૧. વિભઙ્ગવારો

હેતુપચ્ચયો

૬૮. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ હેતુપચ્ચયેન પચ્ચયો – દસ્સનેન પહાતબ્બહેતુકા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (મૂલં કાતબ્બં.) દસ્સનેન પહાતબ્બહેતુકા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (મૂલં કાતબ્બં.) દસ્સનેન પહાતબ્બહેતુકા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૬૯. નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ હેતુપચ્ચયેન પચ્ચયો – નદસ્સનેન પહાતબ્બહેતુકા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો, વિચિકિચ્છાસહગતો મોહો ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (મૂલં કાતબ્બં.) વિચિકિચ્છાસહગતો મોહો સમ્પયુત્તકાનં ખન્ધાનં હેતુપચ્ચયેન પચ્ચયો. (મૂલં કાતબ્બં.) વિચિકિચ્છાસહગતો મોહો સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

આરમ્મણપચ્ચયો

૭૦. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ આરમ્મણપચ્ચયેન પચ્ચયો – દસ્સનેન પહાતબ્બહેતુકે ખન્ધે આરબ્ભ દસ્સનેન પહાતબ્બહેતુકા ખન્ધા ઉપ્પજ્જન્તિ. (મૂલં કાતબ્બં.) દસ્સનેન પહાતબ્બહેતુકે ખન્ધે આરબ્ભ નદસ્સનેન પહાતબ્બહેતુકા ખન્ધા ચ મોહો ચ ઉપ્પજ્જન્તિ. (મૂલં કાતબ્બં.) દસ્સનેન પહાતબ્બહેતુકે ખન્ધે આરબ્ભ વિચિકિચ્છાસહગતા ખન્ધા ચ મોહો ચ ઉપ્પજ્જન્તિ. (૩)

૭૧. નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ આરમ્મણપચ્ચયેન પચ્ચયો – દાનં…પે… સીલં…પે… ઉપોસથકમ્મં કત્વા તં પચ્ચવેક્ખતિ, અસ્સાદેતિ અભિનન્દતિ, તં આરબ્ભ નદસ્સનેન પહાતબ્બહેતુકો રાગો ઉપ્પજ્જતિ, ઉદ્ધચ્ચં ઉપ્પજ્જતિ, નદસ્સનેન પહાતબ્બહેતુકં દોમનસ્સં ઉપ્પજ્જતિ, પુબ્બે સુચિણ્ણાનિ …પે… ઝાના વુટ્ઠહિત્વા…પે… અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ…પે… અરિયા નદસ્સનેન પહાતબ્બહેતુકે પહીને કિલેસે પચ્ચવેક્ખન્તિ, વિક્ખમ્ભિતે કિલેસે…પે… પુબ્બે સમુદાચિણ્ણે કિલેસે જાનન્તિ, ચક્ખું…પે… વત્થું નદસ્સનેન પહાતબ્બહેતુકે ખન્ધે ચ મોહઞ્ચ અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ નદસ્સનેન પહાતબ્બહેતુકો રાગો ઉપ્પજ્જતિ, ઉદ્ધચ્ચં ઉપ્પજ્જતિ, નદસ્સનેન પહાતબ્બહેતુકં દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ…પે… અનાગતંસઞાણસ્સ, આવજ્જનાય, મોહસ્સ ચ આરમ્મણપચ્ચયેન પચ્ચયો.

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ આરમ્મણપચ્ચયેન પચ્ચયો – દાનં…પે… ઝાનં…પે… ચક્ખું…પે… વત્થું નદસ્સનેન પહાતબ્બહેતુકે ખન્ધે ચ મોહઞ્ચ અસ્સાદેતિ અભિનન્દતિ, તં આરબ્ભ દસ્સનેન પહાતબ્બહેતુકો રાગો ઉપ્પજ્જતિ, દિટ્ઠિ…પે… વિચિકિચ્છા…પે… દસ્સનેન પહાતબ્બહેતુકં દોમનસ્સં ઉપ્પજ્જતિ.

