચ પટિચ્ચ વિતક્કો. (૨)

સવિતક્કઞ્ચ અવિતક્કઞ્ચ ધમ્મં પટિચ્ચ સવિતક્કો ચ અવિતક્કો ચ ધમ્મા ઉપ્પજ્જન્તિ હેતુપચ્ચયા – સવિતક્કં એકં ખન્ધઞ્ચ વિતક્કઞ્ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… સવિતક્કં એકં ખન્ધઞ્ચ વિતક્કઞ્ચ પટિચ્ચ તયો ખન્ધા…પે… દ્વે ખન્ધે…પે… સવિતક્કે ખન્ધે ચ વિતક્કઞ્ચ મહાભૂતે ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે સવિતક્કં એકં ખન્ધઞ્ચ વિતક્કઞ્ચ પટિચ્ચ તયો ખન્ધા કટત્તા ચ રૂપં…પે… દ્વે ખન્ધે…પે… પટિસન્ધિક્ખણે સવિતક્કં એકં ખન્ધઞ્ચ વિતક્કઞ્ચ પટિચ્ચ તયો ખન્ધા…પે… દ્વે ખન્ધે…પે… સવિતક્કે ખન્ધે ચ વિતક્કઞ્ચ મહાભૂતે ચ પટિચ્ચ કટત્તારૂપં, પટિસન્ધિક્ખણે સવિતક્કં એકં ખન્ધઞ્ચ વત્થુઞ્ચ પટિચ્ચ તયો ખન્ધા વિતક્કો ચ…પે… દ્વે ખન્ધે…પે…. (૩) (સંખિત્તં.)