૧. વિભઙ્ગવારો

હેતુપચ્ચયો

૧૦. કિલેસં ધમ્મં પચ્ચયા કિલેસો ધમ્મો ઉપ્પજ્જતિ હેતુપચ્ચયા… તીણિ (પટિચ્ચસદિસા).

નોકિલેસં ધમ્મં પચ્ચયા નોકિલેસો ધમ્મો ઉપ્પજ્જતિ હેતુપચ્ચયા – નોકિલેસં એકં ખન્ધં પચ્ચયા તયો ખન્ધા…પે… (યાવ અજ્ઝત્તિકા મહાભૂતા) વત્થું પચ્ચયા નોકિલેસા ખન્ધા. (૧)

નોકિલેસં ધમ્મં પચ્ચયા કિલેસો ધમ્મો ઉપ્પજ્જતિ હેતુપચ્ચયા – નોકિલેસે ખન્ધે પચ્ચયા કિલેસા, વત્થું પચ્ચયા કિલેસા. (૨)

નોકિલેસં ધમ્મં પચ્ચયા કિલેસો ચ નોકિલેસો ચ ધમ્મા ઉપ્પજ્જન્તિ હેતુપચ્ચયા – નોકિલેસં એકં ખન્ધં પચ્ચયા તયો ખન્ધા કિલેસા ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વત્થું પચ્ચયા કિલેસા, મહાભૂતે પચ્ચયા ચિત્તસમુટ્ઠાનં રૂપં, વત્થું પચ્ચયા કિલેસા ચ સમ્પયુત્તકા ચ ખન્ધા. (૩)

૧૧. કિલેસઞ્ચ નોકિલેસઞ્ચ ધમ્મં પચ્ચયા કિલેસો ધમ્મો ઉપ્પજ્જતિ હેતુપચ્ચયા – લોભઞ્ચ સમ્પયુત્તકે ચ ખન્ધે પચ્ચયા મોહો દિટ્ઠિ થિનં ઉદ્ધચ્ચં અહિરિકં અનોત્તપ્પં (ચક્કં). લોભઞ્ચ વત્થુઞ્ચ પચ્ચયા કિલેસા. (૧)

કિલેસઞ્ચ નોકિલેસઞ્ચ ધમ્મં પચ્ચયા નોકિલેસો ધમ્મો ઉપ્પજ્જતિ હેતુપચ્ચયા – નોકિલેસં એકં ખન્ધઞ્ચ કિલેસઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… કિલેસે ચ મહાભૂતે ચ પચ્ચયા ચિત્તસમુટ્ઠાનં રૂપં, કિલેસે ચ વત્થુઞ્ચ પચ્ચયા નોકિલેસા ખન્ધા. (૨)

કિલેસઞ્ચ નોકિલેસઞ્ચ ધમ્મં પચ્ચયા કિલેસો ચ નોકિલેસો ચ ધમ્મા ઉપ્પજ્જન્તિ હેતુપચ્ચયા – નોકિલેસં એકં ખન્ધઞ્ચ લોભઞ્ચ પચ્ચયા તયો ખન્ધા મોહો દિટ્ઠિ થિનં ઉદ્ધચ્ચં અહિરિકં અનોત્તપ્પં ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… (ચક્કં). લોભઞ્ચ વત્થુઞ્ચ પચ્ચયા મોહો દિટ્ઠિ થિનં ઉદ્ધચ્ચં અહિરિકં અનોત્તપ્પં સમ્પયુત્તકા ચ ખન્ધા (ચક્કં). (૩)

(આરમ્મણપચ્ચયે નોકિલેસમૂલે પઞ્ચ વિઞ્ઞાણા કાતબ્બા.)