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ આરમ્મણપચ્ચયેન પચ્ચયો – ચક્ખું…પે… વત્થું નદસ્સનેન પહાતબ્બહેતુકે ખન્ધે ચ મોહઞ્ચ આરબ્ભ વિચિકિચ્છાસહગતા ખન્ધા ચ મોહો ચ ઉપ્પજ્જન્તિ. (૩)

૭૨. દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા દસ્સનેન પહાતબ્બહેતુકસ્સ ધમ્મસ્સ આરમ્મણપચ્ચયેન પચ્ચયો – વિચિકિચ્છાસહગતે ખન્ધે ચ મોહઞ્ચ આરબ્ભ દસ્સનેન પહાતબ્બહેતુકા ખન્ધા ઉપ્પજ્જન્તિ. (મૂલં કાતબ્બં.) વિચિકિચ્છાસહગતે ખન્ધે ચ મોહઞ્ચ આરબ્ભ નદસ્સનેન પહાતબ્બહેતુકા ખન્ધા ચ મોહો ચ ઉપ્પજ્જન્તિ. (મૂલં કાતબ્બં.) વિચિકિચ્છાસહગતે ખન્ધે ચ મોહઞ્ચ આરબ્ભ વિચિકિચ્છાસહગતા ખન્ધા ચ મોહો ચ ઉપ્પજ્જન્તિ. (૩)

અધિપતિપચ્ચયો

૭૩. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દસ્સનેન પહાતબ્બહેતુકે ખન્ધે ગરું કત્વા દસ્સનેન પહાતબ્બહેતુકા ખન્ધા ઉપ્પજ્જન્તિ. સહજાતાધિપતિ – દસ્સનેન પહાતબ્બહેતુકાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

દસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – દસ્સનેન પહાતબ્બહેતુકાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – દસ્સનેન પહાતબ્બહેતુકાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૭૪. નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ અસ્સાદેતિ અભિનન્દતિ, તં ગરું કત્વા નદસ્સનેન પહાતબ્બહેતુકો રાગો ઉપ્પજ્જતિ, પુબ્બે સુચિણ્ણાનિ…પે… ઝાના…પે… અરિયા મગ્ગા વુટ્ઠહિત્વા મગ્ગં ગરું કત્વા…પે… ફલસ્સ અધિપતિપચ્ચયેન પચ્ચયો; ચક્ખું…પે… વત્થું નદસ્સનેન પહાતબ્બહેતુકે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા નદસ્સનેન પહાતબ્બહેતુકો રાગો ઉપ્પજ્જતિ. સહજાતાધિપતિ – નદસ્સનેન પહાતબ્બહેતુકાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં…પે… સીલં…પે… ઉપોસથકમ્મં કત્વા…પે… ઝાના…પે… ચક્ખું…પે… વત્થું નદસ્સનેન પહાતબ્બહેતુકે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા દસ્સનેન પહાતબ્બહેતુકો રાગો ઉપ્પજ્જતિ, દિટ્ઠિ ઉપ્પજ્જતિ. (૨)

અનન્તરપચ્ચયો

૭૫. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા દસ્સનેન પહાતબ્બહેતુકા ખન્ધા પચ્છિમાનં પચ્છિમાનં દસ્સનેન પહાતબ્બહેતુકાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા વિચિકિચ્છાસહગતા ખન્ધા પચ્છિમસ્સ પચ્છિમસ્સ વિચિકિચ્છાસહગતસ્સ મોહસ્સ અનન્તરપચ્ચયેન પચ્ચયો; દસ્સનેન પહાતબ્બહેતુકા ખન્ધા વુટ્ઠાનસ્સ અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા વિચિકિચ્છાસહગતા ખન્ધા પચ્છિમાનં પચ્છિમાનં વિચિકિચ્છાસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

૭૬. નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમો પુરિમો વિચિકિચ્છાસહગતો મોહો પચ્છિમસ્સ પચ્છિમસ્સ વિચિકિચ્છાસહગતસ્સ મોહસ્સ અનન્તરપચ્ચયેન પચ્ચયો; પુરિમા પુરિમા નદસ્સનેન પહાતબ્બહેતુકા ખન્ધા…પે… ફલસમાપત્તિયા અનન્તરપચ્ચયેન પચ્ચયો. (મૂલં કાતબ્બં.) પુરિમો પુરિમો વિચિકિચ્છાસહગતો મોહો પચ્છિમાનં પચ્છિમાનં વિચિકિચ્છાસહગતાનં ખન્ધાનં અનન્તરપચ્ચયેન પચ્ચયો; આવજ્જના દસ્સનેન પહાતબ્બહેતુકાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં.) પુરિમો પુરિમો વિચિકિચ્છાસહગતો મોહો પચ્છિમાનં પચ્છિમાનં વિચિકિચ્છાસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો; આવજ્જના વિચિકિચ્છાસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

૭૭. દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા દસ્સનેન પહાતબ્બહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિચિકિચ્છાસહગતા ખન્ધા ચ મોહો ચ પચ્છિમાનં પચ્છિમાનં વિચિકિચ્છાસહગતાનં ખન્ધાનં અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા વિચિકિચ્છાસહગતા ખન્ધા ચ મોહો ચ પચ્છિમસ્સ પચ્છિમસ્સ વિચિકિચ્છાસહગતસ્સ મોહસ્સ અનન્તરપચ્ચયેન પચ્ચયો; વિચિકિચ્છાસહગતા ખન્ધા ચ મોહો ચ વુટ્ઠાનસ્સ અનન્તરપચ્ચયેન પચ્ચયો. (મૂલં કાતબ્બં.) પુરિમા પુરિમા વિચિકિચ્છાસહગતા ખન્ધા ચ મોહો ચ પચ્છિમાનં પચ્છિમાનં વિચિકિચ્છાસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

સમનન્તરપચ્ચયેન પચ્ચયો… નવ… સહજાતપચ્ચયેન પચ્ચયો… નવ… અઞ્ઞમઞ્ઞપચ્ચયેન પચ્ચયો… છ… નિસ્સયપચ્ચયેન પચ્ચયો… નવ.

ઉપનિસ્સયપચ્ચયો

૭૮. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – દસ્સનેન પહાતબ્બહેતુકા ખન્ધા દસ્સનેન પહાતબ્બહેતુકાનં ખન્ધાનં ઉપનિસ્સયપચ્ચયેન પચ્ચયો. (અવસેસેસુ દ્વીસુ અનન્તરૂપનિસ્સયો, પકતૂપનિસ્સયો.) (મૂલં કાતબ્બં.) દસ્સનેન પહાતબ્બહેતુકા ખન્ધા નદસ્સનેન પહાતબ્બહેતુકાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (મૂલં કાતબ્બં.) દસ્સનેન પહાતબ્બહેતુકા ખન્ધા વિચિકિચ્છાસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

૭૯. નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સમાપત્તિં ઉપ્પાદેતિ માનં જપ્પેતિ; સીલં …પે… પઞ્ઞં… નદસ્સનેન પહાતબ્બહેતુકં રાગં… દોસં… મોહં… માનં… પત્થનં… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ…પે… સમાપત્તિં ઉપ્પાદેતિ; સદ્ધા…પે… સેનાસનં સદ્ધાય…પે… પઞ્ઞાય નદસ્સનેન પહાતબ્બહેતુકસ્સ રાગસ્સ…પે… પત્થનાય ફલસમાપત્તિયા ઉપનિસ્સયપચ્ચયેન પચ્ચયો. (૧)

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દિટ્ઠિં ગણ્હાતિ; સીલં…પે… પઞ્ઞં… નદસ્સનેન પહાતબ્બહેતુકં રાગં… દોસં… મોહં… માનં… પત્થનં… કાયિકં સુખં… કાયિકં દુક્ખં… ઉતું… ભોજનં… સેનાસનં ઉપનિસ્સાય પાણં હનતિ…પે… સઙ્ઘં ભિન્દતિ; સદ્ધા…પે… સેનાસનં દસ્સનેન પહાતબ્બહેતુકસ્સ રાગસ્સ… દોસસ્સ… મોહસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. (૨)

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધા…પે… પઞ્ઞા, નદસ્સનેન પહાતબ્બહેતુકો રાગો… દોસો… મોહો… માનો… પત્થના… કાયિકં સુખં…પે… સેનાસનં, વિચિકિચ્છાસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

૮૦. દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા દસ્સનેન પહાતબ્બહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – વિચિકિચ્છાસહગતા ખન્ધા ચ મોહો ચ દસ્સનેન પહાતબ્બહેતુકાનં ખન્ધાનં ઉપનિસ્સયપચ્ચયેન પચ્ચયો. (મૂલં કાતબ્બં.) વિચિકિચ્છાસહગતા ખન્ધા ચ મોહો ચ નદસ્સનેન પહાતબ્બહેતુકાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (મૂલં કાતબ્બં.) વિચિકિચ્છાસહગતા ખન્ધા ચ મોહો ચ વિચિકિચ્છાસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૮૧. નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ નદસ્સનેન પહાતબ્બહેતુકો રાગો ઉપ્પજ્જતિ, ઉદ્ધચ્ચં ઉપ્પજ્જતિ, નદસ્સનેન પહાતબ્બહેતુકં દોમનસ્સં ઉપ્પજ્જતિ; દિબ્બેન…પે…. (સંખિત્તં. વત્થુપુરેજાતં સંખિત્તં.) (૧)

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ દસ્સનેન પહાતબ્બહેતુકો રાગો ઉપ્પજ્જતિ, દિટ્ઠિ…પે… વિચિકિચ્છા…પે… દસ્સનેન પહાતબ્બહેતુકં દોમનસ્સં ઉપ્પજ્જતિ. (વત્થુપુરેજાતં સંખિત્તં.) (૨)

નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું આરબ્ભ વિચિકિચ્છાસહગતા ખન્ધા ચ મોહો ચ ઉપ્પજ્જન્તિ. (વત્થુપુરેજાતં સંખિત્તં.) (૩)

પચ્છાજાતાસેવનપચ્ચયા

૮૨. દસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં). દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા નદસ્સનેન પહાતબ્બહેતુકસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં)… આસેવનપચ્ચયેન પચ્ચયો.

કમ્મપચ્ચયાદિ

૮૩. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ કમ્મપચ્ચયેન પચ્ચયો – દસ્સનેન પહાતબ્બહેતુકા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (મૂલં કાતબ્બં.) સહજાતા, નાનાક્ખણિકા. સહજાતા – દસ્સનેન પહાતબ્બહેતુકા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – દસ્સનેન પહાતબ્બહેતુકા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ કમ્મપચ્ચયેન પચ્ચયો – દસ્સનેન પહાતબ્બહેતુકા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – નદસ્સનેન પહાતબ્બહેતુકા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – નદસ્સનેન પહાતબ્બહેતુકા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયેન પચ્ચયો… આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો… છ… વિપ્પયુત્તપચ્ચયેન પચ્ચયો… પઞ્ચ.

અત્થિપચ્ચયાદિ

૮૪. દસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ અત્થિપચ્ચયેન પચ્ચયો… તીણિ.

નદસ્સનેન પહાતબ્બહેતુકો ધમ્મો નદસ્સનેન પહાતબ્બહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (સંખિત્તં). નદસ્સનેન પહાતબ્બહેતુકો ધમ્મો દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (સંખિત્તં). (૩)

૮૫. દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા દસ્સનેન પહાતબ્બહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – દસ્સનેન પહાતબ્બહેતુકો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે… વિચિકિચ્છાસહગતો એકો ખન્ધો ચ મોહો ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા નદસ્સનેન પહાતબ્બહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). દસ્સનેન પહાતબ્બહેતુકો ચ નદસ્સનેન પહાતબ્બહેતુકો ચ ધમ્મા દસ્સનેન પહાતબ્બહેતુકસ્સ ચ નદસ્સનેન પહાતબ્બહેતુકસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં (સંખિત્તં). (૩)

નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો.